ບົດບັນນາທິການ ທີ່ສະທ້ອນເຖິງນະໂຍບາຍ ຂອງລັດຖະບານສະຫະລັດ
ອຳນາດການປົກຄອງທະຫານມຽນມາ ໄດ້ປະຕິເສດ ທີ່ຈະຟື້ນຟູເສັ້ນທາງໄປສູ່ປະຊາທິປະໄຕ ພ້ອມທັງຍັງສືບຕໍ່ແນເປົ້າໝາຍ ທຳການໂຈມຕີແລະສັງຫານພວກປະທ້ວງດ້ວຍຄວາມສະຫງົບ ນອກຈາກທຳການຊຸ່ມໂຈມຕີຕໍ່ຜູ້ຄົນແບບບໍ່ເລືອກໜ້າແລ້ວ. ນີ້ແມ່ນຮວມທັງການເອົາມາດຕະການແບບໂຫດຫ້ຽມຂອງກຳລັງຮັກ ສາຄວາມປອດໄພ ເມື່ອວັນທີ 27 ມີນາຜ່ານມາ ທີ່ເຮັດໃຫ້ມີຜູ້ເສຍຊີວິດ ຫຼາຍກວ່າ 100 ຄົນ. ກຳລັງຮັກສາຄວາມປອດໄພໄດ້ສັງຫານ 600 ກວ່າຄົນແລ້ວ ຮວມທັງພວກເດັກນ້ອຍຫຼາຍສິບຄົນ.
ເພື່ອເປັນການຕອບໂຕ້ ຕໍ່ການກໍ່ຄວາມຮຸນແຮງເຫຼົ່ານີ້ ສະຫະລັດໄດ້ທຳການລົງໂທດຕໍ່ບໍລິສັດຂາຍຫີນແກ້ວມຽນມາ ຊຶ່ງເປັນບໍລິສັດລັດວິສາຫະກິດເພື່ອໃຫ້ສອດ ຄ່ອງ ກັບດຳລັດຝ່າຍບໍລິຫານ ເລກທີ 14014. ພວກທະຫານ ໄດ້ສວຍໃຊ້ຫີນແກ້ວແລະແຫຼ່ງຊັບພະຍາກອນອື່ນໆ ສ້າງຮັ່ງຄູນມີໃຫ້ແກ່ພວກຕົນ ແລະບໍລິສັດ ອັນຍະມະນີມຽນມາ ແມ່ນບໍລິສັດທີ່ນຳໜ້າທີ່ຮັບຜິດຊອບກ່ຽວກັບກິດຈະກຳຂາຍຫີນແກ້ວຢູ່ໃນປະເທດມຽນມາ. ການລົງໂທດເຫຼົ່ານີ້ແມ່ນແນໃສ່ອຳນາດການປົກຄອງບໍ່ແມ່ນປະຊາຊົນຊາວມຽນມາ. ການເອົາມາດຕະການນີ້ “ແມ່ນໄດ້ສະແດງໃຫ້ ເຫັນເຖິງຄວາມໝາຍໝັ້ນຂອງກະຊວງການເງິນສະຫະລັດ ທີ່ຈະປະຕິເສດບໍ່ໃຫ້ອຳນາດການປົກຄອງທະຫານມຽນມາ ເຂົ້າເຖິງແຫຼ່ງເງິນທຶນ ຮວມທັງລັດວິສາຫະກິດທີ່ສຳຄັນຕ່າງໆໃນທົ່ວປະເທດມຽນມາ” ນັ້ນຄືຄຳເວົ້າຂອງທ່ານນາງແອນເດຣຍແກັກກີ ຜູ້ອຳນວຍການຫ້ອງການຄວບຄຸມຊັບສິນຕ່າງປະເທດ. ທ່ານນາງກ່າວຕື່ມວ່າ “ສະຫະລັດຈະສືບຕໍ່ເຮັດວຽກແບບບໍ່ຮູ້ອິດເໝື່ອຍ ຮວມທັງຮ່ວມກັບພາຄີຢູ່ໃນຂົງເຂດແລະໃນທົ່ວໂລກ ເພື່ອໃຫ້ການສະໜັບສະໜຸນຕໍ່ການຟື້ນຟູລະບອບປະຊາທິປະໄຕແລະການປົກຄອງດ້ວຍຕົວບົດກົດໝາຍຢູ່ໃນມຽນມາແລະນຳເອົາພວກທີ່ຮັບຜິດຊອບໃນການຊອກຫາທາງທຳລາຍຫຼັກຄຸນຄ່າເຫຼົ່ານີ້ ມາລົງໂທດ.”
ສະຫະລັດເອົາມາດຕະການດັ່ງກ່າວໃນຂະນະທີ່ພວກຜູ້ນຳທະຫານເຂົ້າຮ່ວມການວາງສະແດງອັນຍະມະນີຫີນແກ້ວທີ່ນະຄອນຫຼວງເນປີດໍ ພາຍໃຕ້ການໃຫ້ຄວາມອຸບປະຖຳ ຂອງບໍລິສັດອັນຍະມະນີມຽນມາ. ລັດຖະມົນນຕີການຕ່າງປະເທດສະຫະລັດ ທ່ານແອນໂທນີ ບລິງເກັນ ໃຫ້ຂໍ້ສັງເກດຢູ່ໃນຖະແຫຼງການສະບັບນຶ່ງວ່າ “ພວກເຮົາພວມສົ່ງສັນຍານອັນຈະແຈ້ງ ໄປໃຫ້ພວກທະຫານຮູ້ວ່າ ສະຫະລັດຈະເພີ້ມຄວາມກົດດັນຕໍ່ການຫຼັ່ງໄຫຼເງິນລາຍໄດ້ຂອງອຳນາດການປົກຄອງ ຈົນກວ່າ ພວກທະຫານຢຸດເຊົາການກໍ່ຄວາມຮຸນແຮງ ປ່ອຍພວກທີ່ຖືກຈັບກຸມຄຸມຂັງແບບບໍ່ເປັນທຳທັງໝົດ ຍົກເລີກກົດໄອຍະການເສິກແລະພາວະສຸກເສີນຢູ່ທົ່ວປະເທດ ຍົກເລີກການຈຳກັດຮັດແຄບທາງດ້ານສື່ສານຕ່າງໆແລະຟື້ນຟູເສັ້ນທາງໄປສູ່ປະຊາທິປະໄຕຂອງມຽນມາ.”
ສະຫະລັດ ໃນການປະສານງານຢ່າງໃກ້ຊິດກັບປະເທດພັນທະມິດແລະພາຄີໃນທົ່ວຂົງເຂດແລະທົ່ວໂລກ ຍັງສືບຕໍ່ມີຄວາມໝັ້ນໝາຍຢ່າງແນ່ວແນ່ທີ່ຈະກົດດັນໃຫ້ພວກທະຫານແລະກຳລັງຮັກສາຄວາມປອດໄພຂອງມຽນມາຢຸດເຊົາທຸກການກໍ່ຄວາມຮຸນແຮງຕໍ່ພວກປະທ້ວງດ້ວຍຄວາມສະຫງົບ ໃຫ້ການສະໜັບສະໜຸນຕໍ່ການຟື້ນຟູເສັ້ນທາງໄປສູ່ປະຊາທິປະໄຕ ແລະຊຸກຍູ້ ໃຫ້ນຳເອົາພວກທີ່ຮັບຜິດ ຊອບ ໃນການເຮັດລັດຖະປະຫານແລະກໍ່ຄວາມຮຸນແຮງທີ່ໜ້າຢ້ານກົວຕໍ່ປະຊາ ຊົນມາລົງໂທດ.