ບົດບັນນາທິການ ທີ່ສະທ້ອນເຖິງນະໂຍບາຍ ຂອງລັດຖະບານສະຫະລັດ
ຄວາມເຄັ່ງຕຶງໄດ້ເພີ້ມທະວີຂຶ້ນຕາມເຂດຊາຍແດນກ້ຳຕາເວັນອອກຂອງຢູເຄຣນໃນຂະນະທີ່ປະເທດຣັດເຊຍໄດ້ຍ້າຍທະຫານຫຼາຍພັນຄົນໄປຍັງເຂດຊາຍຊາຍແດນທີິ່ຕິດກັບຢູເຄຣນເມື່ອສອງສາມອາທິດທີ່ຜ່ານມານີ້. ມັນເປັນການເຕົ້າໂຮມກຳລັງທະຫານຣັດເຊຍທີ່ໃຫຍ່ທີ່ສຸດນັບຕັ້ງແຕ່ຣັດເຊຍໄດ້ເຂົ້າຢຶດຄອງແຫຼມໄຄຣເມຍ ໃນປີ 2014. ອີງຕາມລັດຖະບານຢູເຄຣນແລ້ວ ມີຫຼາຍເຖິງ 14 ພັນຄົນໄດ້ຖືກຂ້າຕາຍ ໃນບັນຫາຂັດແຍ້ງທີ່ດຳເນີນມາເປັນເວລາ 7 ປີ.
ເມື່ອວັນທີ 22 ເມສາຜ່ານມານີ້ ລັດຖະມົນຕີກະຊວງປ້ອງກັນປະເທດຂອງຣັດເຊຍ ທ່ານເຊີເກ ຊອຍກູ ໄດ້ປະກາດວ່າ ການຖອນທະຫານ ຈະເລີ້ມຂຶ້ນ ໃນເດືອນພຶດສະພາ ແຕ່ມາຈົນເຖິງເວລາທີ່ຂຽນລາຍງານສະບັບນີ້ ການເສີມກຳລັງທີ່ໃຫຍ່ທີ່ສຸດທາງທະຫານນັບແຕ່ປີ 2014 ເປັນຕົ້ນມານັ້ນ ຍັງບໍ່ທັນມີການຖອນອອກໄປຈາກເຂດດັ່ງກ່າວເທື່ອ.
ລັດຖະມົນຕີການຕ່າງປະເທດສະຫະລັດ ທ່ານແອນໂທນີ ບລິງເກັນ ກ່າວໃນລະຫວ່າງການພົບປະກັບລັດຖະມົນຕີການຕ່າງປະເທດຂອງຢູເຄຣນ ທ່ານດມີໂຕຣ ກູເລບາ ເມື່ອໄວໆມານີ້ວ່າ ສະຫະລັດ “ແມ່ນຢືນດ້ວຍຄວາມໝັ້ນຄົງ ຢູ່ເບື້ອງຫຼັງອະທິປະໄຕແລະຜືນແຜ່ນດິນອັນຄົບຖ້ວນຂອງຢູເຄຣນ.”
ລັດຖະມົນຕີການຕ່າງປະເທດບລິງເກັນ ກ່າວວ່າ “ນີ້ແມ່ນມີຄວາມສຳຄັນເປັນພິເສດ ໃນເວລາທີ່ພວກເຮົາໄດ້ເຫັນຣັດເຊຍ ຊຶ່ງບໍ່ເປັນຈັ່ງໂຊກ ໄດ້ເອົາທຸກມາດຕະການທ້າທາຍເກາະຜິດເມື່ອເວົ້າເຖິງເລື້ອງຢູເຄຣນ.”
ສ່ວນເລຂາທິການໃຫຍ່ອົງການເນໂຕ້ ທ່ານເຈັນສ໌ ສໂຕລເຕັນເບີກ ຮຽກຮ້ອງໃຫ້ຣັດເຊຍ “ຢຸດເຊົາການເຕົ້າໂຮມກຳລັງທະຫານ ທັງຢູ່ໃນແລະອ້ອມແອ້ມຢູເຄຣນ ຢຸດເຊົາການທ້າທາຍເກາະຜິດແລະຫຼຸດຜ່ອນຄວາມເຄັ່ງຕຶງລົງໃນທັນທີ.
ລັດຖະມົນຕີການຕ່າງປະເທດບລິງເກັນ ໃຫ້ຂໍ້ສັງເກດວ່າອົງການເນໂຕ້ພວມຫາລືກ່ຽວກັບຄວາມພະຍາຍາມຂອງຢູເຄຣນ ຊຶ່ງໃນທີ່ສຸດຢາກເຂົ້າເປັນສະມາຊິກໃນອົງການພັນທະມິດປ້ອງກັນປະເທດດັ່ງກ່າວ. ທ່ານໃຫ້ການຢືນຢັນວ່າຢູເຄຣນໄດ້ເອົາບາດກ້າວ “ທີ່ສຳຄັນຫຼາຍ” ເພື່ອເສີມຂະຫຍາຍສະຖາບັນປະຊາ
ທິປະໄຕ ສ້າງຄວາມກ້າວໜ້າໃຫ້ແກ່ການປົກຄອງດ້ວຍຕົວບົດກົດໝາຍ ທຳການປະຕິຮູບທີ່ສຳຄັນທາງດ້ານເສດຖະກິດ ຊຶ່ງທັງໝົດນັ້ນແມ່ນມີຄວາມສຳຄັນຫຼາຍສຳລັບອົງການເນໂຕ້ ສຳລັບອະນາຄົດຂອງຢູເຄຣນ ແລະການເຂົ້າຮ່ວມຂອງຢູເຄຣນໃນສະຖາບັນຕ່າງໆຂອງປະເທດຢູໂຣບ-ແອັດແລນຕິກ.”
ໃນການໂອ້ລົມທາງໂທລະສັບກັບປະທານາທິບໍດີຣັດເຊຍ ທ່ານວລາດີເມຍ ປູຕິນນັ້ນ ປະທານາທິບໍດີໂຈ ໄບເດັນໄດ້ ໃຫ້ການຢືນຢັນ “ກ່ຽວກັບຄວາມໝັ້ນ ໝາຍທີ່ບໍ່ມີການປ່ຽນແປງຂອງທ່ານຕໍ່ອະທິປະໄຕແລະຜືນແຜ່ນດິນອັນຄົບຖ້ວນຂອງຢູເຄຣນ.” ຖະແຫຼງການຂອງທຳນຽບຂາວກ່າວວ່າ ນອກນັ້ນປະທານາທິບໍ ດີຍັງໄດ້ “ສະແດງຄວາມເຫັນຫ່ວງ ກ່ຽວກັບການເຕົ້າໂຮມກຳລັງທະຫານ ໃນທັນທີທັນໃດ ຂອງຣັດເຊຍ ຢູ່ເຂດຢຶດຄອງໃນໄຄຣເມຍ ແລະບໍລິເວນຊາຍແດນຢູເຄຣນແລະໄດ້ຮຽກ ຮ້ອງໃຫ້ຣັດເຊຍຫຼຸດຄວາມເຄັ່ງຕຶງລົງ.”
ປະທານາທິບໍດີໄບເດັນ ກ່າວຕໍ່ໄປໃນການຢືນຢັນອີກຄັ້ງນຶ່ງ ຂອງສະຫະລັດຕໍ່ເປົ້າໝາຍຂອງການສ້າງຄວາມສຳພັນທີ່ທຸ່ນທ່ຽງແລະທຳນາຍໄດ້ກັບປະເທດຣັດເຊຍ ທີ່ສອດຄ່ອງກັບຜົນປະໂຫຍດຂອງສະຫະລັດ ແລະຂໍ້ສະເໜີເພື່ອຈັດການພົບປະສຸດຍອດໃນປະເທດທີສາມ ໃນໄລຍະສອງສາມເດືອນຕໍ່ໜ້ານີ້ເພື່ອຫາລືກ່ຽວກັບບັນຫາຕ່າງໆຮອບດ້ານທີ່ກຳລັງປະເຊີນໜ້າສະຫະລັດກັບຣັດເຊຍຢູ່ໃນເວລານີ້.