ບົດບັນນາທິການ ທີ່ສະທ້ອນເຖິງນະໂຍບາຍ ຂອງລັດຖະບານສະຫະລັດ
ປະທານາທິບໍດີໂຈ ໄບເດັນ ກ່າວວ່າ ອົງປະກອບທີ່ສຳຄັນເພື່ອສ້າງຄວາມກ້າວ ໜ້າ ໃຫ້ແກ່ຜົນປະໂຫຍດຂອງອາເມຣິກັນແລະສະໜັບສະໜຸນຫຼັກຄຸນຄ່າສາກົນ ກໍແມ່ນ “ເຮັດວຽກຮ່ວມກັນ ກັບບັນດາປະເທດພັນທະມິດ ແລະພາຄີ ທີ່ໃກ້ ຊິດທີ່ສຸດຂອງພວກເຮົາ.”
ເພື່ອກ້າວໄປສູ່ຈຸດນັ້ນ ພວກເຈົ້າໜ້າທີ່ອະວຸໂສ ຈາກສະຫະລັດ ອອສເຕຣເລຍ ອິນເດຍແລະຍີປຸ່ນ ໄດ້ພົບປະທາງອອນລາຍນ໌ ເພື່ອປຶກສາຫາລືກັນເມື່ອວັນທີ 12 ສິງຫາແລ້ວນີ້. ການປຶກສາຫາລືຮອບທີ 8 ແມ່ນເພື່ອສືບສານຕໍ່ການຫາລືຄັ້ງປະຫວັດສາດ ທີ່ມີຂຶ້ນລະຫວ່າງປະທານາທິບໍດີໂຈ ໄບເດັນ ນາຍົກລັດຖະມົນຕີອອສເຕຣເລຍ ທ່ານສະກັອດ ມໍຣິສັນ ນາຍົກລັດຖະມົນຕີອິນເດຍ ທ່ານນາເຣັນດຣາ ໂມດີ ແລະນາຍົກລັດຖະມົນຕີຍີ່ປຸ່ນ ທ່ານໂຢຊິຮິເດະ ຊູກະ ໃນລະຫວ່າງກອງປະຊຸມສຸດຍອດ ຮອບປະຖົມມະເລີກ ຂອງພວກຜູ້ນຳກຸ່ມຄວດຫຼືກຸ່ມ 4 ປະເທດ ຊຶ່ງມີຂຶ້ນໃນວັນທີ 12 ມີນາ ປີ 2021.
ກຸ່ມຄວດ ແມ່ນປະກອບດ້ວຍ 4 ປະເທດປະຊາທິປະໄຕ ທີ່ມີຈິດໃຈແບບດຽວ ແລະເຂົ້າມາຮ່ວມກັນ ດັ່ງທີ່ລັດຖະມົນຕີການຕ່າງປະເທດແອນໂທນີ ບລິງເກັນກ່າວວ່າ “ເພື່ອເຮັດວຽກຮ່ວມກັນ ກ່ຽວກັບບັນຫາແລະເລື້ອງຕ່າງໆ ທີ່ຈະມີຜົນກະທົບຕໍ່ຊີວິດຂອງປະຊາຊົນໃນປະເທດຂອງພວກເຮົາທັງໝົດ ແລະທີ່ຈິງແລ້ວກໍຄື ໃນຂົງເຂດອິນໂດປາຊີຟິກທັງມວນ ແລະຢູ່ພາຍໃຕ້ນັ້ນ ກໍແມ່ນຄວາມໝັ້ນໃຈວ່າ ອິນໂດປາຊີິຟິກ ຈຳເປັນທີ່ຈະຕ້ອງເປັນເຂດທີ່ເສລີແລະເປີດກວ້າງ.”
ໃນຖະແຫຼງການ ທາງກະຊວງການຕ່າງປະເທດສະຫະລັດໃຫ້ຂໍ້ສັງເກດວ່າ ໃນກອງປະຊຸມເມື່ອວັນທີ 12 ສິງຫານັ້ນ ປະເທດປະຊາທິປະໄຕທັງ 4 “ໄດ້ຮັບຮູ້ວ່າ ຄວາມໝັ້ນຄົງແລະຄວາມອຸດົມຮັ່ງມີຂອງໂລກ ແມ່ນຂຶ້ນຢູ່ກັບຂົງເຂດດັ່ງກ່າວ ຍັງເປັນເຂດ ທີ່ປະກອບດ້ວຍທຸກພັກຝ່າຍ ປັບໂຕໄດ້ ແລະມີຄວາມເຂັ້ມ ແຂງ. ພວກຜູ້ນຳທັງ 4 ຍັງໄດ້ປຶກສາຫາລືກັນເຖິງຄວາມສຳຄັນໃນການຮ່ວມມືແບບຍືນຍົງ ເພື່ອຢຸດເຊົາການແຜ່ລະບາດຂອງໂຄວິດ-19 ຢູ່ໃນເຂດອິນໂດປາຊີຟິກ ແລະສະໜັບສະໜຸນການຟື້ນໂຕຄືນທາງດ້ານເສດຖະກິດ.
ກະຊວງການຕ່າງປະເທດສະຫະລັດກ່າວວ່າ “ພວກເຈົ້າໜ້າທີ່ພວມກວດກາເບິ່ງຊ່ອງທາງ ທີ່ຈະສ້າງຄວາມກ້າວໜ້າ ໃຫ້ແກ່ການຮ່ວມມືຕ່າງໆທີ່ພວມດຳເນີນຢູ່ໃນຫຼາຍໆດ້ານ ຊຶ່ງຈະໃຫ້ຜົນປະໂຫຍດແກ່ກັນແລະກັນຮວມທັງບັນຫາທ້າທາຍທາງຍຸດທະສາດທີ່ພວມປະເຊີນໜ້າຂົງເຂດ ຕໍ່ຕ້ານການບິດເບືອນຂ່າວ ສົ່ງເສີມປະຊາທິປະໄຕ ແລະສິດທິມະນຸດ ສ້າງຄວາມເຂັ້ມແຂງໃຫ້ແກ່ສະຖາບັນສາກົນ ຮວມທັງອົງການສະຫະປະຊາຊາດ ແລະອົງການກ່ຽວຂ້ອງອື່ນໆ ແລະໃຫ້ການສະໜັບສະໜຸນຕໍ່ບັນດາປະເທດທີ່ຍັງມີຄວາມອ່ອນແອ ຕໍ່ການເອົາມາດຕະການບີບບັງຄັບຢູ່ໃນຂົງເຂດເອເຊຍປາຊີຟິກ.”
ນອກນັ້ນ ພວກເຈົ້າໜ້າທີ່ຍັງໄດ້ຫາລືກັນ “ເຖິງຄວາມສຳຄັນໃນການມີສັນຕິພາບແລະຄວາມໝັ້ນຄົງ ຢູ່ໃນຊ່ອງແຄບໄຕ້ຫວັນ ວິກິດການທີ່ພວມດຳເນີນຢູ່ໃນມຽນມາ ແລະໃຫ້ການຢືນຢັນອີກເທື່ອນຶ່ງໃນການສະໜັບສະໜຸນຢ່າງແຂງຂັນຂອງ ກຸ່ມຄວດຕໍ່ຄວາມສຳຄັນຂອງອາຊ່ຽນ ແລະວິໄສທັດຂອງອາຊ່ຽນຕໍ່ອິນໂດປາຊີຟິກ.”
ພວກເຂົາເຈົ້າຈະສືບຕໍ່ປຶກສາຫາລືກັນເປັນປະຈຳໃນລະດັບລັດຖະມົນຕີ ເຈົ້າໜ້າທີ່ອະວຸໂສແລະໃນລະດັບເຮັດວຽກ ແລະວາງແຜນຈັດກອງປະຊຸມສຸດຍອດຮອບ2 ຂອງພວກຜູ້ນໍາ ໃນລະດູໃບໄມ້ຫຼົ່ນປີນີ້.
ກຸ່ມຄວດ ແມ່ນເປັນສ່ວນນຶ່ງ ຂອງຕາໜ່າງອັນເລິກເຊິ່ງ ໃນການເປັນພາຄີເພື່ອຊ່ວຍເຫຼືອໃຫ້ສະຫະລັດໃນການເສີມຄວາມເຂັ້ມແຂງໃຫ້ແກ່ລະບົບການປົກຄອງຂອງສາກົນ ທີ່ອີງໃສ່ກົດໝາຍເປັນພື້ນຖານແລະສ້າງຄວາມກ້າວໜ້າໃຫ້ແກ່ລັກຄຸນຄ່າປະຊາທິປະໄຕ. ດັ່ງທີ່ລັດຖະມົນຕີບລິງເກັນໄດ້ໃຫ້ຂໍ້ສັງເກດ “ບັນຫາທ້າທາຍສ່ວນໃຫຍ່ທີ່ພວກເຮົາປະເຊີນໜ້າຢູ່ໃນໂລກ ບໍ່ສາມາດທີ່ຈະແກ້ໄຂໄດ້ໂດຍປະເທດໃດປະເທດນຶ່ງຕາມລຳພັງ. ດັ່ງນັ້ນ ມັນຈຶ່ງເປັນຂອງທຳມະດາ ແລະສິ່ງປົກກະຕິ ສຳລັບປະເທດປະຊາທິປະໄຕ ທີ່ມີແນວຄິດແບບດຽວກັນ ມາໂຮມກັນ ແລະເຮັດວຽກກ່ຽວກັບບັນຫາເຫຼົ່ານີ້ນຳກັນ.”