ບົດບັນນາທິການ ທີ່ສະທ້ອນເຖິງນະໂຍບາຍ ຂອງລັດຖະບານສະຫະລັດ
ແມ່ນໍ້າຂອງເຊື່ອມໂຍງປະຊາຊົນ ໃນເຂດເອເຊຍຕາເວັນອອກສຽງໃຕ້ປະມານ 70 ລ້ານຄົນ ຜູ້ທີ່ເພິ່ງພາແມ່ນ້ຳສາຍນີ້ສຳລັບການດຳລົງຊີວິດ ການຂົນສົ່ງແລະຄວາມຕ້ອງການທາງດ້ານພະລັງງານ. ແຕ່ຍ້ອນບັນຫາຕ່າງໆຢູ່ໃນຈຸດໃດຈຸດນຶ່ງມີຜົນກະທົບຕໍ່ຫຼາຍໆລ້ານຄົນທີ່ຢູ່ທາງລຸ່ມເຂື່ອນລົງມາ ເມື່ອເກືອບ 3 ທົດສະວັດກວ່າໆຜ່ານມາ ກຳປູເຈຍ ລາວ ໄທແລະຫວຽດນາມ ຈຶ່ງໄດ້ສ້າງຕັ້ງກຳມາທິການແມ່ນ້ຳຂອງສາກົນຫຼື MRC ຊຶ່ງເປັນອົງການຈັດຕັ້ງລະຫວ່າງລັດຖະບານ ສຳລັບການປຶກສາຫາລື ແລະການຮ່ວມມື ກ່ຽວກັບການຄຸ້ມຄອງຊັບພະຍາກອນນ້ຳແລະການພັດທະນາແບບຍືນຍົງ. ສະຫະລັດໄດ້ໃຫ້ການສະໜັບສະໜຸນຢ່າງເປັນທາງການຕໍ່ອົງການ MRC ໃນຖານະຄູ່ຮ່ວມພັດທະນາ.
ໃນເດືອນກໍລະກົດ ປີ 2009 ສະຫະລັດ ກຳປູເຈຍ ລາວ ມຽນມາ ໄທ ແລະຫວຽດນາມໄດ້ຮ່ວມກັນສ້າງຕັ້ງຂໍ້ລິເລີ້ມລຸ່ມແມ່ນ້ຳຂອງເພື່ອສ້າງຄວາມກ້າວໜ້າໃຫ້ແກ່ການເຕີບໂຕທາງດ້ານເສດຖະກິດແບບຍືນຍົງໃນຂົງເຂດ. ໃນປີ 2020 ຂໍ້ລິເລີ້ມໃນເຂດລຸ່ມແມ່ນ້ຳຂອງໄດ້ຂະຫຍາຍ ແລະກາຍມາເປັນພາຄີຫຼືຄູ່ຮ່ວມມືແມ່ນ້ຳຂອງກັບສະຫະລັດ ໂດຍເພີ້ມທະວີການຮ່ວມມື ໃນອະນຸພາກພາກພື້ນລະ ຫວ່າງ 5 ປະເທດຢູ່ໃນຂົງເຂດ ໂດຍໄດ້ຮັບຄວາມສະໜັບສະໜຸນຈາກສະຫະ ລັດ.
ດ້ວຍເຫດນີ້ ສະຫະລັດຈຶ່ງໄດ້ປະກາດໃຫ້ຕົນເອງເປັນພາຄີທີ່ມີຄວາມໝັ້ນໝາຍ ໃນການແກ້ໄຂບັນຫາທ້າທາຍຂ້າມຊາຍແດນທີ່ພວມປະເຊີນໜ້າກັບຂົງເຂດແມ່ນ້ຳຂອງ. ລັດຖະມົນຕີການຕ່າງປະເທດສະຫະລັດ ທ່ານແອນໂທນີ ບລິງເກັນໄດ້ກ່າວຢູ່ໃນຖະແຫຼງການທີ່ເປັນລາຍລັກອັກສອນສະບັບນຶ່ງວ່າ “ພ້ອມກັບພາ
ຄີຂອງພວກເຮົາໃນເຂດແມ່ນ້ຳຂອງ ພວກເຮົາພວມເສີມຂະຫຍາຍຄວາມເຂັ້ມ ແຂງໃຫ້ແກ່ການປົກຄອງທີ່ດີ ຄວາມເປັນອິດສະຫຼະທາງດ້ານເສດຖະກິດແລະການພັດທະນາແບບຍືນຍົງ ໂດຍຊຸກຍູ້ໃຫ້ມີຄວາມໂປ່ງໃສ ແລະນະໂຍບາຍທີ່ອີງໃສ່ກົດໝາຍເປັນຫຼັກ.”
ທີ່ຈິງແລ້ວ ພາຄີດັ່ງກ່າວແມ່ນສ່ວນນຶ່ງຂອງແຜນການໃຫ້ຄວາມສະໜັບສະໜຸນຂອງສະຫະລັດຕໍ່ຂົງເຂດ ໂດຍມີອາຊ່ຽນ ເປັນຈຸດສູນກາງ. ໃນໄລຍະ 30 ປີ ກວ່າໆຜ່ານມານີ້ ມັນໄດ້ຊ່ວຍປັບປຸງຊີວິດການເປັນຢູ່ຂອງປະຊາຊົນຫຼາຍຮ້ອຍພັນຄົນໃນຂົງເຂດແມ່ນ້ຳຂອງ. ແຕ່ແນວໃດກໍຕາມ ໃນຂະນະທີ່ວັນເວລາຜ່ານກາຍໄປ ບັນຫາທ້າທາຍໃໝ່ທີ່ສະຫຼັບຊັບຊ້ອນກວ່າເກົ່າກໍເກີດຂຶ້ນ ຍ້ອນມັນມີລັກສະນະໃນທາງຂ້າມຊາດ ເຊັ່ນວິກິດການດ້ານດິນຟ້າອາກາດ ແລະໂຣກລະບາດໂຄວິດ-19.
ລັດຖະມົນຕີບລິງເກັນ ກ່າວເມື່ອວັນທີ 3 ສິງຫາຜ່ານມາ ໃນລະຫວ່າງກອງປະຊຸມລະດັບລັດຖະມົນຕີຂອງພາຄີແມ່ນ້ຳຂອງກັບສະຫະລັດ ໂດຍເວົ້າວ່າ “ເພື່ອເອົາຊະນະໄພຂົ່ມຂູ່ໃນໄລຍະ 2 ປີຈາກໂຄວິດ-19 ສະຫະລັດໄດ້ຈັດສົ່ງຢາວັກຊີນ 8 ລ້ານ 5 ແສນໂດສ ແລະການຊ່ວຍເຫຼືອເກືອບ 60 ລ້ານໂດລາໄປໃຫ້ປະເທດຕ່າງໆໃນເຂດອະນຸພາກພື້ນລຸ່ມແມ່ນ້ຳຂອງ ແລະຈະສືບຕໍ່ເຮັດວຽກຢ່າງ
ໃກ້ຊິດກັບເຈົ້າໜ້າທີ່ສາທາລະນະສຸກໃນເຂດທ້ອງຖິ່ນ ເພື່ອການກຽມພ້ອມຮັບມືແລະຜ່ອນເບົາໄພຂົ່ມຂູ່ຈາກໂຣກລະບາດ. ພວກເຮົາສະໜອງຢາວັກຊີນເຫຼົ່ານີ້ໂດຍບໍ່ຕ້ອງເສຍເງິນ ໂດຍບໍ່ມີເງື່ອນໄຂຂໍ້ຜູກໝັດທາງດ້ານການເມືອງ ຫຼືທາງດ້ານເສດຖະກິດ.”
ທ່ານບລິງເກັນກ່າວຕື່ມວ່າ “ໃນປີຈະມາ ພວກເຮົາຫວັງວ່າ ຈະມີການຂະຫຍາຍການພົວພັນກ່ຽວກັບບັນຫາຕ່າງໆ ທີ່ມີຜົນກະທົບ ບໍ່ພຽງແຕ່ໃນເຂດແມ່ນ້ຳຂອງເທົ່ານັ້ນ ແຕ່ຍັງມີຜົນຕໍ່ໂລກນຳດ້ວຍ ຮວມທັງໃຫ້ການສະໜັບສະໜຸນຕໍ່ການໃຫ້ສິດອຳນາດແກ່ພວກແມ່ຍິງ ເສີມຂະຫຍາຍລະບົບຮັກສາສຸຂະພາບເພື່ອກຽມຮັບມືກັບໂຣກລະບາດໃນຄັ້ງຕໍ່ໄປ ແລະຍົກລະດັບຄວາມໄຝ່ຝັນທາງດ້ານດິນຟ້າອາກາດຂອງພວກເຮົາ.”
ທ່ານກ່າວວ່າ “ພາຄີແມ່ນ້ຳຂອງກັບສະຫະລັດແມ່ນພວມຈັດຕັ້ງປະຕິບັດວິໄສທັດຂອງປະທານາທິບໍດີໄບເດັນທີ່ວ່າ ພວກເຮົາສາມາດຮັບມື ກັບບັນຫາທ້າທາຍທີ່ພວມເພີ້ມທະວີຂຶ້ນຂອງໂລກໃນທຸກມື້ນີ້ ດ້ວຍການເຮັດວຽກຮ່ວມກັນ. ດັ່ງທີ່ເຮົາໄດ້ຮັບມືກັບໂຣກລະບາດແລະຟື້ນຟູຄວາມເຂັ້ມແຂງໃຫ້ແກ່ເສດຖະກິດຂອງພວກເຮົາຄືນໃໝ່ນັ້ນ ບັນດາປະເທດໃນເຂດລຸ່ມແມ່ນ້ຳຂອງ ສາມາດກາງຕໍ່ສະຫະລັດແລະບັນດາປະເທດເພື່ອນມິດ ຈາກເຂດແມ່ນ້ຳຂອງໄດ້.”