ຮອງປະທານາທິບໍດີ ຄາມາລາ ແຮຣິສ ໄດ້ເອີ້ນອົງການຕ່າງໆທີ່ລັກລອບເອົາຄົນຕ່າງຊາດເຂົ້າມາ ແລະຢູ່ພາຍໃນສະຫະລັດນັ້ນ ວ່າ “ພວກລ່າເຫຍື່ອ”. ທ່ານນາງຕ້ອງຕິການໃຊ້ວິທີຂົ່ມຂູ່ຂອງພວກເຂົາ ແລະການບໍ່ຄຳນຶງເຖິງຄວາມປອດໄພຂອງພວກອົບພະຍົບ ທີ່ພວກເຂົາສະແຫວງຫາຜົນປະໂຫຍດນຳ.
“ພວກເຮົາຕ້ອງໂຈມທຸກພາກສ່ວນຂອງທຸລະກິດພວກເຂົາ ແລະຮັບປະກັນການນຳເອົາພວກເຂົາມາລົງໂທດໜັກທີ່ສຸດ ແລະວ່ອງໄວ ສຳລັບການກະທຳຕ່າງໆຂອງພວກເຂົາ. ແລະອັນນັ້ນ ເປັນວຽກງານທີ່ລັດຖະບານພວກເຮົາ ໄດ້ປະຕິບັດມາຢູ່ເລື້ອຍໆ” ທ່ານນາງແຮຣິສ ກ່າວ.
ວຽກງານເຊັ່ນນັ້ນ ໄດ້ຖືກນຳມາໃຫ້ເຫັນ ໃນວັນທີ 4 ມັງກອນ ເມື່ອກະຊວງຍຸຕິທຳຂອງສະຫະລັດ ໄດ້ປະກາດວ່າ ແມ່ຍິງລັດເທັກຊັສຜູ້ນຶ່ງ ໄດ້ຍອມຮັບຜິດ ສຳລັບບົດບາດຂອງນາງ ໃນປະຕິບັດການລັກລອບມະນຸດຂະໜາດໃຫຍ່. ໃນຖະແຫລງການນັ້ນ ກະຊວງຍຸຕິທຳ ໄດ້ກ່າວວ່າ ນາງເອີຣມີເນຍ ເຊີຣາໂນ ພີດຣາ ທີ່ຍັງຮູ້ຈັກອີກໃນຊື່ “ເອີຣມາ” ແລະ “ເຈົ້າແມ່ໃຫຍ່ ຫຼື Boss Lady” ໄດ້ນຳພາອົງການ “ທີ່ອຳນວຍຄວາມສະດວກໃນດ້ານການຂົນສົ່ງ ແລະການເຄື່ອນຍ້າຍພວກຍົກຍ້າຍຖິ່ນຖານຫຼາຍຮ້ອຍຄົນຢ່າງຜິດກົດໝາຍ ພາຍໃນສະຫະລັດ ແລະໄດ້ຫາບ່ອນພັກພິງ ແລະປົກປິດພວກຍົກຍ້າຍຖິ່ນຖານ ບໍ່ໃຫ້ຖືກກວດພົບໂດຍບັນດາເຈົ້າໜ້າທີ່ບັງຄັບໃຊ້ກົດໝາຍ.”
ພວກຍົກຍ້າຍຖິ່ນຖານເປັນພົນລະເມືອງຂອງເມັກຊິໂກ, ກົວເຕມາລາ ແລະໂຄລອມເບຍ. ໂດຍປົກກະຕິແລ້ວ ຄ່າທີ່ພວກຍົກຍ້າຍຖິ່ນຖານ ຫຼື ຄອບຄົວຂອງພວກເຂົາ ຈ່າຍໃຫ້ແກ່ອົງການດັ່ງກ່າວ ແມ່ນ 8,000 ໂດລາ. “ວິທີຕ່າງໆທີ່ນຳໃຊ້ໂດຍອົງການນີ້ ຄືຈະຂົນສົ່ງພວກຍົກຍ້າຍຖິ່ນຖານຢູ່ໃນສະພາບທີ່ຊີວິດຂອງພວກເຂົາຕົກຢູ່ໃນໄພອັນຕະລາຍ, ຂະນະທີ່ພວກເຂົາຈະຖືກຄຸມຕົວຢູ່ໃນພື້ນທີ່ບໍ່ມີປ່ອງລະບາຍອາກາດຢູ່ເລື້ອຍໆ ທີ່ເຮັດໃຫ້ເກີດອາກາດຮ້ອນເກີນໄປ, ແລະພວກເຂົາໄດ້ຂີ່ລົດໄປດ້ວຍຄວາມໄວສູງ ແລະບໍ່ມີອຸປະກອນດ້ານຄວາມປອດໄພແຕ່ຢ່າງໃດເລີຍ” ກະຊວງຍຸຕິທຳ ໄດ້ກ່າວ. ແລະກ່າວຕໍ່ໄປວ່າ “ພວກສະມາຊິກຂອງອົງການນີ້ ໂດຍທົ່ວໄປ ໄດ້ເອີ້ນພວກຍົກຍ້າຍຖິ່ນຖານຄືກັບ ‘ກ່ອງເຄື່ອງ’, ‘ຫໍ່ເຄື່ອງ’ ຫຼື ‘ຊິ້ນສ່ວນ’.”
ນາງພີດຣາ ໄດ້ຍອມຮັບຮູ້ວ່າ ນາງໄດ້ຮັບເງິນຈຳນວນຫຼາຍສົມຄວນຈາກການມີສ່ວນພົວພັນຂອງນາງ ໃນການລັກລອບມະນຸດ ແລະອັນນັ້ນ ນາງໄດ້ເຮັດມາ “ຕະຫຼອດຊີວິດ.”
ນາງພີດຣາ ມີກຳນົດທີ່ຈະຖືກຕັດສິນລົງໂທດໃນເດືອນມີນາ ແລະຈະປະເຊີນກັບໂທດໜັກທີ່ສຸດຂອງການຖືກຕິດຄຸກໄລຍະ 20 ປີ. ນອກຈາກນັ້ນແລ້ວ ນາງຍັງຕ້ອງໄດ້ຖືກຢຶດຊັບສິນສອງແຫ່ງໃນປັດຈຸບັນ ທີ່ກະປະມານໄດ້ວ່າ ມີມູນຄ່າເຖິງ 2,275,000 ແລະ 515,000 ໂດລາ ທີ່ໄດ້ຖືກຊື້ດ້ວຍເງິນທີ່ໄດ້ມາຢ່າງຜິດກົດໝາຍ ໃນການລັກລອບມະນຸດ, ພ້ອມກັນນັ້ນ ເງິນໃນການຕັດສິນໃຫ້ຈ່າຍຫຼາຍກວ່າ 942,000 ໂດລາ.
ກະຊວງຍຸຕິທຳ ຍັງໄດ້ປະກາດການຍອມຮັບຜິດ ຂອງພວກຈຳເລີຍຄົນອື່ນໆອີກສິບຄົນ ຜູ້ທີ່ກ່ອນໜ້ານີ້ ໄດ້ຍອມຮັບຜິດສຳລັບການມີສ່ວນພົວພັນໃນແຜນການລັກລອບມະນຸດ.
ການແຈ້ງຂໍ້ກ່າວຫາ ແລະການຖືກສານຕັດສິນຄວາມຜິດ ເປັນຜົນມາຈາກຄວາມພະຍາຍາມໃນການປະສານງານ ຂອງໜ່ວຍປະຕິບັດງານຮ່ວມ ອາລຟາ, ຫຼື JTFA ທີ່ໄດ້ຖືກສ້າງຕັ້ງຂຶ້ນໃນເດືອນມິຖຸນາ 2021 ໂດຍລັດຖະມົນຕີກະຊວງຍຸຕິທຳ ທ່ານແມຣຣິກ ກາຣແລນ ໃນການຮ່ວມງານກັບກະຊວງຮັກສາຄວາມປອດໄພພາຍໃນ. ມາເຖິງມື້ນີ້ ວຽກງານຂອງ JTFA ໄດ້ສົ່ງຜົນໃຫ້ມີການຈັບກຸມພວກຫົວໜ້າ, ພວກຜູ້ຈັດການ ແລະພວກຜູ້ອຳນວຍຄວາມສະດວກຂອງການລັກລອບມະນຸດທີ່ສຳຄັນທັງຫຼາຍ ທັງຢູ່ພາຍໃນປະເທດ ແລະຢູ່ຕ່າງປະເທດ ກວ່າ 250 ຄົນ.
ສະຫະລັດຈະສືບຕໍ່ນຳເອົາພວກລ່າເຫຍື່ອທັງຫຼາຍເຊັ່ນນັ້ນ ມາຮັບຜິດຕໍ່ກົດໝາຍ.