ບົດບັນນາທິການ ທີ່ສະທ້ອນເຖິງນະໂຍບາຍ ຂອງລັດຖະບານສະຫະລັດ
ການຮຸກຮານຢ່າງເຕັມອັດຕາ ຂອງວລາດີເມຍ ປູຕິນ ຕໍ່ຢູເຄຣນ ໄດ້ເປັນຜົນ ທີ່ສ້າງຄວາມເສຍຫາຍຮ້າຍແຮງ ໃຫ້ແກ່ມະນຸດ ດັ່ງເອກອັກຄະລັດຖະທູດ ຂອງສະຫະລັດ ຮັບຜິດຊອບກ່ຽວກັບເລື້ອງອາຊະຍາກຳສົງຄາມ ທ່ານນາງເບັດ ແວນ ແຊັກ (Beth Van Schaack) ໃຫ້ຂໍ້ສັງເກດ ໃນການຖະແຫຼງຂ່າວເມື່ອໄວໆມານີ້. ທ່ານນາງກ່າວວ່າ “ພວກເຮົາໄດ້ເຫັນພົນລະເຮືອນຫຼາຍຮ້ອຍພັນຄົນຖືກສັງຫານ ປະຊາຊົນຊາວຢູເຄຣນຫຼາຍລ້ານຄົນ ໄດ້ຖືກບັງຄັບ ໃຫ້ຫຼົບໜີຈາກ ເຮືອນຊານບ້ານຊ່ອງຂອງພວກເຂົາເຈົ້າ. ຈຳນວນຫຼວງຫຼາຍໄດ້ກາຍເປັນອົບພະຍົບຢູ່ໃນຕ່າງປະເທດ ແລະຫົວເມືອງປະຫວັດສາດຫຼາຍແຫ່ງໄດ້ຖືກຍິງທຳລາຍໃຫ້ກາຍເປັນເສດຊາຍ.”
ການເຮັດສົງຄາມຮຸກຮານຂອງລັດຖະບານຣັດເຊຍ ຕໍ່ປະເທດເອກກະລາດແມ່ນເປັນການລະເມີດ ຕໍ່ກົດບັດອົງການສະຫະປະຊາຊາດ ຢ່າງຈະແຈ້ງ. ພວກທະຫານຣັດເຊຍ ໄດ້ກໍ່ອາຊະຍາກຳສົງຄາມ ແລະກໍ່ໂທດກຳຕ້ານມະນຸດຊາດ ຮວມທັງອາຊະຍາກຳໃນການສັງຫານຜູ້ຄົນ ຂົ່ມຂືນສຳເລົາ ທໍລະມານ ແລະນອກນັ້ນ ເຈົ້າໜ້າທີ່ຣັດເຊຍ ຍັງໄດ້ເນລະເທດປະຊາຊົນຊາວຢູເຄຣນ ຮວມທັງ ພວກເດັກນ້ອຍ.
ເອກອັກຄະລັດຖະທູດແວນ ແຊັກ ກ່າວວ່າ “ມັນມີຫຼັກຖານຢ່າງຖ້ວມລົ້ນທີ່ວ່າ ໂທດກຳຂະໜາດໃຫຍ່ເຫຼົ່ານີ້ ໄດ້ຖືກກໍ່ຂຶ້ນຢູ່ໃນທຸກໆເຂດຂອງຢູເຄຣນບ່ອນທີ່ທະຫານຣັດເຊຍໄດ້ຖືກສົ່ງເຂົ້າໄປ.”
“ການຊະນະສົງຄາມ ແມ່ນຫຼາຍໄປກວ່າການໄດ້ຮັບໄຊຊະນະ ຢູ່ໃນສະໜາມລົບ ມັນຍັງໝາຍເຖິງການຊະນະໃນການຕໍ່ສູ້ເພື່ອຄວາມຍຸຕິທຳ” ທ່ານນາງໄດ້ປະກາດ. ມັນເປັນເລື້ອງສຳຄັນທີ່ວ່າ ຄວາມຍຸຕິທຳແລະຄວາມຮັບຜິດຊອບຍັງເປັນຈຸດເພັ່ງເລັງຂອງປະຊາຄົມສາກົນ.
ເອກອັກຄະລັດຖະທູດແວນ ແຊັກໄດ້ສັງເກດເຫັນວ່າ ເວລານີ້ ມີເສັ້ນທາງໃນການປະຕິບັດງານຢູ່ 3 ເສັ້ນ ເພື່ອທຳການສືບສວນໃນການກໍ່ອາຊະຍາກຳສົງຄາມແລະການກໍ່ໂທດກຳອື່ນໆຢູ່ໃນຢູເຄຣນ. ເສັ້ນທາງທີນຶ່ງແມ່ນພົວພັນກັບສານຕ່າງໆຢູ່ພາຍໃນປະເທດຂອງຢູເຄຣນເອງ. ອະທິໄອຍະການຂອງຢູເຄຣນ ໄດ້ຈົດບັນທຶກໄວ້ແລ້ວກວ່າ 70,000 ຄະດີ ທີ່ອາດເປັນການກໍ່ອາຊະຍາກຳສົງຄາມ ແລະການກໍ່ໂທດກຳອື່ນໆ. ກຸ່ມໃຫ້ຄຳແນະນຳກ່ຽວກັບການກໍ່ໂທດກຳຕ່າງໆ ຊຶ່ງໄດ້ຖືກສ້າງຕັ້ງຂຶ້ນໂດຍສະຫະລັດ ສະຫະພາບຢູໂຣບ ແລະສະຫະຣາຊະອານາຈັກ ແມ່ນເພື່ອໃຫ້ການສະໜັບສະໜຸນຕໍ່ອະທິໄອຍະການຂອງຢູເຄຣນ ໂດຍການສົ່ງພວກນັກຊ່ຽວຊານໄປຊ່ວຍຈົດບັນທຶກ ເກັບຮັກສາ ແລະວິເຄາະຫຼັກຖານ.
ເສັ້ນທາງທີສອງແມ່ນສານອາຍາສາກົນ ທີ່ເອີ້ນຫຍໍ້ວ່າ ICC. ສານອາຍາສາກົນເຂົ້າມາພົວພັນຍ້ອນວ່າ ລັດຖະບານຢູເຄຣນ ມອບອຳນາດໃນການຕັດສິນຄະດີກ່ຽວກັບການກ່າວຫາໃນການກໍ່ອາຊະຍາກຳຕ່າງໆຢູ່ໃນຢູເຄຣນນັບແຕ່ວັນທີ 20 ກຸມພາປີ 2014 ເປັນຕົ້ນມາ ເວລາຣັດເຊຍເຂົ້າຢຶດເອົາແຫຼມໄຄຣເມຍ.
ໃນທີ່ສຸດ ເອກອັກຄະລັດຖະທູດແວນແຊັກກ່າວວ່າ ສານພາຍໃນປະເທດຕ່າງໆຢູ່ໃນທົ່ວໂລກ ໂດຍສະເພາະແລ້ວໃນທະວີບຢູໂຣບ ແມ່ນເປີດກວ້າງຕໍ່ການສືບສວນໃນການກໍ່ອາຊະຍາກຳສົງຄາມ ແລະອາຊະຍາກຳອື່ນໆຢູ່ໃນຢູເຄຣນ ພາຍໃຕ້ຫຼັກການ ການມອບອຳນາດໃນການຕັດສິນຄະດີສາກົນ ຊຶ່ງອະນຸຍາດໃຫ້ທຳການຕັດສິນໂທດຕໍ່ອາຊະຍາກຳຕ່າງໆ ທີ່ໄດ້ກໍ່ຂຶ້ນຢູ່ນອກປະເທດໄດ້.
ເອກອັກຄະລັດຖະທູດແວນແຊັກ ກ່າວວ່າ “ການເຮັດສົງຄາມຂອງຣັດເຊຍຕໍ່ຢູເຄຣນແມ່ນເປັນບັນຫາອັນເລິກເຊິ່ງທາງດ້ານສິນທຳ ທີ່ປະຊາຄົມນາໆຊາດຈຳເປັນຕ້ອງໄດ້ດີ້ນຮົນຕໍ່ສູ້ນຳ. ມັນເປັນໄປໄດ້ ຖ້າຫາກວ່າພວກເຮົາມີການຮັບເອົາຄວາມຮັບຜິດຊອບຢ່າງເຂັ້ມແຂງ ທີ່ຜົນກະທົບໃນການສະກັດກັ້ນ ຈະມີໃຫຍ່ສຸດ ເພື່ອວ່າພວກຜູ້ນຳຂອງໂລກ ຈະຄິດແລ້ວຄິດອີກ ກ່ອນທີ່ພວກເຂົາຈະເປີດສົງຄາມຮຸກຮານ ໃນວິທີດຽວກັນກັບທີ່ປະທານາທິບໍດີປູຕິນໄດ້ເຮັດມານັ້ນ.”