ໃນວັນທີ 23 ມັງກອນ ລະບອບການປົກຄອງຂອງອີຣ່ານ ໄດ້ແຂວນຄໍ ທ້າວໂມຮາມມັດ ໂກບາດລູ ອາຍຸ 23 ປີ. ລາວເປັນຜູ້ປະທ້ວງຊາວອີຣ່ານ ທີ່ຮູ້ຈັກກັນເປັນຄົນທີເກົ້າ ທີ່ໄດ້ຖືກຈັບກຸມໃນການມີສ່ວນກ່ຽວຂ້ອງກັບການປະທ້ວງຂະໜາດໃຫຍ່ ເພື່ອຕໍ່ຕ້ານລະບອບການປົກຄອງ ໃນປີ 2022, ທີ່ໄດ້ຖືກປະຫານຊີວິດ.
ພວກປະທ້ວງຫຼາຍສິບພັນຄົນ ໄດ້ພາກັນລົງສູ່ຖະໜົນຫົນທາງຫຼາຍສາຍ ເປັນເວລາຫຼາຍເດືອນ ຫຼັງຈາກການເສຍຊີວິດຂອງນາງມາຊາ ອາມີນີ ອາຍຸ 22 ປີ ໃນລະຫວ່າງຖືກຄຸມຂັງໂດຍຕຳຫຼວດ ຜູ້ທີ່ໄດ້ຖືກຄວບຄຸມຕົວໃນຖານບໍ່ໃສ່ຜ້າຄຸມຫົວ ທີ່ເອີ້ນວ່າ ຮີຈາບ ຢ່າງຖືກຕ້ອງ. ພວກປະທ້ວງຢ່າງສັນຕິໄດ້ພົບກັບກຳລັງທີ່ໂຫດຮ້າຍ. ຫ້າຮ້ອຍຄົນໄດ້ຖືກຂ້າຕາຍໂດຍກຳລັງຮັກສາຄວາມປອດໄພ ໃນລະຫວ່າງການປະທ້ວງ; ຫຼາຍພັນຄົນໄດ້ຖືກຈັບກຸມ ແລະ ຈຳນວນຄົນທີ່ບໍ່ຮູ້ຈັກ ຍັງຕິດຄຸກຢູ່.
ທ້າວໂກບາດລູ ຜູ້ທີ່ປາກົດວ່າ ສູ້ຊົນກັບພະຍາດທາງຈິດ ໄດ້ຖືກກ່າວຫາໃນຖານສັງຫານເຈົ້າໜ້າທີ່ຕຳຫຼວດ.
ຫຼັງຈາກການດຳເນີນຄະດີ ທີ່ບັນດານັກຊ່ຽວຊານ ຂອງອົງການສະຫະປະຊາຊາດ, ອົງການນິລະໂທດກຳສາກົນ ແລະບັນດາກຸ່ມສຸດທິອື່ນໆ ໄດ້ກ່າວອ້າງເຖິງຄວາມບໍ່ເປັນທຳຢ່າງໃຫຍ່ຫຼວງ, ລາວໄດ້ຮັບໂທດປະຫານຊີວິດ. ທະນາຍຄວາມຂອງລາວ ກ່າວເຖິງການລົງໂທດນັ້ນວ່າ ໄດ້ຖືກຢັ້ງຢືນໂດຍສານສູງສຸດຂອງອີຣານ; ຫາກແຕ່ວ່າ ທະນາຍຄວາມໄດ້ຮັບການແຈ້ງໃຫ້ຊາບຂອງຄຳຕັດສິນປະຫານຊີວິດທ້າວໂກບາດລູ ພຽງບໍ່ເທົ່າໃດຊົ່ວໂມງ ກ່ອນໜ້າລູກຄວາມຂອງທ່ານ ໄດ້ຖືກສັງຫານ.
ຢູ່ທີ່ກອງປະຊຸມຖະແຫລງຂ່າວ ຮອງໂຄສົກຫຼັກຂອງກະຊວງການຕ່າງປະເທດສະຫະລັດ ທ່ານເວີດານ ປາແທລ ກ່າວປະນາມວ່າ “ການໃຊ້ໂທດປະຊີວິດຂອງລະບອບການປົກຄອງ ເພື່ອລົງໂທດປະຊາຊົນສຳລັບສິ່ງທີ່ພວກເຮົາເຊື່ອ ວ່າ ເປັນພຽງແຕ່ການໃຊ້ສິດທິມະນຸດຂອງພວກເຂົາເຈົ້ານັ້ນ.” ທ່ານໃຫ້ຂໍ້ສັງເກດວ່າ “ມີລາຍງານຢ່າງແຜ່ຫຼາຍຂອງການທໍລະມານ, ການບັງຄັບໃຫ້ສາລະພາບຄວາມຜິດ, ແລະຈຳກັດການໃຫ້ຄຳປຶກສາແນະນຳທາງດ້ານກົດໝາຍ. ທັງໝົດນີ້ ພວກເຮົາເຊື່ອວ່າ ເປັນບ່ອນທຳລາຍຄວາມເຊື່ອຖືໃດໆ ໃນຄຳພິພາກສາທັງ ຫຼາຍທີ່ສານຕ່າງໆຂອງອີຣ່ານ ໄດ້ລົງຄວາມເຫັນອອກມານັ້ນ.”
ນັບຕັ້ງແຕ່ການປາບປາມໂດຍລະບອບການປົກຄອງຂອງອີຣ່ານຕໍ່ການປະທ້ວງໃນທົ່ວປະເທດຢ່າງຮຸນແຮງ ພາຍຫຼັງການເສຍຊີວິດຂອງນາງມາຊາ ອາມີນີ, ສະຫະລັດໄດ້ວາງມາດຕະການລົງໂທດຫຼາຍກວ່າສິບຮອບໃນການຕອບໂຕ້, ທີ່ແນໃສ່ພວກເຈົ້າໜ້າທີ່ຂອງອີຣ່ານ, ລວມທັງພວກສະມາຊິກຂອງກອງກຳລັງພິທັກປະຕິວັດອິສລາມ ແລະກອງກຳລັງບັງຄັບໃຊ້ກົດໝາຍ, ບຸກຄົນອື່ນໆ ແລະເຄືອຂ່າຍສື່ມວນຊົນທີ່ກ່ຽວຂອງໃນການກວດກາຂ່າວ.
“ສະຫະລັດ” ຮອງໂຄສົກຫຼັກ ທ່ານປາແທລ ໄດ້ປະກາດວ່າ “ຈະສືບຕໍ່ເອົາມາດຕະການຕ່າງໆ ເພື່ອສະໜັບສະໜຸນປະຊາຊົນອີຣ່ານ ໃນທາງທີ່ເໝາະສົມ, ທັງເຫັນໄດ້ແລະບໍ່ເຫັນ, ໃນການປະຊານງານຢ່າງໃກ້ຊິດກັບບັນດາພັນທະມິດແລະ ຄູ່ຮ່ວມພາຄີຂອງພວກເຮົາ ໃນຂົງເຂດນຳດ້ວຍ. ຂ້າພະເຈົ້າຈະໃຫ້ຂໍ້ສັງເກດພຽງແຕ່ວ່າ ເມື່ອມັນມາເຖິງຂັ້ນທີ່ຕ້ອງນຳເອົາລະບອບການປົກຄອງ ຂອງອີຣ່ານມາຮັບຜິດຊອບ ສຳລັບກິດຈະກຳທີ່ບໍ່ດີຂອງຕົນລວມທັງການປາບປາມຕໍ່ປະຊາຊົນ ຂອງຕົນເອງ, ພວກເຮົາຈະບໍ່ລັງເລໃຈທີ່ຈະເອົາມາດຕະການເລີຍ.”