ລັດຖະມົນຕີການຕ່າງປະເທດ ທ່ານແອນໂຕນີ ບລິງເກັນ ເມື່ອບໍ່ດົນມານີ້ ໄດ້ມອບລາງວັນ ສິດເສລີພາບ ໃນການນັບຖືສາສະໜາສາກົນ ໃຫ້ແກ່ 7 ຄົນ ແລະກຸ່ມຂອງພະສົງສາສະໜາຄາໂທລິກແລະອໍໂທດອກສ໌ ໃນການຮັບຮູ້ເຖິງຄວາມກ້າຫານ ແລະຄວາມມຸ້ງໝັ້ນເພື່ອສົ່ງເສີມ ແລະປົກປ້ອງສິດເສລີພາບໃນການນັບຖືສາສະໜາຢູ່ທົ່ວໂລກ ຂອງພວກເຂົາເຈົ້າ.
ຜູ້ທີ່ໄດ້ຮັບລາງວັນຄົນທຳອິດ ກໍຄື ທ່ານຟາຣີດ ອາເມດ ຜູ້ທີ່ໄດ້ສືບຕໍ່ເຜີຍແຜ່ຂໍ້ຄວາມຂອງຄວາມຫວັງ ແລະການໃຫ້ອະໄພ ຢູ່ໃນນິວຊີແລນ ແລະທົ່ວໂລກ ຫຼັງຈາກພັນລະຍາຂອງທ່ານ ໄດ້ຖືກຂ້າຕາຍ ໃນປີ 2019 ຢູ່ໃນການໂຈມຕີຕໍ່ວັດອິສລາມ ທີ່ເມືອງ Christchurch.
ຢູ່ໃນ ໄນຈີເຣຍ ທ່ານໂຄລາ ອາລາປິນນີ ເປັນທະນາຍຄວາມເພື່ອສິດທິມະນຸດສາກົນ ຜູ້ທີ່ສະໜອງທາງດ້ານກົດໝາຍແກ່ຈຳເລີຍໃນຫຼາຍໆຄະດີກ່ຽວກັບສິດເສລີພາບໃນການນັບຖືສາສະໜາ ແລະການຟ້ອງຮ້ອງໃນຄວາມຖືກຕ້ອງຂອງກົດໝາຍວ່າດ້ວຍການໝິ່ນປະໝາດສາສະໜາຂອງໄນຈີເຣຍ ຕາມລັດຖະທຳມະນູນ.
ຜູ້ຊະນະລາງວັນອີກຄົນນຶ່ງ ແມ່ນ ທ່ານເມີສາ ດີນນາຢີ ຜູ້ທີ່ປົກປ້ອງສິດທິມະນຸດຂອງຊາວຢາຊີດີ ທີ່ກ້າຫານ ແລະເປັນນັກເຄຶີ່ອນໄຫວເພື່ອສິດເສລີພາບໃນການນັບຖືສາສະໜາ ຜູ້ທີ່ໄດ້ອຸທິດຊີວິດຂອງທ່ານ ເພື່ອຊ່ອຍຊີວິດພວກຜູ້ເຄາະຮ້າຍຈາກການກໍ່ການຮ້າຍ ແລະການຖືກຈຳແນກ, ຍົກຍ້າຍພວກແມ່ຍິງ ແລະເດັກນ້ອຍ ອອກຈາກດິນແດນທີ່ຄວບຄຸມໂດຍກຸ່ມລັດອິສລາມ ຫຼື ISIS ແລະສະໜອງການບຳບັດ ແລະການສະໜັບສະໜຸນໃຫ້ແກ່ພວກທີ່ລອດຊີວິດໂດຍບໍ່ຕ້ອງເສຍເງິນ.
ທ່ານປີເຕີ ເຈກອບ ເປັນນັກຕໍ່ສູ້ເພື່ອສິດເສລີພາບໃນການນັບຖືສາສະໜາ ແລະສິດທິມະນຸດ ຜູ້ທີ່ບໍ່ເຄີຍອິດເມື່ອຍເລີຍ ແລະໄດ້ໃຊ້ເວລາຫຼາຍກວ່າ 35 ປີ ໃນການລົນນະລົງເພື່ອສິດທິຂອງຊຸມຊົນກຸ່ມນ້ອຍ ທີ່ໄດ້ຖືກກົດຂີ່ທາງສາສະໜາ ໃນປາກິສຖານ.
ນັບຕັ້ງແຕ່ປີ 2019 ເປັນຕົ້ນມາ ທ່ານນາງມາຣຕາ ປາທຣິເຊຍ ໂມລີນາ ມອນຕີເນໂກຣ ໄດ້ບັນທຶກການປາບປາມສາສະໜາກາໂທລິກ ແລະປະຊາຄົມສາສະໜາຕ່າງໆຂອງລັດຖະບານ ນິກາຣາກົວ. ເນື່ອງຈາກຄວາມຍ້ານຖືກຄຸມຂັງ ຫຼັງຈາກໄດ້ຖືກຕຳຫຼວດກົດຂີ່ຂົ່ມເຫັງ ມາໄດ້ຫຼາຍເດືອນ ທ່ານນາງໂມລີນາ ກໍໄດ້ຫລົບໜີອອກຈາກນິກາຣາກົວ ໃນເດືອນມິຖຸນາ ປີ 2021. ນັບຕັ້ງແຕ່ປີ 2022 ມາ ບົດລາຍງານຂອງທ່ານນາງໂມລີນາ ໄດ້ເພັ່ງເລັງໃສ່ເລື້ອງຂອງການບັນທຶກ ການກົດຂີ່ຂົ່ມເຫັງຂອງຕຳຫຼວດ ແລະການລະເມີດຕໍ່ສິດເສລີພາບໃນການນັບຖືສາສະໜາ ທີ່ນຳພາໂດຍລັດຖະບານ, ໂດຍສະເພາະຕໍ່ພະສົງຄາໂທລິກ ຢູ່ໃນນິ ກາຣາກົວ.
ກຳເນີດຢູ່ໃນຄອບຄົວຂອງບັນດາຜູ້ລອດຊີວິດຈາກຮໍໂລຄອສ ທ່ານນາງ ທາລີ ເນັຕສ໌ ຈາກອາຟຣິກາໃຕ້ ຜູ້ເລົ່າເລື້ອງສ່ວນຕົວຂອງທ່ານນາງທີ່ເປັນຜູ້ກໍ່ຕັ້ງ ແລະອຳນວຍການສູນກາງ ດ້ານຮໍໂລຄອສ ແລະການຂ້າລ້າງເຊື່ອຊາດເຜົ່າພັນ ໂຈຮານເນັສເບີກ ເພື່ອຊ່ອຍໃນການປົກປ້ອງຊາວອາຟຣິກາໃຕ້ ໂດຍສະເພາະຊາວໜຸ່ມ ຈາກການຖືກເອີ້ນດ້ວຍຄຳເວົ້າທີ່ດູຖູກດູໝິ່ນໃຫ້ດ້ອຍຄ່າຂອງຄວາມເປັນມະນຸດຕໍ່ກຸ່ມພວກທີ່ດ້ອຍໂອກາດ.
ທ່ານນາງລາດອນ ເຕທົງ ເປັນຄູ່ຮ່ວມກໍ່ຕັ້ງ ແລະອຳນວຍການສະຖາບັນປະຕິ ບັດງານເພື່ອທິເບດ. ທ່ານນາງນຳພາທີມງານບັນດານັກລົນນະລົງ ດ້ານສິດທິມະນຸດ ໃນການພັດທະນາແລະສົ່ງເສີມເທັກໂນໂລຈີຊອບແວຣດ້ານການສື່ສານຕ່າງໆ, ຍຸດທະສາດການບໍ່ໃຊ້ຄວາມຮຸນແຮງ, ແລະໂຄງການຝຶກອົບຮົມໃນດ້ານນະວັດຕະກຳໃໝ່ໃຫ້ແກ່ຊາວທິເບດ ແລະບັນດາສະມາຊິກຂອງກຸ່ມອື່ນໆ ທີ່ປະເຊີນກັບການປາບປາມໂດຍສາທາລະນະລັດປະຊາຊາຊົນຈີນ.
ພາຍໃຕ້ການກົດດັນຈາກມົສກູ ກຸ່ມພະສົງຫ້າອົງ ແລະແມ່ຊີສອງຄົນ ຈາກໂບດອໍໂທດອກສ໌ທີ່ສະໜັບສະໜຸນມົສກູ ຢູ່ໃນລີທົວເນຍ ໄດ້ປະນາມສົງຄາມຂອງຣັດເຊຍຕໍ່ຢູເຄຣນ ແລະໄດ້ຖືກຈັບໃຫ້ສິກ. ພະສົງສອງອົງຈາກໂບດອໍໂທດອກສ໌ ທີ່ສະໜັບສະໜຸນມົສກູຂອງເບລາຣຸສ ກໍໄດ້ປະນາມສົງຄາມຂອງຣັດເຊຍຕໍ່ຢູເຄຣນ ເຊັ່ນດຽວກັນ ແລະໄດ້ພາກັນຫລົບໜີໄປລີທົວເນຍ. ພວກເພິ່ນສ້າງຊຸມຊົນສາສະໜາຂຶ້ນໃໝ່ໃນລີທົວເນຍ ທີ່ໄດ້ຕ້ອນຮັບພວກຜູ້ໜັບຖືສາສະໜາອໍໂທດອກສ໌ ທີ່ສະແຫວງຫາສະຖານທີ່ນົບໄຫວ້ຢ່າງເສລີ ໂດຍປາດສະຈາກອິດທິພົນຂອງມົສກູ.
ສະຫະລັດ ຍົກຍ້ອງຊົມເຊີຍບັນດານັກລົນນະລົງທີ່ບໍ່ເຄີຍອິດເມື່ອຍທັງຫຼາຍເຫຼົ່ານີ້ ສຳລັບເສລີພາບໃນການນັບຖືສາສະໜາ - ອັນເປັນສິດທິມະນຸດຂັ້ນພື້ນຖານ ຊຶ່ງໝົດທຸກຄົນມີສິດໄດ້ຮັບ.