ບົດບັນນາທິການ ທີ່ສະທ້ອນເຖິງນະໂຍບາຍ ຂອງລັດຖະບານສະຫະລັດ
ການກໍ່ການຮ້າຍຍັງສືບຕໍ່ໄປໄພຂົ່ມຂູ່ ຕໍ່ຊີວິດ ແລະອາຊີບວຽກງານ ໃນຈຳນວນທີ່ນັບບໍ່ຖ້ວນ ໃນທົ່ວທະວີບອາຟຣິກາ. ທີ່ຈິງ ໃນເດືອນແລ້ວນີ້ ກຸ່ມກໍ່ການຮ້າຍອາລ-ຊາບາບ ໄດ້ທຳການປິດລ້ອມໂຮງແຮມໄຮແຢັດ ຢູ່ທີ່ນະຄອນຫຼວງໂມກາດິສຊູ ປະເທດໂຊມາເລຍ ໃນການໂຈມຕີທີ່ໄດ້ສັງຫານ 30 ຄົນແລະອີກ 117 ຄົນບາດເຈັບ.
ສະຫະລັດຍັງສືບຕໍ່ໃຫ້ການຊ່ວຍເຫຼືອແກ່ຄູ່ຮ່ວມງານຂອງຕົນໃນອາຟຣິກາເພື່ອເສີມສ້າງຄວາມສາມາດແບບຍືນຍົງ ມີຄວາມເປັນມືອາຊີບ ແລະກອງທັບທີ່ມີຄວາມຮັບຜິດຊອບ ແລະອົງການຮັກສາຄວາມໝັ້ນຄົງຂອງພົນລະເຮືອນ ເພື່ອປ້ອງກັນ ແລະຮັບມືກັບໄພຂົ່ມຂູ່ຂອງພວກກໍ່ການຮ້າຍ ນັ້ນຄືຄຳເວົ້າຂອງເອກອັກຄະລັດຖະທູດ ແຈັຟຟຣີ ດີລໍເຣັນຕິສ ຊຶ່ງເປັນທີ່ປຶກສາອະວຸໂສພິເສດກ່ຽວກັບກິດຈະການທາງດ້ານການເມືອງ ທີ່ອົງການສະຫະປະຊາຊາດ. ທ່ານໄດ້ສະແດງຄວາມຊົມເຊີຍ “ໃນການຮ່ວມມືເພີ້ມຂຶ້ນກັບໂຊມາເລຍ ການປະຕິບັດງານຂອງສະຫະພາບອາຟຣິກາໃນໂຊມາເລຍ ແລະການປະກອບສ່ວນທາງດ້ານທະຫານ ແລະບັນດາສະມາຊິກຂອງສະພາຄວາມໝັ້ນຄົງ ເພື່ອຮັບມືໃຫ້ດີຕື່ມຂຶ້ນຕໍ່ການຂົ່ມຂູ່ຂອງກຸ່ມອາລ-ຊາບາບ ແລະຊຸກຍູ້ໃຫ້ໂຊມາເລຍຮັບເອົາຄວາມຮັບຜິດຊອບຫຼາຍຂຶ້ນ ໃນການຮັກສາຄວາມປອດໄພຂອງຕົນ.”
ໃນຂະນະດຽວກັນ ໃນທົ່ວທະວີບອາຟຣິກາ ກຸ່ມລັດອິສລາມ ແລະກຸ່ມອາລກາອີດາ ຍັງສືບຕໍ່ສວຍໃຊ້ບັນຫາຂັດແຍ້ງ ການປົກຄອງທີ່ລົ້ມແຫຼວ ຄວາມວຸ້ນວາຍທາງດ້ານການເມືອງ ຄວາມບໍ່ສະເໝີພາບ ທາງດ້ານສັງຄົມເສດຖະກິດ ແລະຄວາມບໍ່ພໍໃຈ ໃນການຊັກຊວນເອົາບໍລິວານພັກພວກ ຕະຫຼອດທັງ ການຍຸຍົງແລະການຈັດຕັ້ງການໂຈມຕີກໍ່ການຮ້າຍ ນັ້ນຄືການໃຫ້ຂໍ້ສັງເກດ ຂອງເອກອັກຄະລັດຖະທູດດີລໍເຣັນຕິສ. ທ່ານໄດ້ຮຽກຮ້ອງໃຫ້ປະຊາຄົມນາໆ “ເພີ້ມການດຳເນີນຄວາມພະຍາຍາມທີ່ຕົກຢູ່ໃນຄວາມຫຼໍ່ແຫຼມ ຈົ່ງພາກັນປະຕິເສດຕໍ່ການຮ້ອງ ຂໍຂອງກຸ່ມຫົວຮຸນແຮງຈັດ.” ທີ່ຈິງ ລາຍງານຂອງສະຫະປະຊາຊາດ ເມື່ອໄວໆມານີ້ໄດ້ເຕືອນວ່າ “ໄພຂົ່ມຂູ່ນີ້ ແມ່ນກວມເອົາຂົງເຂດຕ່າງໆຂອງທະວີບອາຟຣິກາ. ເຄືອຂ່າຍຂອງກຸ່ມລັດອິສລາມ ແລະອາລກາອີດາ ຍັງສືບຕໍ່ສວຍໃຊ້ບັນຫາຂັດແຍ້ງຕ່າງໆໃນອາຟຣິກາ ແລະຄວາມບໍ່ພໍໃຈ ເສີມຂະຫຍາຍກິດຈະກຳທີ່ຜິດກົດໝາຍຂອງພວກເຂົາ ໂດຍເຮັດໃຫ້ກິດຈະກຳເຫຼົ່ານີ້ມີຄວາມຮ້າຍແຮງສູງຂຶ້ນ.”
ນອກນັ້ນ ກຸ່ມກໍ່ການຮ້າຍຍັງເລີ້ມນຳໃຊ້ເທັກໂນໂລຈີໃໝ່ ແລະພວມປາກົດໂຕອອກມາ ຮວມທັງລະບົບຍານບໍ່ມີຄົນຂັບ. ກຸ່ມກໍ່ການຮ້າຍຍັງພາກັນສວຍໃຊ້ໃນ
ການໂຈມຕີ ທຳການສືບລັບ ແລະການໂຄສະນາຊວນເຊື່ອ.
ສະຫະລັດມີຄວາມໝັ້ນໝາຍທີ່ຈະສືບຕໍ່ເສີມສ້າງຄວາມສາມາດຂອງລະບົບຍານບໍ່ມີຄົນຂັບເພື່ອຕໍ່ຕ້ານການກໍ່ການຮ້າຍແລະຫຼິງເຫັນຄຸ່ນຄ່າໃນການອຸທິດຕົນຂອງເຄັນຢາໃນການປະຕິບັດງານດັ່ງກ່າວ. ພວກກໍ່ການຮ້າຍໄດ້ນຳໃຊ້ລະບົບຍານບໍ່ມີຄົນຂັບຫຼາຍຂຶ້ນ ແລະນຳໃຊ້ລະບົບເທັກໂນໂລຈີທີ່ໃຊ້ຫຼາຍດ້ານ ເພື່ອຂົ່ມຂູ່ຕໍ່ເປົ້າໝາຍທີ່ບໍ່ມີການຮັກສາການຢ່າງເຂັ້ມງວດ ແລະສະຫະລັດຫວັງວ່າຈະສືບຕໍ່ມີການຮ່ວມມືກັນກັບເຄັນຢາກ່ຽວກັບຄວາມພະຍາຍາມເຫຼົ່ານີ້.
ປະຊາຄົມນາໆຊາດຕ້ອງສືບຕໍ່ມີຄວາມສາມັກຄີກັນ ໃນຄວາມໝັ້ນໝາຍເພື່ອກຳຈັດບັນດາກຸ່ມກໍ່ການຮ້າຍຕ່າງໆ ເຊັ່ນກຸ່ມລັດອິສລາມ ກຸ່ມອາລກາອີດາແລະກຸ່ມອາລ-ຊາບາບ ໃນຂະນະທີ່ພວກເຂົາທຳການຂົມຂູ່ຕໍ່ສັນຕິພາບແລະຄວາມໝັ້ນຄົງຢູ່ໃນຫຼາຍໆແຫ່ງຂອງອາຟຣິກາ ແລະໄກອອກໄປກວ່ານັ້ນ.