ຄວາມໝາຍທີ່ງ່າຍທີ່ສຸດຂອງຄຳວ່າ ສໍ້ໂກງ ຫຼື ສໍ້ລາດບັງຫຼວງ ແມ່ນການລະເມີດຂອງອຳນາດທີ່ໄດ້ຖືກມອບໝາຍ ເຮັດໃຫ້ເປັນບ່ອນທຳລາຍ ສະຖຽນລະພາບ, ຄວາມໝັ້ນຄົງ ແລະວຽກງານຂອງສັງຄົມທັງຫຼາຍ. ເພື່ອຊ່ອຍແກ້ໄຂຄວາມເສຍຫາຍອັນນີ້, ໃນປີ 2003 ອົງການສະຫະປະຊາຊາດ ໄດ້ຮັບຮອງເອົາອະນຸສັນຍາວ່າດ້ວຍການຕໍ່ຕ້ານການສໍ້ໂກງຂອງຕົນ ທີ່ມາຈາກສົນທິສັນຍາລະຫວ່າງປະເທດໃນການຕໍ່ຕ້ານການສໍ້ໂກງທີ່ໄດ້ລົງນາມຮັບຮອງເອົາໂດຍ 187 ປະເທດ.
ໃນວີດີໂອສົ່ງສານເປີດກອງປະຊຸມຂອງອະນຸສັນຍາວ່າດ້ວຍການຕໍ່ຕ້ານການສໍ້ໂກງຂອງສະຫະປະຊາຊາດ ຄັ້ງທີ 10, ລັດຖະມົນຕີການຕີການຕ່າງປະເທດສະຫະລັດ ແອນໂຕນີ ບລິງເກັນ ໄດ້ກ່າວວ່າ ການສໍ້ໂກງເປັນໄພຂົ່ມຂູໃນການຕໍ່ສູ້ເພື່ອການປົກຄອງທີ່ດີ, ທີ່ມີຄວາມຮັບຜິດຊອບ ແລະທີ່ໂປ່ງໄສ ຊຶ່ງເປັນ “ຄວາມສຳຄັນຢ່າງຍິ່ງຕໍ່ຄວາມໝັ້ນຄົງແຫ່ງຊາດຂອງພວກເຮົາ ແລະການມອບຜົນສຳເລັດແກ່ພົນລະເມືອງຂອງພວກເຮົາ.”
ທ່ານເວົ້າວ່າ “ການສໍ້ໂກງທະວີຄວາມບໍ່ເທົ່າທຽມກັນ ແລະສ້າງຄວາມແຕກແຍກທາງດ້ານການເມືອງ. ການສໍ້ໂກງເປັນບ່ອນທຳລາຍ ການຮັບມືກັບວິກິດການຕ່າງໆຂອງພວກເຮົາ ຈາກໂຣກລະບາດ ຈົນເຖິງໄພພິບັດທຳມະຊາດຕ່າງໆ. ເງິນທຸກໂດລາທີ່ໄດ້ຖືກລັກໄປ ແມ່ນເງິນໂດລາ ທີ່ພວກເຮົາບໍ່ສາມາດລົງທຶນໃສ່ໃນໂຮງຮຽນ ຫຼື ໂຮງໝໍທັງຫຼາຍຂອງພວກເຮົາ, ໃນບັນດາທຸລະກິດຂອງພວກເຮົາ ຫຼື ສະຫວັດດີສັງຄົມຂອງພວກເຮົາ.”
ທ່ານກ່າວຕໍ່ໄປວ່າ “ການສໍ້ໂກງທຳລາຍຄວາມເຊື່ອຖືຂອງພົນລະເມືອງ ໃນລັດຖະບານ ແລະຄວາມເຊື່ອໝັ້ນຊຶ່ງກັນແລະກັນ, ສ້າງຄວາມແຕກແຍກທາງດ້ານການເມືອງຂອງພວກເຮົາ, ແບ່ງແຍກຊຸມຊົນຕ່າງໆຂອງພວກເຮົາ, ທະວີອາຊະຍາກຳ ແລະບັນຫາຂັດແຍ້ງ. ແລະການສໍ້ໂກງສາມາດຖືກນຳໃຊ້ເປັນອາວຸດໂດຍປະເທດຕ່າງໆ ແລະພວກຄົນຕ່າງໆທີ່ຫາທາງປອງຮ້າຍຕໍ່ຄວາມໝັ້ນຄົງຂອງພວກເຮົາ, ຕໍ່ເສດຖະກິດຂອງພວກເຮົາ, ຕໍ່ລະບົບການເມືອງຂອງພວກເຮົາ.”
“ພວກເຮົາຮູ້ວ່າ ການສໍ້ໂກງມີຜົນທີ່ຕິດຕາມມາຢ່າງຮ້າຍແຮງທີ່ສຸດສຳລັບພວກທີ່ອ່ອນແອທີ່ສຸດ ເຊັ່ນວ່າ: ພວກຄົນຜູ້ທີ່ຕ້ອງການການຊ່ອຍເຫຼືອແລະການສະໜັບສະໜຸນຫຼາຍທີ່ສຸດ, ແຕ່ຜູ້ຄົນສ່ວນໃຫຍ່ຮູ້ສຶກວ່າ ບໍ່ວ່າພວກເຂົາເຮັດວຽກໜັກຫຼາຍຊ່ຳໃດກໍຕາມ, ລະບົບນີ້ ຖືກຈັດຕັ້ງຂຶ້ນເພື່ອຕ້ານຢັນພວກເຂົາເຈົ້າ” ທ່ານເອກອັກຄະລັດຖະທູດສະຫະລັດ ປະຈຳອົງການສະຫະປະຊາຊາດ ລິນດາ ທອມມັສ-ກຣີນຟີລ ໄດ້ກ່າວ. ທ່ານນາງກ່າວຕໍ່ໄປວ່າ “ອັນນີ້ເປັນນຶ່ງໃນຫຼາຍໆເຫດຜົນທີ່ສະຫະລັດ ໄດ້ເຮັດໃຫ້ ການຕໍ່ຕ້ານການສໍ້ໂກງ ເປັນຈຸດສູນກາງຂອງນະໂຍບາຍການຕ່າງປະເທດຂອງພວກເຮົາ.”
ນະໂຍບາຍດັ່ງກ່າວນັ້ນ ຕັ້ງຢູ່ເທິງສີ່ເສົາຫຼັກ. ເສົາທີນຶ່ງ, ທ່ານນາງທອມມັສ-ກຣີນຟີລ ໄດ້ກ່າວວ່າ “ປະທານາທິບໍດີ ໄບເດັນ ໄດ້ອອກການປະກາດຂອງປະທານາທິບໍດີ ທີ່ຈະຂະຫຍາຍອຳນາດຂອງລັດຖະມົນຕີການຕ່າງປະເທດ ບລິງເກັນ ເພື່ອຈຳກັດການເຂົ້າມາໃນສະຫະລັດ ສຳລັບຈຳພວກຜູ້ທີ່ເຮັດໃຫ້ມີການສໍ້ໂກງ.”
ທ່ານນາງເວົ້າວ່າ “ເສົາທີສອງ...ສະຫະລັດສະໜອງທຶນ 252 ລ້ານໂດລາໃນການຊ່ອຍເຫຼືອແກ່ຕ່າງປະເທດ ເພື່ອຕໍ່ຕ້ານການສໍ້ໂກງ...ເສົາທີສາມ, ສະຫະລັດຈະສືບຕໍ່ສົ່ງເສີມດ້ານການເງິນທີ່ໂປ່ງໄສ ແລະຄວາມຊື່ສັດ, ໂດຍສະເພາະຢູ່ໃນພາກສ່ວນຕ່າງໆທີ່ມີຄວາມສ່ຽງສູງຕໍ່ການສໍ້ໂກງ.”
“ສຸດທ້າຍນີ້ ລັດຖະບານຂອງພວກເຮົາ ກຳລັງສ້າງຊຸດຂອງຂໍ້ສະເໜີທາງດ້ານນິຕິກຳທີ່ຈະເສີມກຳລັງໃຫ້ແກ່ເຈົ້າໜ້າທີ່ປະຕິບັດກົດໝາຍ ແລະອຳນາດທາງດ້ານວີຊາເພື່ອການຕາມຫາກໍລະນີການຕໍ່ຕ້ານການສໍ້ໂກງຕ່າງໆ” ທ່ານນາງທອມມັສ-ກຣີນຟີລ ກ່າວ.
ທ່ານນາງກ່າວຕໍ່ໄປອີກວ່າ “ໃນຂະນະທີ່ການສໍ້ໂກງເປັນໂຣກມະເຮັງ, ມັນຍັງເປັນໂຣກມະເຮັງທີ່ສາມາດປົວໄດ້. ອະນຸສັນຍາຕໍ່ຕ້ານການສໍ້ໂກງ ໄດ້ໃຫ້ໂຄງຮ່າງການທຳງານແກ່ພວກເຮົາ ທີ່ພວກເຮົາຕ້ອງການເພື່ອຮັບມືກັບໄພຄຸກຄາມແຫ່ງຊາດ ແລະຂ້າມຊາດນີ້.....ມັນຂຶ້ນຢູ່ກັບພວກເຮົາທີ່ຈະເຮັດໃຫ້ 20 ປີຂ້າງໜ້າເປັນທຳ, ມີຄວາມຮັບຜິດຊອບ ແລະໂປ່ງໄສ ຫຼາຍຂຶ້ນ. ແລະໂດຍການເຮັດເຊັ່ນນັ້ນ ພວກເຮົາສາມາດສົ່ງເສີມຄວາມຈະເລີນຮຸ່ງເຮືອງ, ກຽດສັກສີ, ສິດທິມະນຸດຂອງປະຊາຊົນໝົດທຸກຄົນ. ແລະພວກເຮົາສາມາດສົ່ງເສີມສັນຕິພາບ ແລະຄວາມໝັ້ນຄົງຢູ່ໃນທົ່ວໂລກ.”