ຢູ່ທີ່ກອງປະຊຸມຖະແຫລງຂ່າວ ໃນລະຫວ່າງການເດີນທາງຢ້ຽມຢາມນະຄອນ ຫຼວງໄຄໂຣ ຄັ້ງຫຼ້າສຸດຂອງທ່ານ ທ່ານລັດຖະມົນຕີການຕ່າງປະເທດ ແອນໂຕນີ ບລິງເກັນ ໄດ້ກ່າວວ່າ ເຖິງແມ່ນວ່າ ເປັນວຽກງານທີ່ຍາກລຳບາກ, ປະເທດຢູ່ໃນຂົງເຂດທັງຫຼາຍ ແລະຄູ່ຮ່ວມງານຂອງສະຫະລັດ ໃນໂລກຂອງອາຣັບແມ່ນໝັ້ນໝາຍທີ່ຈະຫາທາງແກ້ໄຂຕໍ່ວິກິດການໃນກາຊາ ທີ່ຈະເລີ້ມຕົ້ນພູມິພາກ “ໃນເສັ້ນທາງສູ່ສັນຕິພາບໄລຍະຍາວນານ ແລະສະຖຽນລະພາບທີ່ແທ້ຈິງ.”
ທ່ານບລິງເກັນ ເວົ້າວ່າ “ເສັ້ນທາງອັນນັ້ນ ແມ່ນແຈ່ມແຈ້ງຢູ່ທີ່ນັ້ນ, ມັນເປັນໄປໄດ້ ແລະພວກເຮົາສາມາດເຫັນໄດ້. ມີວິທີທາງທີ່ນຳເອົາຄວາມຕ້ອງການ ແລະຄວາມປາຖະໜາຂອງອິສຣາແອລ ສຳລັບການເຊື່ອມໂຍງເຂົ້າກັນໃນພາກພື້ນ ແລະຄວາມໝັ້ນຄົງຢ່າງແທ້ຈິງນຳ ພ້ອມກັບຄວາມປາຖະໜາຂອງຊາວປາແລັສໄຕນ໌ ສຳລັບການມີປະເທດຂອງພວກເຂົາເຈົ້າເອງ.”
ທ່ານບລິງເກັນກ່າວອີກວ່າ “ທັງສອງຢ່າງເຫຼົ່ານັ້ນແມ່ນຕິດພັນກັນ. ການເຊື່ອມໂຍງເຂົ້າກັນຂອງອິສຣາແອລ, ຄວາມໝັ້ນຄົງຂອງຕົນ, ວິທີທາງສູ່ການມີປະເທດຂອງປາແລັສໄຕນ໌-ທີ່ເປັນຫຼັກສູດ ແລະມັນຕ້ອງໄດ້ເຮັດບົນພື້ນຖານຂອງພາກພື້ນ ພ້ອມກັບຄວາມໝັ້ນໝາຍຂອງພາກພື້ນນຳດ້ວຍ ຊຶ່ງທັງໝົດນີ້ ຂ້າພະເຈົ້າເຊື່ອວ່າ ປະເທດຕ່າງໆແມ່ນພ້ອມແລ້ວທີ່ຈະເຮັດ.”
ທ່ານບລິງເກັນເວົ້າວ່າ “ຈາກທັດສະນະຂອງອິສຣາແອລ ຖ້າເຈົ້າສາມາດມີອະ ນາຄົດ ບ່ອນທີ່ພວກເຂົ້າເຈົ້າຖືກເຊື່ອມໂຍງເຂົ້າໃນພາກພື້ນ, ມີຄວາມສຳພັນແບບປົກກະຕິກັບປະເທດອື່ນໆ ບ່ອນທີ່ພວກເຂົາເຈົ້າມີການຮັບປະກັນທີ່ຈຳເປັນ, ມີຄຳໝັ້ນໝາຍ, ການຄ້ຳປະກັນຄວາມໝັ້ນຄົງໃຫ້ແກ່ພວກເຂົາເຈົ້າ-ອັນນັ້ນເປັນວິທີທາງທີ່ໜ້າເພິ່ງພໍໃຈ. ແຕ່ມັນຍັງເປັນທີ່ຈະແຈ້ງວ່າ ອັນນັ້ນ ຕ້ອງເປັນວິທາງສູ່ການມີປະເທດຂອງປາແລັສໄຕນ໌. ພວກເຮົາໄດ້ຍິນອັນນັ້ນ ຈາກແຕ່ລະປະເທດຢູ່ໃນພາກພື້ນທັງໝົດ.”
ທ່ານລັດຖະມົນຕີບລິງເກັນ ກ່າວວ່າ “ບໍ່ມີອັນໃດເລີຍທີ່ງ່າຍ, ຖ້າຈະເວົ້າ, ຫຼັງຈາກຜ່ານມາໄດ້ຫຼາຍປີແລ້ວ. ບໍ່ມີອັນໃດເລີຍຈະເກີດຂຶ້ນໄດ້ໃນຄືນດຽວ.” ທ່ານກ່າວຕໍ່ໄປວ່າ “ແຕ່ມີຄວາມເຕັມໃຈຫຼາຍຂຶ້ນໃນເວລານີ້ຂອງປະເທດທັງຫຼາຍ ທີ່ຈະຕັດສິນໃຈອັນຍາກລຳບາກນີ້ ແລະເຮັດສິ່ງທີ່ຈຳເປັນເພື່ອຈະກ້າວໄປໜ້າຕາມວິທີທາງນັ້ນ. ແລະຂ້າພະເຈົ້າຄິດວ່າ ທ່ານສາມາດເຫັນສອງທາງເລືອກທີ່ແຕກຕ່າງກັນຫຼາຍ ສຳລັບຂົງເຂດແຫ່ງນີ້.”
ທ່ານເວົ້າວ່າ “ອັນທີນຶ່ງ ເປັນທາງເລືອກບ່ອນທີ່ທ່ານມີການເຊື່ອມໂຍງເຂົ້າກັນໃນພາກພື້ນກັບອິສຣາແອລ-ເຊື່ອມໂຍງເຂົ້າກັນ-ດ້ວຍການຮັບປະກັນຄວາມໝັ້ນຄົງ ແລະຄວາມໝັ້ນໝາຍຈາກບັນດາປະເທດຢູ່ໃນພາກພື້ນທັງຫຼາຍ, ແລະພ້ອມທັງຈາກສະຫະລັດນຳດ້ວຍ-ແລະການມີປະເທດຂອງປາແລັສໄຕນ໌. ວິທີທາງອີກອັນນຶ່ງ ແມ່ນສືບຕໍ່ເຫັນການກໍ່ການຮ້າຍ, ການທຳລາຍລ້າງ, ການທຳລາຍໂດຍກຸ່ມຮາມາສ, ໂດຍກຸ່ມຮູຕີ, ໂດຍກຸ່ມເຮັສໂບລາ-ທັງໝົດໄດ້ຮັບການໜຸນຫຼັງໂດຍອີຣ່ານ.”
ທ່ານລັດຖະມົນຕີ ບລິງກັນ ກ່າວອີກວ່າ “ຖ້າທ່ານສະແຫວງຫາວິທີທາງອັນທຳອິດ, ຖ້າທ່ານສ້າງການເຊື່ອມໂຍງເຂົ້າກັນນັ້ນ, ຖ້າທ່ານນຳເອົາອິສຣາແອລເຂົ້ານຳ, ຖ້າທ່ານໃຫ້ຄວາມໝັ້ນໝາຍທີ່ຈຳເປັນ ຕໍ່ຄວາມໝັ້ນຄົງ, ແລະທ່ານເຄື່ອນວິທີທາງຕໍ່ການມີປະເທດຂອງປາແລັສໄຕນ໌ລົງມາ, ກໍຈະມີວິທີທາງເພື່ອກ້າວໄປໜ້າ ແລະມັນເປັນອັນນຶ່ງທີ່ພວກເຮົາມີເຈດຕະນາທີ່ຈະສະແຫວງຫາຢ່າງເຕັມສ່ວນ ດ້ວຍທາງການທູດຂອງອາເມຣິກາ ໃນຫຼາຍອາທິດແລະຫຼາຍເດືອນຕໍ່ໜ້າ.”