ບົດບັນນາທິການ ທີ່ສະທ້ອນເຖິງນະໂຍບາຍ ຂອງລັດຖະບານສະຫະລັດ
ນັບແຕ່ໄດ້ມີການເຮັດລັດຖະປະຫານຂອງພວກທະຫານໃນມຽນມາເມື່ອ 2 ປີກ່ອນ ແລະການປາບປາມຂອງອຳນາດການປົກຄອງຕໍ່ພວກທີ່ຄັດຄ້ານ ເຮັດໃຫ້ປະຊາຊົນໄດ້ຮັບຄວາມເສຍຫາຍຮ້າຍແຮງ ຄືມີຫຼາຍກວ່າ 3,000 ຄົນແລ້ວຖືກຂ້າຕາຍ ເກືອບ 17,000 ຄົນຖືກຈັບ ແລະຫຼາຍກວ່າ 1 ລ້ານ 3 ແສນຄົນຕ້ອງໄດ້ອົບພະຍົບຫຼົບໜີ.
ແຕ່ເຖິງແມ່ນມີການປະເຊີນໜ້າກັບຫຼັກຖານແຫ່ງຄວາມໂຫດຮ້າຍປ່າເຖື່ອນຂອງອຳນາດການປົກຄອງ ການໂຈມຕີທາງອາກາດທີ່ໄດ້ທຳລາຍບ້ານໆນຶ່ງໃນເຂດຊາແກັງເມື່ອວັນທີ 11 ເມສາຜ່ານມາ ແມ່ນໄດ້ສະແດງໃຫ້ເຫັນເຖິງຄວາມໂຫດຫ້ຽມແລະອຳມະຫິດຂອງພວກເຂົາ.
ໃນຂະນະທີ່ປະຊາຊົນຫຼາຍຮ້ອຍຄົນ ຮວມທັງແມ່ຍິງແລະເດັກນ້ອຍ ພວມເຕົ້າໂຮມກັນເພື່ອສະຫຼອງການເປີດອາຄານທີ່ສ້າງຂຶ້ນໂດຍກຸ່ມນິຍົມປະຊາທິປະໄຕ ອຳນາດການປົກຄອງມີລາຍງານວ່າ ໄດ້ຖິ້ມລະເບີດຫຼາຍໆລູກລົງໃສ່ພວກຊາວບ້ານ. ຫຼັງຈາກນັ້ນ ກໍສົ່ງເຮືອບິນເຮລີຄອບເຕີ້ທຳການໂຈມຕີຂະນະທີ່ປະຊາຊົນພະຍາຍາມຫຼົບໜີ. ເຖິງແມ່ນໂຕເລກການເສຍຊີວິດຂອງເຈົ້າໜ້າຍັງບໍ່ທັນເປັນທີ່ຈະແຈ້ງກໍຕາມ ແຕ່ກໍມີການຄາດຄະເນກັນວ່າ ມີຫຼາຍກວ່າ 100 ຄົນເສຍຊີວິດ ຫຼາຍໆຄົນໃນນັ້ນແມ່ນເປັນເດັກນ້ອຍ.
ພວກນັກສັງເກດການໃຫ້ຂໍ້ສັງເກດວ່າ ອຳນາດການປົກຄອງໄດ້ໃຊ້ການໂຈມຕີທາງອາກາດເພີ້ມຂຶ້ນຕໍ່ພົນລະເຮືອນ ທີ່ໄດ້ສ້າງຄວາມເສຍຫາຍຢ່າງຮ້າຍແຮງ. ຕົວຢ່າງ ໃນເດືອນຕຸລາ ມີລາຍງານວ່າ ປະມານ 80 ຄົນໄດ້ເສຍຊີວິດຍ້ອນການໂຈມຕີທາງອາກາດຢູ່ພາກເໜືອຂອງມຽນມາ. ເມື່ອວັນທີ 10 ເມສາ ນຶ່ງມື້ກ່ອນການໂຈມຕີທີ່ຊາແກັງ ກໍໄດ້ມີການໂຈມຕີທີ່ລັດຈິນ ຊຶ່ງລາຍງານແຈ້ງວ່າມີຜູ້ເສຍຊີວິດຢ່າງໜ້ອຍ 9 ຄົນ.
ປະຊາຄົມນາໆຊາດໄດ້ສະແດງປະຕິກິລິຍາດ້ວຍຄວາມຕື່ນຕົກໃຈແລະການປະນາມ. ຮອງໂຄສົກຂອງກະຊວງການຕ່າງປະເທດສະຫະລັດ ທ່ານວີແດນ ພາແທລ ກ່າວຢູ່ໃນຖະແຫຼງການວ່າ “ການລ່ວງລະເມີດເຫຼົ່ານີ້ ມີແຕ່ຈະເນັ້ນໃຫ້ເຫັນເຖິງການບໍ່ໃຫ້ຄວາມສົນໃຈ ຂອງອຳນາດການປົກຄອງ ຕໍ່ຊີວິດຂອງຜູ້ຄົນ ແລະຄວາມຮັບຜິດຊອບຂອງຕົນ ຢູ່ໃນວິກິດການທາງດ້ານການເມືອງແລະມະນຸດສະທຳທີ່ໜ້າຢ້ານກົວ ຢູ່ໃນປະເທດມຽນມາ ຫຼັງຈາກການກໍ່ລັດຖະປະຫານເມື່ອເດືອນກຸມພາປີ 2021.”
ຂ້າຫຼວງໃຫຍ່ດ້ານສິດທິມະນຸດສະຫະປະຊາຊາດ ທ່ານວອລເກີ ເທີກ ກ່າວວ່າ ທ່ານ “ຕື່ນຕົກໃຈ” ຈາກການໂຈມຕີ ໂດຍໃຫ້ຂໍ້ສັງເກດວ່າ “ມັນປາກົດ ແມ່ນ ພວກເດັກນ້ອຍກຳລັງສະແດງຟ້ອນ ຕະຫຼອດທັງພົນລະເຮືອນຄົນອື່ນໆ…ແມ່ນຮວມຢູ່ໃນບັນດາຜູ້ເຄາະຮ້າຍ.”
ທ່ານນາບີລາ ມັສສາຣາລີ ໂຄສົກຂອງສະຫະພາບຢູໂຣບ ຮັບຜິດຊອບນະໂຍບາຍການຕ່າງປະເທດແລະຄວາມໝັ້ນຄົງ ກ່າວວ່າ “ສະຫະພາບຢູໂຣບແມ່ນຕື່ນຕົກໃຈຈາກລາຍງານຫຼ້າສຸດໃນການກໍ່ໂທດກຳ ໂດຍອຳນາດການປົກຄອງທະຫານທີ່ຊາແກັງ ເອົາຊີວິດຂອງພົນລະເຮືອນ ທີ່ໄຮ້ດຽງສາ ໄປຫຼາຍສິບຄົນ. ສະມາຄົມອາຊຽນກໍໄດ້ປະນາມ “ຢ່າງແຮງ” ຕໍ່ການໂຈມຕີທາງອາກາດດັ່ງກ່າວ.
ຮອງໂຄສົກຂອງກະຊວງການຕ່າງປະເທດພາແທລ ກ່າວວ່າ “ສະຫະລັດຂໍຮຽກຮ້ອງໃຫ້ອຳນາດການປົກຄອງຂອງມຽນມາ ຢຸດເຊົາການກໍ່ຄວາມຮຸນແຮງທີ່ໜ້າຢ້ານກົວ ອະນຸຍາດໃຫ້ສົ່ງການຊ່ວຍເຫຼືອທາງດ້ານມະນຸດສະທຳເຂົ້າໄປແບບບໍ່ມີການລົບກວນ ແລະໃຫ້ການເຄົາລົບຢ່າງແທ້ຈິງຕໍ່ຄວາມໄຝ່ຝັນຂອງປະຊົນຊາວມຽນມາ ທີ່ຢາກເປັນປະຊາທິປະໄຕແບບຮວມເອົາທຸກພັກຝ່າຍ.”
“ອຳນາດການປົກຄອງທະຫານຕ້ອງປະຕິບັດຕາມພັນທະ ພາຍໃຕ້ກົດໝາຍທາງດ້ານມະນຸດສະພາລະຫວ່າງປະເທດຮວມທັງກົດລະບຽບໃນການຄຸ້ມຄອງພົນລະເຮືອນ. ສະຫະລັດຈະສືບຕໍ່ເຮັດວຽກກັບປະຊາຄົມສາກົນ ເພື່ອໃຫ້ອຳນາດການປົກຄອງເປັນຜູ້ຮັບຜິດຊອບຕໍ່ການລ່ວງລະເມີດແລະກະທຳຄວາມຜິດຕ່າງໆຢູ່ໃນປະເທດມຽນມາ.”