ບົດບັນນາທິການ ທີ່ສະທ້ອນເຖິງນະໂຍບາຍ ຂອງລັດຖະບານສະຫະລັດ
ສະຫະລັດຂໍສະແດງຄວາມຍິນດີກັບການປະກາດເມື່ອໄວໆມານີ້ ຂອງພັກຝ່າຍຕ່າງໆໃນປະເທດຊູດານກ່ຽວກັບຂອບຂໍ້ຕົກລົງທາງດ້ານການເມືອງຂັ້ນຕົ້ນ. ໃນການຖະແຫຼງ ຢູ່ສະພາຄວາໝັ້ນຄົງ ກ່ຽວກັບປະເທດຊູດານ ແລະຊູດານໃຕ້ ທ່ານຈອນ ແຄລລີ ທີ່ປຶກສາທາງດ້ານການເມືອງ ປະຈຳຄະນະຜູ້ຕາງໜ້າຂອງສະຫະລັດທີ່ອົງການສະຫະປະຊາຊາດ ກ່າວວ່າ “ນີ້ແມ່ນບາດກ້າວອັນຈຳເປັນຂັ້ນຕົ້ນ ໄປສູ່ການສ້າງຕັ້ງຄືນ ການໂອນອຳນາດແບບປະຊາທິປະໄຕຢູ່ໃນປະເທດຊູດານ. ເວລານີ້ແມ່ນມີເສັ້ນທາງທີ່ໜ້າເຊື່ອຖືໄປສູ່ການຕົກລົງຂັ້ນສຸດທ້າຍ ທີ່ຈະນຳເອົາຊູດານ ອອກຈາກວິກິດການທາງດ້ານການເມືອງໃນປັດຈຸບັນນີ້.”
ເມື່ອເດືອນຕຸລາ ປີ 2021 ກອງທັບຊູດານ ພາຍໃຕ້ການນຳພາຂອງນາຍພົນອັບແດລ-ຟັດຕາ ເບີແຣນ ໄດ້ທຳການໂຄ່ນລົ້ມລັດຖະບານໄລຍະຂ້າມຜ່ານທີ່ນຳພາໂດຍພົນລະເຮືອນ ຊຶ່ງໄດ້ທັບມ້າງລັດຖະບານໄລຍະຂ້າມຜ່ານຂອງພົນລະເຮືອນທີ່ຫາກໍເລີ້ມໃໝ່ ຫຼັງຈາກໄດ້ມີການຜະເດັດການມາເປັນເວລາຫຼາຍໆທົດສະວັດ. ການປະທ້ວງຂະໜາດໃຫຍ່ທີ່ຕິດຕາມມາ ແລະກໍໄດ້ມີການປະສົບກັບຄວາມຮຸນແຮງແລະເງື່ອນໄຂທາງດ້ານເສດຖະກິດໄດ້ຊຸດໂຊມລົງຕື່ມ. ໃນເດືອນກໍລະກົດ ນາຍພົນເບີແຣນໄດ້ປະກາດວ່າກອງທັບເຕັມໃຈທີ່ຈະມອບອຳນາດຄືນໃຫ້ແກ່ພົນລະເຮືອນ.
ຊາວຊູດານທີ່ມີສ່ວນໄດ້ສ່ວນເສຍ ໃນຂອບເຂດທີ່ກວ້າງຂວາງ ໄດ້ລົງນາມໃນຂອບຂອງຂໍ້ຕົກລົງເມື່ອວັນທີ 5 ທັນວາ. ທີ່ປຶກສາທາງດ້ານການເມືອງ ທ່ານ ແຄລລີໄດ້ຊົມເຊີຍກ່ຽວກັບຄວາມພະຍາຍາມແລະແຜນການຂອງພວກເຂົາເຈົ້າ ທີ່ຈະເພີ້ມໄລຍະເວລາ ໃນການສືບຕໍ່ການເຈລະຈາຫາລື ກ່ຽວກັບບັນຫາ ທີ່ສຳຄັນໆ. ທ່ານໄດ້ຮຽກຮ້ອງໃຫ້ພັກຝ່າຍທັງໝົດຂອງຊູດານ “ເຂົ້າຮ່ວມພົວພັນໃນການສົນທະນາຫາລືດ້ວຍຄວາມຈິງໃຈແລະເພື່ອສ້າງຕັ້ງລັດຖະບານໄລຍະຂ້າມຜ່ານ ທີ່ນຳພາໂດຍພົນລະເຮືອນ ໂດຍໄວເທົ່າທີ່ເປັນໄປໄດ້.”
ເມື່ອວັນທີ 7 ທັນວາ ສະຫະລັດໄດ້ປະກາດນະໂຍບາຍຂະຫຍາຍການຈຳກັດຮັດແຄບໃນການອອກວີຊາເພື່ອກວມເອົາພວກເຈົ້າໜ້າທີ່ລັດຖະບານຊູດານທັງໃນປັດຈຸບັນ ແລະອະດີດ ຫຼືບຸກຄົນໃດໆທີ່ພະຍາຍາມບ່ອນທຳລາຍ ຫຼືເຮັດໃຫ້ຂັ້ນຕອນປະຊາທິປະໄຕໃນຊູດານ ມີການຊັກຊ້າ ຮວມທັງໂດຍຜ່ານການກົດຂີ່ທາງດ້ານສິດທິມະນຸດແລະອິດສະຫຼະພາບຂັ້ນພື້ນຖານ.
ລັດຖະມົນຕີການຕ່າງປະເທດສະຫະລັດ ທ່ານແອນໂທນີ ບລິງເກັນ ທີ່ໄດ້ຊົມເຊີຍຂອບຂໍ້ຕົກລົງທາງດ້ານການເມືອງຂັ້ນຕົ້ນກ່າວຢູ່ໃນຖະແຫຼງການວ່າ ການເອົາບາດກ້າວຂອງສະຫະລັດ “ທີ່ຂະຫຍາຍເຄື່ອງມື ຂອງກະຊວງການຕ່າງປະເທດເພື່ອສະໜັບສະໜຸນການໂອນອຳນາດໄປສູ່ປະຊາທິປະໄຕຂອງຊູດານແລະໄດ້ສະທ້ອນໃຫ້ເຫັນເຖິງຄວາມຕັ້ງໃຈຂອງພວກເຮົາ ທີ່ຈະສືບຕໍ່ສະໜັບສະໜຸນປະຊາຊົນຊູດານໃນຄວາມມຸ້ງມາດປາຖະໜາຢ່າງຈະແຈ້ງຂອງພວກເຂົາເຈົ້າທີ່ຢາກຈະໃຫ້ມີລັດຖະບານພາຍໃຕ້ການນຳພາຂອງພົນລະເຮືອນ ທີ່ມີການຕອບຮັບແລະມີຄວາມຮັບຜິດຊອບ.
“ພວກເຮົາອີກເທື່ອນຶ່ງ ຂໍຮຽກຮ້ອງຕໍ່ພວກຜູ້ນຳທະຫານຂອງຊູດານໃຫ້ສະຫຼະອຳນາດໃຫ້ແກ່ພົນລະເຮືອນ, ເຄົາລົບນັບຖືສິດທິມະນຸດແລະຢຸດເຊົາການໃຊ້ຄວາມຮຸນແຮງຕໍ່ພວກປະທ້ວງ” ນັ້ນຄືຄຳປະກາດຂອງລັດຖະມົນຕີບລິງເກັນ. ທ່ານໄດ້ຮຽກຮ້ອງໃຫ້ບັນດາຜູ້ຕາງໜ້າຂອງລັດຖະບານພົນລະເຮືອນຊູດານ ໃຫ້ທຳການເຈລະຈາດ້ວຍຄວາມຈິງໃຈ ແລະຖືເອົາຜົນປະໂຫຍດຂອງຊາດ ສຳຄັນໄປກວ່າຄວາມມັກໃຫຍ່ໄຝ່ສູງທາງດ້ານການເມືອງສ່ວນໂຕ.