ຢູ່່ທີ່ອົງການສະຫະປະຊາຊາດ, ທ່ານແດນ ເມີຣຟີ ທີ່ປຶກສາດ້ານເສດຖະກິດ ແລະສັງຄົມຂອງສະຫະລັດ ປະຈຳອົງການສະຫະປະຊາຊາດ ກ່າວເປັນປະຈຳ ວ່າ ສະຫະລັດຍິນດີທີ່ຈະປຶກສາຫາລື ກ່ຽວກັບຄວາມເປັນຫ່ວງໃດໆ ທີ່ກ່ຽວຂ້ອງກັບການແບ່ງແຍກເຊື້ອຊາດເຜົ່າພັນ.
ທ່ານເມີຣຟີ ເວົ້າວ່າ “ສະຫະລັດ ເຊື່ອວ່າ ຄວາມໂປ່ງໃສ, ການເປີດກວ້າງ ແລະ ຄວາມເຕັມໃຈ ທີ່ຈະກວດກາ ແລະຍອມຮັບຂໍ້ບົກຜ່ອງຕ່າງໆຂອງຕົນເອງ ຈະນຳໄປສູ່ການປັບປຸງທີ່ດີຂຶ້ນ ແລະດັ່ງທີ່ລັດຖະທຳມະນູນຂອງພວກເຮົາ ກ່າວໄວ້ວ່າ ‘ສະຫະພັນທີ່ສົມບູນແບບຫຼາຍຂຶ້ນ.’”
ທີ່ປຶກສາ ເມີຣຟີ ໃຫ້ຂໍ້ສັງເກດວ່າ “ສັງຄົມທີ່ສະຫງົບສຸກ ໃນສະະລັດ ໄດ້ອຳ ນວຍໃຫ້ມີການດຳເນີນງານຢ່າງເສລີ ແລະເປີດກວ້າງ ເພື່ອດຶງດູດຄວາມສົນໃຈ ໄປຫາການກະທຳທີ່ຜິດພາດໃນເມື່ອກ່ອນ ແລະຄວາມທ້າທາຍຕ່າງໆທີ່ມີຢູ່ຢ່າງ ຕໍ່ເນື່ອງ ເຖິງແມ່ນວ່າ ເມື່ອມີບັນຫາຕ່າງໆເຊັ່ນນັ້ນ ທີ່ເຮັດໃຫ້ບໍ່ສະບາຍໃຈ ກໍຕາມ.” ແຕ່ບໍ່ມີກໍລະນີແບບນີ້ ຢູ່ໃນຫຼາຍໆເຂດຂອງໂລກ ລວມທັງໃນຈີນ.
ແນ່ນອນ, ຖ້າ “ປະຊາຊົນຂອງຊິນຈຽງ, ຕິເບດ ແລະຮົ່ງກົງ ມີຄວາມສຸກສັນ ສຳລານ ແລະການປົກປ້ອງສິດທິມະນຸດທັງໝົດ ແລ້ວພວກເຮົາກໍຫວັງວ່າ ສາທາລະນະລັດປະຊາຊົນຈີນ ຈະຍິນດີຕ້ອນຮັບບັນດາຜູ້ລາຍງານພິເສດ” ຢ່າງມີຄວາມໂປ່ງໃສ ທີ່ຈະໄປຢ້ຽມຢາມຈີນ ທີ່ປຶກສາ ເມີຣຟີ ກ່າວ.
ທ່ານເວົ້າວ່າ “ແຕ່ສາທາລະນະລັດປະຊາຊົນຈີນ ກໍບໍ່ໄດ້ສົ່ງການເຊື້ອເຊີນເຫຼົ່ານີ້ ມາໃຫ້. ຫຼືບໍ່ອະນຸຍາດໃຫ້ອົງການສັງຄົມພົນລະເຮືອນ ເວົ້າໄດ້ຢ່າງເສລີ ຫຼື ສະແດງທ່າທີສະໜັບສະໜຸນໃດໆ ທີ່ຕົນເຫັນວ່າ ຂັດກັບຜົນປະໂຫຍດຂອງລັດ. ຫຼືບໍ່ອຳນວຍຄວາມສະດວກແກ່ບັນດາສະມາຊິກຂອງອົງການຂ່າວ ທີ່ລາຍງານຂ່າວ ໂດຍປາດສະຈາກຄວາມຢ້ານກົວ ກ່ຽວກັບການກວດສອບຫຼືຈັບກຸມ. ຫາກແຕ່ວ່າ ສາທາລະນະລັດປະຊາຊົນຈີນ ໃຊ້ເວລາໃນການກ່າວຖະແຫລງຂອງຕົນ ຢູ່ທີ່ສະຫະປະຊາຊາດ ເພື່ອບ່າຍບ່ຽງຄວາມສົນໃຈຂອງປະຊາຄົມນານາຊາດ ຈາກຫຼັກຖານທີ່ຖືກບັນທຶກໄວ້ ກ່ຽວກັບ ອາຊະຍາກຳທັງຫຼາຍຕໍ່ມວນມະນຸດ. ..ແລະເພື່ອປະຕິເສດຕໍ່ການລະເມີດສິດທິມະນຸດໃດໆ ທີ່ຕົນກຳລັງກະທຳຢູ່ ຕໍ່ປະຊາຊົນຂອງຕົນເອງ ໂດຍບໍ່ຢ້ານທີ່ຈະຖືກນຳມາລົງໂທດເລີຍ.”
ບໍ່ມີປະເທດໃດ ລວມທັງຈີນ ແມ່ນຢູ່ເໜືອການກວດສອບຢ່າງລະອຽດ, ທີ່ປຶກສາ ເມີຣຟີ ກ່າວ.
ທ່ານເວົ້າວ່າ “ພວກເຮົາຮຽກຮ້ອງຕໍ່ສາທາລະນະລັດປະຊາຊົນຈີນ ໃຫ້ຮັບເອົາ ການສະທ້ອນໃຫ້ເຫັນຕົນເອງທີ່ຈິງໃຈ ແທນທີ່ຈະສືບຕໍ່ປະຕິເສດໄປເລື້ອຍໆ ກ່ຽວກັບບັນຫາດ້ານສິດທິມະນຸດຂອງຕົນຢ່າງບໍ່ໜ້າເຊື່ອຖື, ໃຫ້ຢຸດການຂົ່ມຂູ່ ສະມາຊິກຂອງປະເທດຕ່າງໆ ທີ່ຍົກຄວາມເປັນຫ່ວງກ່ຽວກັບການປະຕິບັດໃດໆ ທາງດ້ານສິດທິມະນຸດຂອງຈີນ, ມີລະບຽບການພິເສດຫຼາຍຢ່າງທີ່ບັນຍັດໄວ້ແກ່ ບັນດາຜູ້ມີອຳນາດ ແລະຄະນະກຳມະການເພື່ອລົບລ້າງການຈຳແນກເຊື້ອຊາດເຜົ່າພັນ, ຍົກຕົວຢ່າງພຽງສອງສາມອັນເທົ່ານັ້ນ.”
ທ່ານເມີຣຟີ ກ່າວອີກວ່າ “ໃຫ້ພວກເຮົາໝົດທຸກຄົນພະຍາຍາມຊອກຫາ ຢ່າງເທົ່າທຽມກັນ ແລະ ຢ່າງຈິງໃຈ ໃນຄຳເວົ້າຂອງຖະແຫຼງການທົ່ວໂລກ ວ່າດ້ວຍສິດທິມະນຸດ, ‘ການມາເຖິງຂອງໂລກ ຊຶ່ງມະນຸດຈະມີເສລີພາບໃນການປາກເວົ້າ ແລະຄວາມເຊື່ອຖື ແລະປາສະຈາກຄວາມຢ້ານກົວ ແລະ ຄວາມຕ້ອງການ...ອັນເປັນຄວາມປາດຖະໜາທີ່ສູງທີ່ສຸດຂອງຄົນທົ່ວໄປ.”