ພັນທະຕໍ່ການເຄົາລົບນັບຖື ແລະປົກປ້ອງສິດທິມະນຸດ ໂດຍສະເພາະ ໃນຊ່ວງເວລາຂອງບັນຫາຂັດແຍ້ງ ແມ່ນໄດ້ຖືກບັນຍັດໄວ້ຢູ່ໃນກົດໝາຍສາກົນ. ອັນນັ້ນ ເປັນເຫດຜົນທີ່ອົງການສະຫະປະຊາຊາດ ໄດ້ຈັດຕັ້ງຄະນະກຳມາທິການສາກົນທີ່ເປັນອິດສະຫລະ ໃນການສອບຖາມກ່ຽວກັບຢູເຄຣນ ຂຶ້ນມາພຽງນຶ່ງອາທິດຫຼັງຈາກຣັດເຊຍ ໄດ້ບຸກລຸກປະເທດເພື່ອນບ້ານທີ່ນ້ອຍກວ່າ ໃນວັນທີ 24 ກຸມພາ ປີກາຍນີ້.
ວຽກງານຂອງຄະນະກຳມາທິການນີ້ ໄດ້ມອບໃຫ້ປະຊາຄົມນານາຊາດ ພາບທີ່ຖືກຕ້ອງຂອງຄວາມໂຫດຮ້າຍທາລຸນຫຼວງຫຼາຍ ທີ່ພົນລະເຮືອນຊາວຢູເຄຣນຕ້ອງໄດ້ປະເຊີນ ໃນແຕ່ລະວັນ. ຢູ່ທີ່ກອງປະຊຸມບໍ່ເປັນທາງການ ຂອງສະພາຄວາມໝັ້ນຄົງສະຫະປະຊາຊາດ ເມື່ອບໍ່ດົນມານີ້ ທີ່ໄດ້ຖືກກະຕຸ້ນໂດຍປະເທດອາລບາເນຍ, ສະຫະຣາຊະອານາຈັກ ແລະ ສະຫະລັດ, ຊຶ່ງຄະນະກຳມທິການ ໄດ້ໃຫ້ຂໍ້ສັງເກດວ່າ “ຫຼັກຖານໄດ້ສະແດງໃຫ້ເຫັນວ່າ ອຳນາດການປົກຄອງຂອງຣັດເຊຍ ໄດ້ທຳການລະເມີດຫຼາຍຮູບແບບຢ່າງແຜ່ຫຼາຍ, ຊຶ່ງຫຼາຍໆຢ່າງໃນນັ້ນ ເທົ່າກັບການກໍ່ອາຊະຍາກຳສົງຄາມ.”
ທ່ານເວົ້າວ່າ “ພວກມັນລວມມີ ການເຂັ່ນຂ້າແບບຕັ້ງໃຈ, ການໂຈມຕີຕໍ່ພົນລະເຮືອນ, ການກັກຂັງຢ່າງຜິດກົດໝາຍ, ການທໍລະມານ, ການຂົ່ມຂືນ ແລະຄວາມຮຸນແຮງທາງເພດ, ພ້ອມດ້ວຍການບັງຄັບໃຫ້ເຄື່ອນຍ້າຍ ແລະການເນລະເທດພວກເດັກນ້ອຍ. ສ່ວນການລະເມີດອື່ນໆ ແມ່ນການໃຊ້ອາວຸດລະເບີດຕ່າງໆໃນພື້ນທີ່ທີ່ມີປະຊາຊົນອາໄສຢູ່ໜາແໜ້ນ, ລວມທັງການໂຈມຕີຢ່າງບໍ່ເລືອກໜ້າແລະບໍ່ສົມສ່ວນ, ພ້ອມກັບການບຸກເຂົ້າໂຈມຕີຕໍ່ພື້ນຖານໂຄງລ່າງທີ່ກ່ຽວຂ້ອງກັບພະລັງງານ.”
ທ່ານຈອນ ແຄລລີ ທີ່ປຶກສາຂອງລັດຖະມົນຕີດ້ານການເມືອງສະຫະລັດ ໄດ້ກ່າວວ່າ “ການຮຸກຮານຂອງຣັດເຊຍຕໍ່ຢູເຄຣນ ບໍ່ພຽງແຕ່ລະເມີດອະທິປິໄຕຂອງຢູເຄຣນເທົ່ານັ້ນ ມັນເປັນໄພຂົ່ມຂູ່ໂດຍກົງຕໍ່ສັນຕິພາບ ແລະຄວາມໝັ້ນຄົງຂອງນານາຊາດ, ແລະມັນໄດ້ເຮັດໃຫ້ສິດທິມະນຸດຮ້າຍແຮງສຸດ ແລະຜົນສະທ້ອນດ້ານມະນຸດສະທຳ.”
ທ່ານແຄລລີ ເວົ້າວ່າ “ວຽກງານຂອງຄະນະກຳມາທິການນີ້ ເພື່ອເຜີຍແບຄວາມໂຫດຮ້າຍທາລຸນ ແລະການກະທຳທີ່ລະເມີດຕ່າງໆຂອງສົງຄາມຣັດເຊຍ ແມ່ນມີຄວາມຈຳເປັນທີ່ຈະຮັບປະກັນວ່າ ພວກຜູ້ລະເມີດຈະຖືກນຳມາຮັບຜິດຊອບ ສຳລັບພວກຜູ້ເຄາະຮ້າຍຫຼາຍພັນຄົນ. ລາຍງານຢ່າງລະອຽດຂອງຄະນະກຳມາທິການນີ້ ບໍ່ພຽງແຕ່ແຈ້ງໃຫ້ຮູ້ເທົ່ານັ້ນ ໃຫ້ຄວາມເຂົ້າໃຈຂອງຄະນະກຳມະທິການ ໃນຄວາມໂຫດຮ້າຍຂອງສົງຄາມ ປະທານາທິບໍດີ ປູຕິນ, ມັນຍັງຈະຊ່ອຍແຜ້ວທງໄປສູ່ການນຳເອົາພວກລະເມີດມາຮັບຜິດຊອບ, ຄວາມຍຸຕິທຳ, ແລະໂລກທີ່ປອດໄພຂຶ້ນກວ່າເກົ່າ.”
ບົດລາຍງານຂອງຄະນະກຳມາທິການນີ້ ບໍ່ພຽງແຕ່ເປັນເລື້ອງອ່ານ ແລ້ວສະບາຍໃຈ. ແຕ່ຢ່າງໃດກໍຕາມ ທ່ານເອກອັກຄະລັດຖະທູດ ແຄລລີ ກ່າວວ່າ “ມັນເປັນສິ່ງຈຳເປັນສຳລັບປະຊາຄົມນານາຊາດທີ່ຈະເຂົ້າໃຈ ສິ່ງທີ່ກຳລັງເກີດຂຶ້ນ.”
ທ່ານເວົ້າວ່າ “ລາຍງານຂອງຄະນະກຳມາທິການນີ້ ໃຫ້ລາຍລະອຽດເລື້ອງລາວຂອງການໂຈມຕີຕໍ່ສະຖານທີ່ດານການແພດຕ່າງໆ, ການທໍລະມານ, ຄວາມຮຸນແຮງບົນພື້ນຖານຂອງເພດ, ແລະການເນລະເທດດ້ວຍການບັງຄັບ, ວາດພາບໃຫ້ເຫັນສິ່ງທີ່ໜ້າຕື່ນຕົກໃຈ. ມັນຄວນກະຕຸ້ນຈິດໃຈພວກເຮົາທັງໝົດ ໃຫ້ປະນາມຢ່າງເດັດດ່ຽວພຶດຕິກຳຂອງຣັດເຊຍ.”
ທ່ານເອກອັກຄະລັດຖະທູດ ແຄລລີ ກ່າວອີກວ່າ “ສະຫະລັດສະໜັບສະໜຸນຢ່າງແຂ່ງແກ່ນຕໍ່ເສັ້ນທາງເພື່ອຄວາມຍຸຕິທຳ ແລະຄວາມຮັບຜິດຊອບສຳລັບຄວາມໂຮດຮ້າຍທາລຸນທັງຫຼາຍ ທີ່ໄດ້ກະທຳໃນຢູເຄຣນ ແລະຕໍ່ປະຊາຊົນຊາວຢູເຄຣນ, ແລະພວກເຮົາຈະສືບຕໍ່ສະໜັບສະໜຸນຄວາມອາດສາມາດຂອງຢູເຄຣນ ທີ່ຈະສືບສວນສອບສວນ ແລະດຳເນີນຄະດີຄວາມໂຫດຮ້າຍທາລຸນນັ້ນ, ໃນຂະນະດຽວກັນ ຍັງສະໜັບສະໜຸນຄວາມພະຍາຍາມໃນສານແຫ່ງຊາດ ແລະສະຖາບັນສາກົນທັງຫຼາຍ.”
ທ່ານກ່າວຕໍ່ໄປວ່າ “ພວກເຮົາບໍ່ສາມາດປ່ອຍໃຫ້ບໍ່ມີການຖືກນຳມາລົງໂທດ, ແລະພວກເຮົາຕ້ອງເຮັດໃຫ້ເປັນທີ່ຈະແຈ້ງວ່າ ຄວາມໝັ້ນໝາຍຂອງພວກເຮົາທີ່ຈະຢຶດໝັ້ນໃນກົດໝາຍສາກົນ. ພວກເຮົາຮຽກຮ້ອງອີກຄັ້ງນຶ່ງ ຕໍ່ປະທານາທິບໍດີ ປູຕິນ ໃຫ້ຍຸຕິສົງຄາມທີ່ທ່ານໄດ້ເລີ້ມຂຶ້ນຢ່າງບໍ່ຈຳເປັນເລີຍ ແລະຖອນກຳລັງຂອງຣັດເຊຍ ອອກຈາກຢູເຄຣນ ໃນທັນທີ.”