ໃນຂະນະທີ່ກະຊວງການຕ່າງປະເທດຂອງສະຫະລັດ ໄດ້ປະກາດຊ້ຳແລ້ວຊ້ຳອີກ ການລາຍງານຂ່າວບໍ່ແມ່ນອາຊະຍາກຳ.
ແຕ່ການຈັບກຸມນັກຂ່າວຈຳນວນນຶ່ງໄດ້ເພີ້ມສູງຂຶ້ນໃນບໍ່ເທົ່າໃດອາທິດຜ່ານມານີ້ ຢູ່ໃນປະເທດອາເຈີບາຍຈານ ສະແດງໃຫ້ເຫັນວ່າ ເຈົ້າໜ້າທີ່ຂອງອາເຈີບາຍຈານ ບໍ່ເຫັນດີນຳ.
ເລີ້ມຕົ້ນແຕ່ເດືອນພະຈິກ ໂດຍມີການຈັບກຸມຄະນະການນຳພາຂອງ ສື່ມວນຊົນ Abzas ທີ່ເປັນອົງການສື່ມວນຊົນອິດສະຫຼະຕໍ່ຕ້ານການສໍ້ລາດບັງຫຼວງ ທີ່ທາງການຂອງອາເຈີບາຍຈານ ໄດ້້ເພີ້ມທະວີການປາບປາມສຽງວິພາກວິຈານຕໍ່ລັດຖະບານ ຂອງພວກເຂົາເຈົ້າ.
ອັນທີນຶ່ງ ການຖືກຄວບຄຸມຕົວ ໃນເດືອນພະຈິກ ແມ່ນ ຜູ້ອຳນວຍການຂອງສື່ມວນຊົນ ອາບຊາສ ທ່ານອູລວີ ຮາຊານລີ. ບໍ່ດົນຫຼັງຈາກນັ້ນ ກໍແມ່ນຫົວໜ້້າບັນນາທິການ ທ່ານນາງ ເສວິນຈ໌ ວາກິຟຊີ, ທ່ານ ມາຮາມມັດ ເຄກາລອບ ຮອງຜູ້ອຳນວຍການ ແລະນັກຂ່າວ ທ່ານນາງ ນາຣກິສ ອາບຊາລາໂມວາ ກໍຍັງໄດ້ຖືກຈັບກຸມ. ພວກເຂົາເຈົ້າໄດ້ຖືກກ່າວຫາກ່ຽວຂ້ອງກັບສິ່ງທີ່ອົງການສິດທິມະນຸດສາກົນຕ່າງໆ ກ່າວວ່າ ເປັນເລື້ອງທີ່ບໍ່ມີຄວາມຈິງ, ເປັນອາຊະຍາກຳທີ່ມີຈຸດປະສົງທາງດ້ານການເມືອງ ຍ້ອນວ່າ ລາຍງານການສືບສວນຂອງສື່ມວນຊົນ ອາບຊາສ ກ່ຽວກັບການສໍ້ລາດບັງຫຼວງໃນຂັ້ນສູງຂອງລັດຖະບານ. ພວກເຂົາເຈົ້າທັງໝົດໄດ້ຖືກຄຸມຂັງເປັນເວລາຍາວນານ ໃນລະຫວ່າງຂັ້ນຕອນກ່ອນການດຳເນີນຄະດີ.
ເມື່ອບໍ່ດົນມານີ້ ຍັງມີການຈັບກຸມ ທ່ານອາຊີສ ໂອຣູໂຈບ ຜູ້ກໍ່ຕັ້ງຊ່ອງໂທລະ ພາບທາງອອນໄລນ໌ອິດສະຫຼະ ຄານອລ 13 (TV channel Kanal 13) ແລະ ໂຄສົກຂອງຊ່ອງນີ້ ທ່ານຣູຟາຕ ມູຣາດລີ ນຳດ້ວຍ.
ບໍ່ພຽງແຕ່ພວກນັກຂ່າວເທົ່ານັ້ນ ທີ່ຕົກເປັນຜູ້ເຄາະຮ້າຍໃນການປາບປາມຂອງລັດຖະບານ. ທ່ານກູບາດ ອີບາດອກລີ ນັກເສດຖະສາດ ແລະເປັນປະທານຂອງພັກຝ່າຍຄ້ານ ປະຊາທິປະໄຕຂອງອາເຈີບາຍຈານ ກໍໄດ້ຖືກຈັບກຸມ ໃນເດືອນກໍລະກົດ ແລະຜູ້ນຳຝ່າຍຄ້ານທີ່ມີຊື່ສຽງ ແລະເປັນຜູ້ທີ່ວິພາກວິຈານລັດຖະບານ ທ່ານ ໂຕຟີກ ຢາກູບລູ ໄດ້ຖືກຄວບຄຸມຕົວ ໃນກາງເດືອນທັນວານີ້.
ຢູ່ທີ່ກອງປະຊຸມຖະແຫລງຂ່າວ ໂຄສົກກະຊວງການຕ່າງປະເທດສະຫະລັດ ທ່ານແມັຕຕີວ ມີລເລີ ເມື່ອບໍ່ດົນມານີ້ ໄດ້ເອີ້ນແນວໂນມຂອງຄຸມຂັງບັນດານັກຂ່າວ, ບັນດານັກເຄື່ອນໄຫວສັງຄົມພົນລະເຮືອນ, ແລະບັນດາຝ່າຍຄ້ານຜູ້ທີ່ມີຊື່ສຽງ ໃນອາເຈີບາຍຈານ ນັ້ນ ວ່າ “ໜ້າເປັນຫ່ວງຢ່າງເລິກເຊິ່ງ.”
ທ່ານມີລເລີ ໂຄສົກກະຊວງການຕ່າງປະເທດ ໄດ້ກ່າວປະກາດວ່າ “ສິບກວ່າຄົນເຊັ່ນບັນດາຜູ້ມີຊື່ສຽງທັງຫຼາຍນັ້ນ ໄດ້ຖືກຄຸມຂັງພາຍໃນນຶ່ງເດືອນຜ່ານມານີ້. ມັນເປັນທີ່ຍອມຮັບບໍ່ໄດ້.” ທ່ານກ່າວຕໍ່ໄປວ່າ “ພວກເຮົາຈະສືບຕໍ່ຮຽກຮ້ອງໃຫ້ລັດຖະບານຂອງອາເຈີບາຍຈານ ເຄົາລົບນັບຖືສິດທິມະນຸດ ແລະຫຼັກພື້ນຖານຂອງທຸກເສລີພາບທັງໝົດ, ລວມທັງ ຫຼັກພື້ນຖານຂອງການໃຊ້ສິດເສລີພາບ ໃນການອອກຄວາມຄິດເຫັນ, ພ້ອມກັນນັ້ນ ຮຽກຮ້ອງໃຫ້ປ່ອຍຕົວພວກຄົນເຫຼົ່ານັ້ນທັງໝົດຢ່າງຮີບດ່ວນ ຜູ້ທີ່ໄດ້ຖືກຄຸມຂັງຢ່າງບໍ່ເປັນທຳ.”