ບົດບັນນາທິການ ທີ່ສະທ້ອນເຖິງນະໂຍບາຍ ຂອງລັດຖະບານສະຫະລັດ
ສະຫະລັດຍັງສືບຕໍ່ຂໍຮຽກຮ້ອງໃຫ້ມີການຈັດຕັ້ງປະຕິບັດມາດຕະຖານດ້ານ ຄວາມປອດໄພແລະຄວາມໝັ້ນຄົງທາງດ້ານນິວເຄລຍທີ່ຖືກຮັບຮູ້ໂດຍລະຫວ່າງປະເທດ ຢູ່ທີ່ໂຮງໄຟຟ້າພະລັງງານນິວເຄລຍຊາໂປຣິສເຊຍຂອງຢູເຄຣນ ທີ່ຖືກ ຢຶດເອົາໂດຍກຳລັງຣັດເຊຍ ເມື່ອວັນທີ 4 ມີນາຜ່ານມາ.
ເອກອັກຄະລັດຖະທູດເຈັບຟຣີ ດີລໍເຣັນຕິສ ທີ່ປຶກສາອະວຸໂສພິເສດຂອງສະຫະລັດ ຮັບຜິດຊອບກິດຈະການທາງດ້ານການເມືອງ ປະຈຳອົງການສະຫະປະຊາຊາດ ກ່າວວ່າ “ພວກເຮົາຍັງສືບຕໍ່ສະໜັບສະໜຸນໃຫ້ອົງການພະລັງງານປະລະມານູສາກົນ ຫລື IAEA ເຂົ້າໄປກວດກາ ສະຖານທີ່ດັ່ງກ່າວ ແບບບໍ່ມີການຂັດຂວາງແລະດ້ວຍຄວາມປອດໄພ. ດ້ວຍເຫດຜົນທີ່ວ່ານັ້ນ ມັນມີຄວາມຈຳເປັນ ທີ່ຣັດເຊຍຕ້ອງໄດ້ອະນຸຍາດ ໃຫ້ເຈົ້າໜ້າທີ່ປະຕິບັດງານຊາວຢູເຄຣນ ຈັດຕັ້ງປະຕິບັດມາດຕະການໃດໆ ແລະທຸກໆມາດຕະການທີ່ຄະນະທີມງານຂອງອົງການພະລັງງານປະລະມານູສາກົນ ແລະເຈົ້າໜ້າທີ່ປະຕິບັດງານຊາວຢູເຄຣນ ເຫັນວ່າມີ ຄວາມສຳຄັນສຳລັບຄວາມປອດໄພ ແລະຄຸ້ມຄອງການປະຕິບັດງານຢູ່ທີ່ໂຮງໄຟຟ້າ ເພື່ອຫຼຸດຜ່ອນຄວາມສ່ຽງຕໍ່ການເກີດເຫດຮ້າຍທາງດ້ານນິວເຄລຍ.”
ສະຫະລັດໃຫ້ການສະໜັບສະໜຸນຕໍ່ການຮຽກຮ້ອງຂອງຢູເຄຣນເພື່ອຈັດຕັ້ງໃຫ້ບໍລິເວນອ້ອມແອ້ມໂຮງໄຟຟ້າຊາໂປຣິສເຊຍເປັນເຂດປອດທະຫານ. ເອກອັກຄະລັດຖະທູດດີລໍເຣັນຕິສ ກ່າວວ່າ “ຣັດເຊຍບໍ່ມີສິດ ທີ່ຈະເຜີຍແບໂລກໃສ່ຄວາມສ່ຽງທີ່ບໍ່ຈຳເປັນ ແລະຄວາມເປັນໄປໄດ້ໃນການທີ່ຈະເກີດໄຟພິບັດທາງດ້ານນິວເຄລຍ.”
ທຸກໆການຂັດແຍ້ງດ້ວຍກຳລັງອາວຸດຢູ່ພາຍໃນຫຼືອ້ອມແອ້ມໂຮງໄຟຟ້ານິວເຄລຍ ຊຶ່ງເບິ່ງຄືວ່າເກີດຂຶ້ນໃນແຕ່ລະວັນນັ້ນແມ່ນມີຄວາມສ່ຽງເພີ້ມຂຶ້ນທີ່ຈະພາໃຫ້ເກີດ ຮ້າຍທາງດ້ານນິວເຄລຍ. ການຍິງໂຈມຕີຕໍ່ບໍລິເວນດັ່ງກ່າວ ແມ່ນອີກເທື່ອນຶ່ງໄດ້ພາໃຫ້ມີການຕັດສາຍໄຟທີ່ຢູ່ທາງນອກ ຊຶ່ງພາໃຫ້ມີຄວາມສ່ຽງ ຕໍ່ການປະຕິບັດງານຢ່າງປອດໄພຂອງໂຮງໄຟຟ້າ. ເອກອັກຄະລັດຖະທູດດີລໍເຣັນຕິສ “ໄດ້ຮຽກຮ້ອງໃຫ້ຣັດເຊຍ ຢຸດເຊົາທຸກການປະຕິບັດງານທາງທະຫານ ຢູ່ທີ່ ຫຼືໃກ້ໆກັບໂຮງໄຟຟ້ານິວເຄລຍຂອງຢູເຄຣນແລະມອບການຄວບຄຸມຢ່າງຄົບຖ້ວນໃຫ້ແກ່ຢູເຄຣນ.”
ເອກອັກຄະລັດຖະທູດດີລໍເຣັນຕິສ ເຕືອນວ່າ “ໂຮງໄຟຟ້າ ແລະກະແສໄຟຟ້າທີ່ຜະລິດທັງໝົດ ແມ່ນເປັນຂອງຢູເຄຣນ. ຄວາມພະຍາຍາມໃດໆກໍຕາມ ຂອງຣັດເຊຍທີ່ຈະຕັດການສົ່ງກະແສໄຟຟ້າ ຈາກໂຮງໄຟຟ້ານິວເຄລຍຊາໂປຣິສເຊຍໄປໃຫ້ຢູເຄຣນແລະປ່ຽນໄປສົ່ງໃຫ້ຣັດເຊຍແທນນັ້ນ ແມ່ນຈະຖືວ່າເປັນການທ້າທາຍເກາະຜິດຢ່າງແຮງ ເຫັນແກ່ຕົວ ແລະສາຍຕາສັ້ນ. ພວກເຮົາຂໍປະຕິເສດຕໍ່ການດຳເນີນຄວາມພະຍາຍາມໂດຍຣັດເຊຍ ທີ່ຈະໃຊ້ຕາຂ່າຍສົ່ງໄຟຟ້າຂອງຢູເຄຣນ ເພື່ອເປັນເຄື່ອງຕໍ່ລອງໃນການເຮັດສົງຄາມແບບບໍ່ເປັນທຳນີ້ ແລະໃຊ້ໂຮງໄຟຟ້ານິວເຄລຍຂອງຢູເຄຣນເປັນເຄື່ອງກຳບັງທາງທະຫານຫຼືບ່ອນສົ່ງກຳລັງໂຈມຕີ.”
ເອກອັກຄະລັດຖະທູດດີລໍເຣັນຕິສ ຂໍຮຽກຮ້ອງໃຫ້ “ສະຫະພັນຣັດເຊຍ ຕ້ອງຢຸດເຊົາການປະພຶດແບບຂາດຄວາມຮັບຜິດຊອບ ແລະຖອນທະຫານຂອງຕົນອອກໄປໃນທັນທີ ບໍ່ພຽງແຕ່ໃນບໍລິເວນອ້ອມແອ້ມ ໂຮງໄຟຟ້າຊາໂປຣິສເຊຍເທົ່ານັ້ນ ແຕ່ອອກຈາກປະເທດຢູເຄຣນທັງໝົດນຳດ້ວຍ.”
ໃນຂະນະທີ່ການເສຍຊີວິດລົ້ມຕາຍຂອງພົນລະເຮືອນໃນບັນຫາຂັດແຍ້ງນີ້ ເພີ້ມທະວີຂຶ້ນນັບມື້ນັບນັ້ນ ມັນເຖິງເວລາແລ້ວ ທີ່ຣັດເຊຍຕ້ອງໄດ້ຢຸດເຊົາສຽງປືນຂອງຕົນ ຖອນທະຫານອອກຈາກຢູເຄຣນແລະຮັບເອົາການແກ້ໄຂທາງດ້ານການທູດ. ມັນມີຄວາມຈຳເປັນທີ່ຣັດເຊຍ ຕ້ອງໃຫ້ການເຄົາລົບຕໍ່ອະທິປະໄຕແລະຜືນແຜ່ນດິນອັນຄົບຖ້ວນຂອງຢູເຄຣນ ດັ່ງທີ່ໄດ້ບັງຄັບໄວ້ຢູ່ໃນກົດບັດສະຫະປະຊາຊາດ.