ບົດບັນນາທິການ ທີ່ສະທ້ອນເຖິງນະໂຍບາຍ ຂອງລັດຖະບານສະຫະລັດ
ວັງເຄຣັມລິນ ມີຄວາມຢ້ານກົວທ່ານອາເລັກເຊ ນາວາລນີ ຫຼາຍປານໃດ? ດັ່ງທີ່ເຫັນໃນຄຳພິພາກສາ ແລະການຕັດສິນໂທດ ເທື່ອໃໝ່ຕໍ່ທ່ານ ສະແດງໃຫ້ເຫັນນັ້ນ ແມ່ນຢ້ານຫຼາຍ.
ເມື່ອວັນທີ 4 ສິງຫາຜ່ານມາ ສານແຫ່ງນຶ່ງຂອງຣັດເຊຍ ໄດ້ຕັດສິນໂທດຜູ້ຕ້ອງຕິປະທານາທິບໍດີຣັດເຊຍ ທ່ານວລາດີເມຍ ປູຕິນ ແລະຜູ້ປຸກລະດົມຕໍ່ຕ້ານການສໍ້ລາດບັງຫຼວງຄົນສຳຄັນສຸດ ໃຫ້ຕິດຄຸກຕື່ມອີກ 19 ປີໃນຂໍ້ຫາຫົວຮຸນແຮງຈັດ. ທ່ານນາວາລນີ ຜູ້ທີ່ໄດ້ທຳນາຍໄວ້ລ່ວງໜ້າວ່າ ທ່ານຈະໄດ້ຮັບໂທດຕື່ມອີກ ເປັນເວລາດົນນານ ແລະໜັກແບບ “ສະໄໝສະຕາລິນ” ເພື່ອວ່າພວກເຈົ້າໜ້າທີ່ຈະສາມາດສ້າງຄວາມຢ້ານກົວໃຫ້ແກ່ປະຊາຊົນ ຊຶ່ງທ່ານໄດ້ຮັບໃຊ້ໂທດຢູ່ແລ້ວດົນກວ່າ 11 ປີ.
ແຕ່ແນວໃດກໍຕາມ ທ່ານນາວາລນີກໍໄດ້ບໍ່ໄດ້ສະທ້ານຢ້ານກົວ. ໃນການຂຽນລົງທາງສື່ສັງຄົມ ຫຼັງຈາກມີການປະກາດ ກ່ຽວກັບການຕັດສິນໂທດແລ້ວນັ້ນ ທ່ານໄດ້ຮຽກຮ້ອງໃຫ້ເພື່ອນຮ່ວມຊາດຊາວຣັດເຊຍບໍ່ໃຫ້ສູນເສຍຄວາມຕັ້ງໃຈໃນການຄັດຄ້ານ.
ສະຫະລັດຂໍປະນາມການດຳເນີນຄະດີ ການຕັດສິນໂທດ ແລະໃສ່ໂທດເພີ້ມຕື່ມ. ໂຄສົກກະຊວງການຕ່າງປະເທດ ທ່ານແມັດທິວ ມິລເລີກ່າວຢູ່ໃນຖະແຫຼງການວ່າ “ນິີ້ແມ່ນການສະຫຼຸບທີ່ບໍ່ເປັນທຳ ຕໍ່ການດຳເນີນຄະດີທີ່ບໍ່ຍຸຕິທຳ.”
ທ່ານນາວາລນີໄດ້ຕົກເປັນເປົ້າຂອງທ່ານປູຕິນ ແຫ່ງຣັດເຊຍ ມາເປັນເວລາດົນນານ. ດັ່ງທີ່ໂຄສົກມິລເລີໃຫ້ຂໍ້ສັງເກດນັ້ນ “ນັບເປັນເວລາຫຼາຍປີມາແລ້ວ ວັງ-ເຄຣັມລິນໄດ້ພະຍາຍາມ ທີ່ຈະປິດປາກປິດປິດສຽງ ທ່ານນາວາລນີ ແລະຂັດຂວາງຕໍ່ການຮຽກຮ້ອງເພື່ອໃຫ້ມີຄວາມໂປ່ງໃສ ແລະຮັບຜິດຊອບ ໄປເຖິງປະຊາຊົນຊາວຣັດເຊຍ.”
ທ່ານນາວາລນີ ໄດ້ຖືກຮາວີລົບກວນໂດຍເຈົ້າໜ້າທີ່ ໃນການປຸກລະດົມຕໍ່ຕ້ານການສໍ້ລາດບັງຫຼວງແລະການເຄື່ອນໄຫວທາງການເມືອງມາໄດ້ດົນກວ່ານຶ່ງທົດສະວັດ. ໃນປີ 2020 ລັດຖະບານຣັດເຊຍ ໄດ້ພະຍາຍາມສັງຫານທ່ານດ້ວຍສານເຄມີ ໂນວີຈົກ. ຫຼັງຈາກໄດ້ຟື້ນໂຕຄືນຢູ່ເຢຍຣະມັນ ທ່ານນາວາລນີກໍໄດ້ ກັບຄືນໄປຣັດເຊຍອີກ ບ່ອນທີ່ທ່ານໄດ້ຖືກຈັບ ແລະສົ່ງເຂົ້າຄຸກ ແບບໄຮ້ຢາງອາຍ ໃນຂໍ້ຫາທີ່ມີຈຸດປະສົງທາງການເມືອງ.
ໂຄສົກມິລເລີຊີ້ໃຫ້ເຫັນວ່າ ການດຳເນີນຄະດີເທື່ອຫຼ້າສຸດຕໍ່ທ່ານນາວາລນີໄດ້ມີຂຶ້ນແບບປິດລັບແລະການເຂົ້າເຖິງຫຼັກຖານທີ່ກ່າວອ້າງນັ້ນ ແມ່ນຢູ່ໃນຂອບເຂດຈຳກັດສຳລັບທະນາຍຄວາມຂອງທ່ານ ຊຶ່ງເປັນການສະແດງໃຫ້ເຫັນອີກເທື່ອນຶ່ງເຖິງ ການເປັນຄະດີທີ່ບໍ່ມີພື້ນຖານຂອງເຈົ້າໜ້າທີ່ຣັດເຊຍແລະການຂາດຂະບວນການທາງກົດໝາຍທີ່ຖືກຕ້ອງ ສຳລັບຜູ້ໃດກໍຕາມທີ່ຕໍ່ຕ້ານອຳນາດການປົກຄອງ.
“ໃນຂະນະດຽວກັນ ເຈົ້າໜ້າທີ່ຣັດເຊຍ ໄດ້ສົ່ງທ່ານນາວາລນີ ໄປຢູ່ບ່ອນຄຸມຂັງ ດ່ຽວຊ້ຳແລ້ວຊ້ຳອີກ ຫ້າມຕິດຕໍ່ກັບທະນາຍຄວາມ ແລະປະຕິເສດບໍ່ໃຫ້ທ່ານໄດ້ຮັບການປິ່ນປົວພະຍາບານ” ນັ້ນຄືຄຳເວົ້າຂອງທ່ານມິລເລີ້.
“ສະຫະລັດຂໍປະນາມຢ່າງແຮງ ໃນການສືບຕໍ່ຄຸມຂັງທ່ານນາວາລນີ ນັກເຄື່ອນໄຫວເພື່ອປະຊາທິປະໄຕ ທ່ານວລາດີເມຍ ຄາຣາ-ເມີຊາແລະພວກທີ່ຖືກລະບຸໂຕວ່າເປັນນັກໂທດການເມືອງອື່ນໆອີກ 500 ກວ່າຄົນທີ່ຣັດເຊຍຄຸມຂັງພວກເຂົາເຈົ້າຢູ່. ພວກເຮົາຈະສືບຕໍ່ຕິດຕາມເບິ່ງຄະດີຂອງພວກເຂົາເຈົ້າຢ່າງໃກ້ຊິດ ແລະຂໍຮຽກຮ້ອງໃຫ້ປ່ອຍໂຕພວກທີ່ຖືກຄຸມຂັງແບບບໍ່ເປັນທຳເຫຼົ່ານີ້ທັງໝົດ. ພວກເຮົາ ອີກເທື່ອນຶ່ງ ຮ່ວມກັນກັບຄອບຄົວ ເພື່ອນຝູງແລະພວກສະໜັບສະໜຸນທ່ານນາວາລນີ ໃນທົ່ວໂລກ ຂໍຮຽກຮ້ອງໃຫ້ປ່ອຍທ່ານໃນທັນທີ ແລະຍຸຕິການກົດຂີ່ ຕໍ່ສຽງຮຽກຮ້ອງທີ່ເປັນອິດສະຫຼະຢູ່ໃນຣັດເຊຍ.”