ສະຫະລັດ ໄດ້ວາງມາດຕະການລົງໂທດໃສ່ນາງ ເອກາເຕຣີນາ ສດາໂນວາ, ຄົນສັນຊາດ ຣັດເຊຍ, ສຳລັບບົດບາດຂອງລາວໃນການຟອກເງິນຫຼາຍຮ້ອຍລ້ານໂດລາດ້ວຍການໃຊ້ສະກຸນເງິນດິຈິຕອລຕາງໜ້າໃຫ້ພວກມີອຳນາດ ຣັດເຊຍ ທີ່ຖືກມາດຕະການລົງໂທດ. ນາງ ສດາໂນວາ ຍັງໄດ້ສະໜອງການບໍລິການທາງຄອມພິວເຕີຫຼາຍຢ່າງ, ເງິນສົດ, ເກັບພາສີໃນການຢູ່ອາໄສ ແລະ ອື່ນໆຕໍ່ລູກຄ້າຊາວ ຣັດເຊຍ ທີ່ພະຍາຍາມຈະຟອກເງິນທຶນ ຫຼື ປິດບັງແຫຼ່ງທີ່ມາຂອງຊັບສິນຂອງເຂົາເຈົ້າ.
ການວາງມາດຕະການລົງໂທດໃສ່ນາງ ສດາໂນວາ ໄດ້ເນັ້ນໃຫ້ເຫັນຜົນທີ່ຕາມມາຂອງການສະໜັບສະໜູນພວກຕົວແທນວັງເຄຣັມລິນທີ່ສໍ້ລາດບັງຫຼວງ, ໄດ້ເນັ້ນຢ້ຳເຖິງຄວາມພະຍາຍາມຂອງ ສະຫະລັດ ທີ່ຈະແກ້ໄຂການລ່ວງລະເມີດສະກຸນເງິນດິຈິຕອລ ເພື່ອຟອກເງິນທຶນທີ່ຜິດກົດໝາຍ, ແລະ ໄດ້ເປີດເຜີຍກິດຈະກຳການຟອກເງິນທີ່ຜິດກົດໝາຍຂອງຜູ້ດຳເນີນການ.
ຮອງລັດຖະມົນຕີກະຊວງການເງິນທີ່ຮັບຜິດຊອບສຳລັບລັດທິກໍ່ການຮ້າຍ ແລະ ການສືບລັບດ້ານການເງິນ ທ່ານ ບຣາຍແອນ ແນລສັນ ໄດ້ກ່າວວ່າ “ຜ່ານຜູ້ອຳນວຍຄວາມສະດວກທີ່ສຳຄັນຄືນາງ ສດາໂນວາ, ພວກຜູ້ມີອຳນາດ ຣັດເຊຍ, ກຸ່ມຮຽກຄ່າໄຖ່ທາງຄອມພິວເຕີ, ແລະ ພວກດຳເນີນການທີ່ຜິດກົດໝາຍອື່ນໆໄດ້ພະຍາຍາມທີ່ຈະຫຼົບຫຼີກມາດຕະການລົງໂທດ ສະຫະລັດ ແລະ ສາກົນ, ໂດຍສະເພາະຜ່ານການລະເມີດສະກຸນເງິນດິຈິຕອລ. ພວກເຮົາຈະເພັ່ງເລັງໃສ່ການປົກປ້ອງລະບົບການເງິນ ສະຫະລັດ ແລະ ສາກົນຕໍ່ພວກທີ່ພະຍາຍາມຈະເອົາລັດເອົາປຽບເທັກໂນໂລຈີນີ້, ພ້ອມກັບຄວາມສ່ຽງດ້ານການເງິນທີ່ຜິດກົດໝາຍອື່ນໆໃນລະບົບນິເວດຊັບສິນທາງຄອມພິວເຕີ.”
ໃນການຕອບໂຕ້ຕໍ່ການບຸກລຸກ ຢູເຄຣນ ຢ່າງຜິດກົດໝາຍຂອງ ຣັດເຊຍ ເມື່ອເດືອນກຸມພາ 2022, ຫ້ອງການຄວບຄຸມຊັບສິນຕ່າງປະເທດ ໄດ້ວາງມາດຕະການລົງໂທດໃສ່ລະບົບການເງິນ ຣັດເຊຍ. ໃນເດືອນມີນາ 2022, ນາງ ສດາໂນວາ ໄດ້ຊ່ວຍເຫຼືອພວກລູກຄ້າຊາວ ຣັດເຊຍ ໃນການປິດບັງແຫຼ່ງທີ່ມາຂອງຊັບສິນຂອງພວກເຂົາ ເພື່ອທີ່ຈະໂອນເງິນຫຼາຍກວ່າ 2 ລ້ານ 3 ແສນໂດລາເຂົ້າໄປໃນຢູໂຣບຕາເວັນຕົກ ຜ່ານບັນຊີການລົງທຶນທີ່ໄດ້ເປີດຢ່າງບໍ່ຖືກຕ້ອງ ແລະ ການຊື້ອະສັງຫາລິມະຊັບ. ກິດຈະກຳດ້ານການເງິນທີ່ຜິດກົດໝາຍຊະນິດນີ້ສາມາດໃຊ້ເພື່ອຫຼົບຫຼີກມາດຕະການລົງໂທດ ສະຫະລັດ ແລະ ສາກົນ ທີ່ສ້າງຄວາມເສຍຫາຍຕໍ່ ຣັດເຊຍ ແລະ ປະຕິເສດການເຂົ້າເຖິງຂອງບຸກຄົນ ຣັດເຊຍ ແລະ ອົງກອນທີ່ຖືກມາດຕະການລົງໂທດ ຕໍ່ລະບົບການເງິນສາກົນ.
ນາງ ສດາໂນວາ ໄດ້ດຳເນີນການໂອນແລກປ່ຽນເງິນຕາດິຈິຕອລ ຕາງໜ້າໃຫ້ພວກຜູ້ມີອຳນາດຜູ້ທີ່ໄດ້ຍ້າຍຖິ່ນຖານໄປຕ່າງປະເທດ. ໃນນຶ່ງກໍລະນີ, ຜູ້ມີອຳນາດ ຣັດເຊຍ ຄົນນຶ່ງໄດ້ຂໍໃຫ້ນາງ ສດາໂນວາ ຍ້າຍເຖິງນຫຼາຍກວ່າ 100 ລ້ານໂດລາໃນຊັບສິນ ຕາງໜ້າພວກເຂົາໃຫ້ ສະຫະລັດ ອາຣັບ ເອມີເຣັສ.
ນາງ ສດາໂນວາ ຍັງໄດ້ສະໜອງການບໍລິການໃຫ້ຫຼາຍບຸກຄົນທີ່ເຊື່ອມໂຍງກັບກຸ່ມຮຽກຄ່າໄຖ່ທາງຄອມພິວເຕີຊື່ວ່າ Russia Ryuk. ໃນປີ 2021, ນາງ ສດາໂນວາ ໄດ້ຟອກເງິນຫຼາຍກວ່າ 2 ລ້ານ 3 ແສນໂດລາ ຂອງຜູ້ຕ້ອງສົງໄສເປັນຜູ້ເຄາະຮ້າຍ ໃນການຈ່າຍເງິນ ຕາງໜ້າໃຫ້ສະມາຊິກຂອງກຸ່ມຮຽກຄ່າໄຖ່ Ryuk ນັ້ນ.
ສະຫະລັດ ແມ່ນມີຄວາມມຸ່ງໝັ້ນທີ່ຈະປ້ອງກັນຄວາມຖືກຕ້ອງຕາມກົດໝາຍຂອງລະບົບການເງິນຂອງເຂົາເຈົ້າ. ໂຄສົກກະຊວງການຕ່າງປະເທດ ທ່ານ ແມັດທິວ ມິລເລີ ໄດ້ກ່າວໃນຖະແຫຼງການສະບັບນຶ່ງວ່າ “ພວກເຮົາຈະສືບຕໍ່ໃຊ້ທຸກເຄື່ອງມືທີ່ມີຢູ່. ເພື່ອແນເປົ້າໃສ່ອາຊະຍາກຳທາງໄຊເບີທີ່ອາໄສຢູ່ ຣັດເຊຍ ແລະ ຕອບໂຕ້ຕໍ່ໄພຂົ່ມຂູ່ຈາກການຮຽກຄ່າໄຖ່ທາງຄອມພິວເຕີ ດ້ວຍການປະສານງານກັບຄູ່ຮ່ວມໃນປະເທດ ແລະ ສາກົນ.”