ບົດບັນນາທິການ ທີ່ສະທ້ອນເຖິງນະໂຍບາຍ ຂອງລັດຖະບານສະຫະລັດ
ເມື່ອສອງປີກ່ອນ ໃນວັນທີ 11 ກໍລະກົດ 2021 ປະຊາຊົນຊາວຄິວບາຫຼາຍສິບພັນຄົນ ໄດ້ພາກັນລົງສູ່ຖະໜົນຫົນທາງ ເພື່ອປະທ້ວງຕໍ່ຕ້ານລັດຖະບານ ກ່ຽວກັບການຂາດແຄນຢາປົວພະຍາດ ເຊື້ອໄຟ ແລະອາຫານການກິນ ຕະຫຼອດທັງການຢຽບຢ່ຳສິດທິມະນຸດຂອງພວກເຂົາເຈົ້າ.
ກຳລັງຮັກສາຄວາມສະຫງົບໄດ້ຕອບໂຕ້ດ້ວຍລະເບີດນ້ຳຕາ ແລະການທຸບຕີ. ມີຫຼາຍໆພັນຄົນໄດ້ຖືກຈັບ ຮວມທັງ ນັກເຄື່ອນໄຫວເພື່ອສິດທິມະນຸດຄົນສຳຄັນໆ ນັກສິນລະປິນ ແລະພວກຜູ້ນຳສາສະໜາ.
ພວກທີ່ຖືກຈັບຫຼາຍຄົນ ມີລາຍງານວ່າ ໄດ້ຮັບການປະຕິບັດຕໍ່ ແບບໂຫດຮ້າຍປ່າເຖື່ອນ ແລະທຳລາຍກຽດສັກສີ ຢູ່ໃນຄຸກ. ທ່ານໂຮເຊ ດານຽນ ແຟເຣີ ກາເຊຍແມ່ນຕົວຢ່າງອັນນຶ່ງທີ່ກ່າວເຖິງ. ອີງຕາມລາຍງານດ້ານສິດທິມະນຸດສະບັບຫຼ້າສຸດຂອງກະຊວງການຕ່າງປະເທດສະຫະລັດແລ້ວ ທ່ານໄດ້ຖືກຂັງດ່ຽວນັບແຕ່ໄດ້ຖືກຈັບ ຢູ່ຫ້ອງຂັງ ທີ່ບໍ່ປ່ອງຢ້ຽມຫຼືເຄື່ອງລະບາຍອາກາດ. ຫ້ອງຂັງຂອງທ່ານແມ່ນໄຕ້ໄຟຕະຫຼອດ 24 ຊົ່ວໂມງຕໍ່ມື້ ໃນລະຫວ່າງປີທີ່ແລ້ວ.
ນັກສິນລະປິນທີ່ຖືກຄຸມຂັງ ທ່ານຫຼຸຍມານູແອລ ໂອເຕໂຣ ອາລການຕາຣາ ເມື່ອໄວໆມານີ້ ໄດ້ພິມເຜີຍແຜ່ ຈົດໝາຍສະບັບນຶ່ງ ໃນໜັງສືພິມ Miami Herald ທີ່ມີຊື່ວ່າ “ເຈົ້າໜ້າທີ່ຄິວບາ ໄດ້ລັກຂະໂມຍ ເອົາຄວາມໜຸ່ມແໜ້ນຂອງຂ້ອຍໄປ ຍ້ອນໄດ້ເວົ້າຄວາມຈິງຈາກໃຈ.” ທ່ານຂຽນວ່າ “ໃນທຸກມື້ນີ້ ພວກຊາວໜຸ່ມຄິວບາທຸກໆຄົນ ແມ່ນນັກໂທດການເມືອງ. ນັກສິນລະປິນທີ່ຖືກກວດກາ. ຜູ້ລີ້ໄພການເມືອງ ຢູ່ໃນ ແລະຢູ່ນອກຄິວບາ.”
“ທັງໝົດທີ່ພວກເຮົາເຮັດໄປ ແມ່ນທວງເອົາສິດທິ ເພື່ອເລືອກເອົາອະນາຄົດທາງດ້ານການເມືອງຂອງພວກເຮົາແລະເພື່ອສະແດງອອກຊຶ່ງຄວາມໃນໃຈຂອງພວກເຮົາ.”
“ບໍ່ມີຜູ້ໃດຄວນຈະເສຍສະຫຼະຄວາມໜຸ່ມແໜ້ນຂອງເຂົາເຈົ້າ ເພື່ອເຫດຜົນແຫ່ງຄວາມເປັນທຳ” ທ່ານໄດ້ສະຫລຸບ.
ທ່ານອາລການຕາຣາເລີ້ມອົດອາຫານ ແລະນ້ຳ ປະທ້ວງເມື່ອວັນທີ 6 ມິຖຸນາ ແລະກໍບໍ່ມີຜູ້ໃດໄດ້ຮັບຂ່າວຄາວຈາກທ່ານ ນັບຕັ້ງແຕ່ນັ້ນມາ ອີງຕາມທ່ານໂກລ-ເດຍ ເຈັນຫຼຸຍ ນັກເຄື່ອນຄິວບາ ພ້ອມທັງເປັນເພື່ອນຂອງທ່ານອາລການຕາຣາ.
ໂຄສົກກະຊວງການຕ່າງປະເທດສະຫະລັດ ທ່ານແມັດທິວ ມີລເລີ ກ່າວຢູ່ໃນຖະແຫຼງຂ່າວວ່າ “ໂລກຈະບໍ່ຫຼົງລືມ ຜູ້ທີ່ມີຄວາມກ້າຫານເຫຼົ່ານັ້ນ ທີ່ໄດ້ສົ່ງສຽງຂອງພວກເຂົາເຈົ້າອອກມາ ທ່າມກາງການກົດຂີ່ຢ່າງຮຸນແຮງ ຮວມທັງ 700 ຄົນ ທີ່ຍັງສືບຕໍ່ຖືກຄຸມຂັງຢູ່ໃນຄຸກຂອງຄິວບາ ຊຶ່ງໄດ້ຮັບໂທດຈຳຄຸກຫຼາຍເຖິງ 25 ປີ ຍ້ອນໄດ້ຊົມໃຊ້ ອິດສະຫຼະພາບຂອງພວກເຂົາເຈົ້າ ໃນການສະແດງຄວາມຄິດຄວາມເຫັນ ແລະການໂຮມຊຸມນຸມແບບສັນຕິ.
ລັດຖະບານສະຫະລັດ ໄດ້ລົງໂທດຫຼາຍໆຮອບ ແລະຈຳກັດການອອກວີຊາ ທີ່ແນເປົ້າໝາຍໃສ່ສ່ວນບຸກຄົນແລະບໍລິສັດຫ້າງຮ້ານ ທີ່ພົວພັນກັບການລະ ເມີດສິດທິມະນຸດ ຮວມທັງການປະຕິບັດແບບໂຫດຮ້າຍຕໍ່ພວກປະທ້ວງໃນວັນທີ 11 ກໍລະກົດ. ໂຄສົກມິລເລີກ່າວວ່າ ສະຫະລັດຂໍຮຽກຮ້ອງ “ໃຫ້ປ່ອຍໃນທັນທີ ພວກນັກໂທດການເມືອງທີ່ຖືກຄຸມຂັງຢ່າງບໍ່ເປັນທຳແລະຮຽກຮ້ອງໃຫ້ປະຊາຄົມນາໆຊາດ ຮ່ວມກັນກັບພວກເຮົາ ທວງໃຫ້ລັດຖະບານຄິວາ ປ່ອຍພວກນັກຮຽນນັກສຶກສາຫຼາຍຮ້ອຍຄົນ ນັກຂ່າວ ນັກສິນລະປິນ ພວກຊາວໜຸ່ມແລະບຸກຄົນອື່ນໆທີ່ຖືກຄຸມຂັງຢ່າງບໍ່ເປັນທຳ.”