ບົດບັນນາທິການ ທີ່ສະທ້ອນເຖິງນະໂຍບາຍ ຂອງລັດຖະບານສະຫະລັດ
ໃນການປະສານງານກັບສາທາລະນະລັດເກົາຫຼີ ສະຫະລັດອີກເທື່ອນຶ່ງໄດ້ແນເປົ້າໝາຍໃສ່ກິດຈະກຳທາງໄຊເບີ້ທີ່ມີເຈດຕະນາຮ້າຍຂອງສາທາລະນະລັດປະຊາທິປະໄຕເກົາຫຼີ ຫຼື ສປປ ເກົາຫຼີ.
ເມື່ອວັນທີ 23 ພຶດສະພາຜ່ານມາ ກະຊວງການເງິນຂອງສະຫະລັດໄດ້ປະກາດ ການລົງໂທດຕໍ່ 4 ບໍລິສັດ ແລະສ່ວນບຸກຄົນຜູ້ນຶ່ງ ທີ່ໄດ້ຊຸກເຊື່ອງລາຍໄດ້ແລະມີການພົວພັນກັບການປະຕິບັດງານແບບຜິດກົດໝາຍຂອງພວກຄົນງານໄອທີ ເພື່ອໃຫ້ການສະໜັບສະໜຸນທາງດ້ານການເງິນຕໍ່ໂຄງການອາວຸດທີ່ມີອະນຸພາບຮ້າຍແຮງແລະລູກສອນໄຟຂີປະນາວຸດຜິດກົດໝາຍຂອງອຳນາດການປົກຄອງເກົາຫຼີເໜືອ.
ອີງຕາມລາຍງານຂອງຄະນະນັກຊ່ຽວຊານສະຫະປະຊາຊາດ ເມື່ອເດືອນມີນາປີ 2023 ທີ່ໄດ້ອ້າງໂດຍກະຊວງການເງິນນັ້ນ ໃນປີ 2022 ພວກໂຈມຕີເຈາະຂໍ້ມູນຂອງ ສປປ ເກົາຫຼີ ໄດ້ລັກຂະໂມຍເງິນດີຈີຕອລ ຫຼາຍກວ່າໃນປີ ທີ່ຜ່ານໆມາ ຊຶ່ງກະປະມານວ່າ ຢູ່ໃນລະຫວ່າງ 630 ລ້ານໂດລາ ຫາຫຼາຍກວ່ານຶ່ງຕື້ໂດລາ.
ເພື່ອປາບປາມກິດຈະກຳໃນທຳນອງນີ້ ສະຫະລັດໄດ້ລະບຸຊື່ ມະຫາວິທະຍາໄລພຽງຢາງໂອໂຕເມເຊິ່ນ ຊຶ່ງເປັນສະຖາບັນຊັ້ນແນວໜ້າໃນການສິດສອນດ້ານໄຊເບີ້ຂອງ ສປປ ເກົາຫຼີ. ຮວມຢູ່ໃນບັນດາຜູ້ທີ່ໄດ້ຮັບການຝຶກແອບນັ້ນ ແມ່ນພວກເຈາະຂໍ້ມູນ ທີ່ໄປເຮັດວຽກໃຫ້ແກ່ໜ່ວຍງານໄຊເບີ້ທີ່ມີຄວາມສຳພັນກັບຫ້ອງການສອດແນມ ຫຼື RGB ຊຶ່ງເປັນອົງການສືບລັບອັນດັບນຶ່ງຂອງປະເທດ.
ນອກນັ້ນແລ້ວ ຫ້ອງການສືບລັບທາງດ້ານເທັກນິກ ທີ່ RGB ຄວບຄຸມ ແລະໜ່ວຍງານໄຊເບີ້ ທີ່ເອີ້ນວ່າ ສູນການຄົ້ນຄວ້າ 110 ກໍໄດ້ຖືກລະບຸຊື່ເຊັ່ນດຽວກັນ. ຫ້ອງການສືບລັບທາງດ້ານເທັກນິກເປັນຜູ້ນຳພາໃນການພັດທະນາກົນລະຍຸດ ກ່ຽວກັບການບຸກໂຈມຕີທາງໄຊເບີ້ແລະເຄື່ອງມືຕ່າງໆແລະກໍຄວບຄຸມຫຼາຍກົມກອງ ຮວມທັງພວກເຄືອຂ່າຍ ທີ່ສະຫະລັດລະບຸຊື່ ກຸ່ມລາຊາຣັສ ຊຶ່ງເປັນກຸ່ມທີ່ຮັບຜິດຊອບໃນການປຸ້ນເງິນດີຈີຕອລ ທີ່ໃຫຍ່ທີ່ສຸດເທົ່າທີ່ເຄີຍມີມາ ໂດຍລັກຂະໂມຍເອົາເງິນ 620 ລ້ານໂດລາ.
ສະຫະລັດ ພ້ອມໆກັນ ກັບສາທາລະນະລັດເກົາຫຼີ ຕ່າງກໍໄດ້ລະບຸຊື່ບໍລິສັດການຮ່ວມມືຂໍ້ມູນເທັກໂນໂລຈີ ຈິນຢອງ ທີ່ມີສຳນັກງານຕັ້ງຢູ່ ສປປ ເກົາຫຼີ ແລະຜູ້ຕາງໜ້າຄົນນຶ່ງຂອງບໍລິສັດ ທ້າວກິມ ຊາງແມນ ຊຶ່ງເປັນຜູ້ບໍລິຫານງານ ຢູ່ນະຄອນວລາດີວອສຕອກ ປະເທດຣັດເຊຍ. ບໍລິສັດຈິນຢອງແລະທ້າວກິມ ໄດ້ຖືກລົງໂທດຍ້ອນມີການພົວພັນ ກັບກິດຈະການຄົນງານໄອທີຂອງ ສປປ ເກົາຫຼີ.
ສປປ ເກົາຫຼີ ສ້າງລາຍໄດ້ທີ່ສຳຄັນ ຈາກການສົ່ງພວກຄົນງານໄອທີ ທີ່ມີຄວາມສາມາດສູງໄປເຮັດວຽກຢູ່ໃນທົ່ວໂລກ ໂດຍໃຊ້ພິກແພງເພື່ອເຂົ້າເຮັດວຽກໃຫ້ແກ່ບໍລິສັດຕ່າງໆ ຮວມທັງໃນອຸດສາຫະກຳດ້ານເທັກໂນໂລຈີແລະເງິນດີຈີຕອລ. ລາຍໄດ້ຈາກພວກຄົນງານເຫຼົ່ານີ້ ແມ່ນປະກອບສ່ວນເຂົ້າໃນໂຄງການອາວຸດທີ່ມີອະນຸພາບຮ້າຍແຮງຢ່າງຜິດກົດໝາຍ ແລະລູກສອນໄຟຂີປະນາວຸດ.
ດັ່ງທີ່ຮອງລັດຖະມົນຕີກະຊວງການເງິນຮັບຜິດຊອບໃນດ້ານກໍ່ການຮ້າຍແລະສືບລັບ ທ່ານບຣາຍແອນ ແນລສັນ ໄດ້ຂຽນລົງໃນຖະແຫຼງການວ່າ “ສະຫະລັດແລະບັນດາປະເທດພາຄີ ແມ່ນມີຄວາມໝັ້ນໝາຍທີ່ຈະປາບປາມກິດຈະກຳທີ່ສ້າງລາຍໄດ້ແບບຜິດກົດໝາຍຂອງ ສປປ ເກົາຫຼີ ແລະການສືບຕໍ່ໃນຄວາມພະຍາຍາມ ເພື່ອລັກຂະໂມຍເອົາເງິນຈາກສະຖາບັນການເງິນຕ່າງໆ ບ່ອນແລກປ່ຽນເງິນດີຈີຕອລ ບັນດາບໍລິສັດ ແລະສ່ວນບຸກຄົນ ຢູ່ໃນທົ່ວໂລກ.”