ສະຫະລັດ ໄດ້ສົ່ງເຮືອບິນໄປໜ່ານຟ້າສາກົນໃນທະເລຈີນຕາເວັນອອກໃຕ້ ເພື່ອຊ່ວຍປົກປ້ອງເສລີພາບຂອງການບິນ ແລະ ການເດີນເຮືອເປັນເວລາຫຼາຍທົດສະວັດ, ແລະ ເຂົາເຈົ້າກໍຈະສືບຕໍ່ເຮັດແນວນັ້ນ. ແນວໃດກໍ່ຕາມ, ພຶດຕິກຳທີ່ເປັນອັນຕະລາຍຂອງຄົນຂັບເຮືອບິນ ຈີນ ເມື່ອບໍ່ດົນມານີ້ໄດ້ສະແດງໃຫ້ເຫັນຄວາມມຸ່ງໝັ້ນຂອງສາທາລະນະລັດ ປະຊາຊົນ ຈີນ “ເພື່ອບັງຄັບການປ່ຽນແປງການປະຕິບັດກິດຈະກຳທີ່ຖືກຕ້ອງຕາມກົດໝາຍຂອງ ສະຫະລັດ, ອີງຕາມການກ່າວຂອງທ່ານ ອີລາຍ ແຣັດເນີ, ຮອງລັດຖະມົນຕີປ້ອງກັນປະເທທີ່ຮັບຜິດຊອບສຳລັບບັນຫາຄວາມປອດໄພເຂດອິນໂດ-ປາຊີຟິກ.
ຮອງລັດຖະມົນຕີ ແຣັດເນີ ໄດ້ກ່າວວ່າເຫດການທີ່ “ມີຄວາມສ່ຽງ ແລະ ການບັງຄັບ ໂດຍກອງທັບປົດປ່ອຍປະຊາຊົນຖືກພິຈາລະນາດັ່ງກັບ “ແນວໂນ້ມທີ່ໜ້າເປັນຫ່ວງ.”
ທ່ານໄດ້ກ່າວວ່າ “ນັບຕັ້ງແຕ່ລະດູໃບໄມ້ຫຼົ່ນຂອງປີ 2021, ພວກເຮົາໄດ້ເຫັນເຫດການຕ່າງໆຫຼາຍກວ່າ 180 ຄັ້ງ, ເກີດຂຶ້ນໃນສອງປີທີ່ຜ່ານມາຫຼາຍກວ່ານຶ່ງທົດສະວັດກ່ອນໜ້ານັ້ນ. ນັ້ນແມ່ນເກືອບ 200 ກໍລະນີທີ່ຜູ້ປະຕິບັດການຂອງກອງທັບປົດປ່ອຍປະຊາຊົນໄດ້ປະຕິບັດການຊ້ອມລົບທີ່ບໍ່ລະມັດລະວັງ ຫຼື ເອົາມາດຕະການປ້ອງກັນຕອບໂຕ້ ຫຼື ຍິງແປວໄຟ ຫຼື ບິນເຂົ້າໃກ້ຢ່າງວ່ອງໄວ ຫຼື ໃກ້ເຮືອບິນ ສະຫະລັດ ໃກ້ເກີນໄປ, ທັງໝົດນັ້ນເປັນສ່ວນນຶ່ງຂອງການພະຍາຍາມແຊກແຊງຄວາມສາມາດຂອງກອງກຳລັງ ສະຫະລັດ ເພື່ອປະຕິບັດງານຢ່າງປອດໄພໃນສະຖານທີ່ຕ່າງໆທີ່ພວກເຮົາ ແລະ ທຸກປະເທດຢູ່ໃນໂລກມີສິດທຸກຢ່າງທີ່ຈະໄດ້ຮັບການປົກປ້ອງໂດຍກົດໝາຍສາກົນ.”
ໃນວັນທີ 17 ຕຸລາ, ກະຊວງປ້ອງກັນປະເທດໄດ້ເປີດເຜີຍພາບທີ່ບໍ່ເປັນຄວາມລັບອີກຕໍ່ໄປ ແລະ ວິດີໂອ ກ່ຽວກັບ ການເຂົ້າສະກັດກັ້ນຈຳນວນນຶ່ງ.
ຮອງລັດຖະມົນຕີ ແຣັດເນີ ໄດ້ກ່າວວ່າ “ຮູບພາບ ແລະ ວິດີໂອດັ່ງກ່າວນີ້ແມ່ນກະຈ່າງແຈ້ງ.”
ທ່ານໄດ້ກ່າວວ່າ “ທັກສະ ແລະ ຄວາມເປັນມືອາຊີບຂອງບັນດາສະມາຊິກທະຫານ ອາເມຣິກັນ ບໍ່ຄວນເປັນສິ່ງດຽວທີ່ຂັດຂວາງພວກນັກບິນລົບຂອງກອງທັບປົດປ່ອງປະຊາຊົນ ແລະ ອັນຕະລາຍ, ແມ່ນກະທັ້ງອຸບັດຕິເຫດທີ່ເຖິງແກ່ຊີວິດ, ແລະ ຫຼາຍຄັ້ງຕໍ່ຫຼາຍຄັ້ງ, ນັ້ນແມ່ນສິ່ງທີ່ໄດ້ປ້ອງກັນໄພພິບັດບໍ່ໃຫ້ເກີດຂຶ້ນໃນທະເລຈີນຕາເວັນອອກ ແລະ ໃຕ້.”
ບັນດາພັນທະມິດ ແລະ ຄູ່ຮ່ວມຂອງ ສະຫະລັດ ໄດ້ສະແດງຄວາມຍິນດີຕໍ່ການມີໜ້າຂອງ ອາເມຣິກາ ຢູ່ໃນພາກພື້ນ, ອີງຕາມການກ່າວຂອງຮອງລັດຖະມົນຕີ ແຣັດເນີ, “ເພາະວ່າມັນຈະພັດທະນາວິໄສທັດຮ່ວມກັນຂອງພວກເຮົາສຳລັບເຂດອິນໂດ-ປາຊີຟິກທີ່ເສລີ ແລະ ເປີດກວ້າງ. ເມື່ອປຽບທຽບກັບການປະພຶດທີ່ບີບບັງຄັບ ແລະ ສ່ຽງຂອງກອງທັບປົດປ່ອຍປະຊາຊົນນັ້ນ, ໄດ້ພະຍາຍາມທີ່ຈະຂົ່ມຂູ່ ແລະ ບັງຄັບບັນດາສະມາຊິກຂອງປະຊາຄົມສາກົນໃຫ້ຍອມສະຫຼະສິດທິຂອງເຂົາເຈົ້າພາຍໃຕ້ກົດໝາຍສາກົນ.”
ຮອງລັດຖະມົນຕີ ແຣັດເນີ ໄດ້ກ່າວຢ້ຳວ່າ ສະຫະລັດ ໄດ້ພະຍາຍາມທີ່ຈະສ້າງຕັ້ງຄືນການສື່ສານລະຫວ່າງກອງທັບໃນລະດັບສູງກັບສາທາລະນະລັດປະຊາຊົນ ຈີນ ເພື່ອປ້ອງກັນ “ການແຂ່ງຂັນບໍ່ໃຫ້ຫັນເຂົ້າໄປຫາຄວາມຂັດແຍ້ງ,” ແລະ ສະຫະລັດ ຈະຕ້ອງໄດ້ທຳຄວາມກ້າວໜ້າໃນຄວາມພະຍາຍາມທີ່ວ່ານັ້ນ.
ແນວໃດກໍ່ຕາມ, ທ່ານໄດ້ກ່າວຢ້ຳວ່າ ສະຫະລັດ “ຈະສືບຕໍ່ສົ່ງເຮືອບິນ, ເດີນເຮືອ, ແລະ ປະຕິບັດການຢ່າງປອດໄພ ແລະ ມີຄວາມຮັບຜິດຊອບ, ໃນບ່ອນໃດກໍ່ຕາມທີ່ກົດໝາຍສາກົນອານຸຍາດໃຫ້ໄປ. ກອງກຳລັງຂອງພວກເຮົາໄດ້ຊ່ວຍຮັກສາສັນຕິພາບ ແລະ ຄວາມໝັ້ນຄົງໃນເຂດອິນໂດ-ປາຊີຟິກເປັນເວລາຫຼາຍທົດສະວັດ, ແລະ ພວກເຮົາຈະສືບຕໍ່ເຮັດແນວນັ້ນທຸກວັນ.”