ບົດບັນນາທິການ ທີ່ສະທ້ອນເຖິງນະໂຍບາຍ ຂອງລັດຖະບານສະຫະລັດ
ມັນຕ້ອງມີຄວາມເປັນທຳສຳລັບປະຊາຊົນຊາວຢູເຄຣນຫຼາຍໆລ້ານຄົນທີ່ຊີວິດຂອງພວກເຂົາເຈົ້າ ໄດ້ຖືກລົບກວນແລະທຳລາຍ ຈາກສົງຄາມຮຸກຮານທີ່ບໍ່ມີການເກາະຜິດ ແລະລິເລີ້ມໂດຍປະທານາທິບໍດີຣັດເຊຍ ທ່ານວລາດີເມຍ ປູຕິນ, ນັ້ນຄືຄຳປະກາດຂອງ ເອກອັກຄະລັດຖະທູດ ຮັບຜິດຊອບກ່ຽວກັບຄວາມຍຸຕິທຳຂອງໂລກ ທ່ານນາງເບັດ ແວນ ແຊັກ ໃນການໃຫ້ການຕໍ່ສະພາເມື່ອໄວໆມານີ້.
ສະຫະລັດພວມດຳເນີນງານຫຼາຍເສັ້ນທາງ ເພື່ອນຳເອົາໂຕພວກທີ່ຮັບຜິດຊອບຕໍ່ການກະທຳຜິດເຫຼົ່ານີ້ມາລົງໂທດ. ເອກອັກຄະລັດຖະທູດແຊັກ ກ່າວວ່າ ທຳອິດແມ່ນພົວພັນກັບສານລະຫວ່າງປະເທດແລະສະຖາບັນຕ່າງໆ.
“ຄວາມພະຍາຍາມຂອງພວກເຮົາ ຢູ່ນີ້ ແມ່ນຮວມທັງເຮັດວຽກເພື່ອສ້າງຕັ້ງແລະຫຼັງຈາກນັ້ນກໍຟື້ນຟູສິດອຳນາດຂອງກຳມາທິການສືບສວນສະຫະປະຊາຊາດທີ່ອຸທິດຕົນໃນເລື້ອງຢູເຄຣນ. ມີການຍື່ນຄຳຮ້ອງໄປຍັງພະແນກກົນໄກມົສກູຂອງອົງການຄວາມໝັ້ນຄົງແລະການຮ່ວມມືໃນຢູໂຣບ. ນອກນັ້ນ ພວກເຮົາຍັງໄດ້ຊອກຫາຊ່ອງທາງທີ່ຈະເຂົ້າແຊກແຊງ ໃນຄະດີຂອງຢູເຄຣນຕໍ່ຣັດເຊຍ ພາຍໃຕ້ສົນທິສັນຍາການຂ້າລ້າງເຊື້ອຊາດເຜົ່າພັນ ຂອງສານຍຸຕິທຳລະຫວ່າງປະເທດ. ແລະຫຼັງຈາກນັ້ນ ໃນທີ່ສຸດ… ຕໍ່ໄອຍະການຂອງສານອາຍາສາກົນ ຊຶ່ງໄດ້ປະສົບຜົນ ສຳລັບດ້ວຍການອອກໝາຍຈັບສອງຄົນ.”
ເສັ້ນທາງທີສອງໄປສູ່ຄວາມຍຸຕິທຳ ແມ່ນແນໃສ່ເພື່ອເສີມຂະຫຍາຍ ແລະເພີ້ມຄວາມສາມາດາຂອງສະຖາບັນຕ່າງໆໃນຢູເຄຣນເພື່ອຈົດບັນທຶກ ສືບສວນແລະດຳເນີນຄະດີຟ້ອງຮ້ອງຕໍ່ອາຊະຍາກຳຕ່າງໆ ຢູ່ໃນສານຂອງຢູເຄຣນເອງ ນັ້ນຄື ການໃຫ້ຄຳອະທິບາຍຂອງເອກອັກຄະລັດຖະທູດແວນ ແຊັກ.
“ຫ້ອງການອະທິໄອຍະການຂອງຢູເຄຣນ … ໃນເວລານີ້ ໄດ້ຈົດບັນທຶກເກືອບທັງໝົດ 90,000 ອາຊະຍາກຳທີ່ສາມາດດຳເນີນຄະດີໄດ້. ໂດຍຜ່ານກຸ່ມໃຫ້ຄຳແນະນຳກ່ຽວກັບການກໍ່ອາຊະຍາກຳທີ່ໂຫດຮ້າຍທາລຸນ… ພວກເຮົາໄດ້ສະໜອງການຊ່ວຍເຫຼືອດ້ານນັກຊ່ຽວຊານແລະການໃຫ້ຄຳແນະນຳ ເສີມສ້າງຄວາມອາດສາມາດ ການຝຶກແອບພວກນັກຊ່ຽວຊານ ຫຼືຄວາມຕ້ອງການຕ່າງໆໃນດ້ານກົດໝາຍແລະການສືບສວນຂອງອະທິໄອຍະການ.… ນີ້ແມ່ນຮວມທັງການເພັ່ງເລັງຄວາມສົນໃຈໃສ່ຄວາມຮຸນແຮງທາງເພດທີ່ພົວພັນກັບບັນຫາຂັດແຍ້ງ.”
ເອກອັກຄະລັດຖະທູດແຊັກ ໃຫ້ການອະທິບາຍວ່າ “ເສັ້ນທາງທີສາມໄປສູ່ຄວາມຍຸຕິທຳກໍຄືໃຫ້ການສະໜັບສະໜຸນໃນການຟ້ອງຮ້ອງຍຸດທະສາດ ທີ່ອາດເກີດຂຶ້ນໃນປະເທດທີສາມ” ຮວມທັງໃນຢູໂຣບ.
ການດຳເນີນຄະດີກ່ຽວກັບອາຊະຍາກຳໃນການຮຸກຮານແມ່ນອີກວິທີການນຶ່ງຂອງຄວາມຍຸຕິທຳ ເອກອັກຄະລັດຖະທູດແວນ ແຊັກ ກ່າວ:
“ການອະນຸຍາດ ບໍ່ໃຫ້ມີການຖືກລົງໂທດ ໃນການເຮັດສົງຄາມຮຸກຮານແບບຜິດກົດໝາຍຂອງຣັດເຊຍຈະເຮັດໃຫ້ຜູ້ກະທຳອື່ນໆ ມີຄວາມກ້າຫານ ທີ່ຈະທຳການລ່ວງລະເມີດຢ່າງເປີດແປນທີ່ຄ້າຍຄືກັນນີ້ ຕໍ່ອະທິປະໄຕຂອງປະເທດ ຜືນແຜ່ນດິນອັນຄົບຖ້ວນແລະຄວາມເປັນເອກກະລາດທາງການເມືອງ. ຍ້ອນເຫດຜົນອັນນີ້ ພວກເຮົາຈຶ່ງໃຫ້ການສະໜັບສະໜຸນຕໍ່ການສ້າງຕັ້ງສານພິເສດທີ່ອຸທິດຕົນໃນການດຳເນີນຄະດີ ກ່ຽວກັບການກໍ່ອາຊະຍາກຳໃນການຮຸກຮານຕໍ່ພວກທີ່ຮັບຜິດຊອບຫຼາຍທີ່ສຸດ.”
ເອກອັກຄະລັດຖະທູດແວນ ແຊັກ ປະກາດວ່າ “ມັນຈະບໍ່ສາມາດມີສັນຕິພາບທີ່ໝັ້ນຄົງ ຫຼືຍືນຍົງໄດ້ ໂດຍປາສະຈາກຄວາມຍຸຕິທຳ. ການຖືວ່າຣັດເຊຍ ເປັນຜູ້ຮັບຜິດຊອບຕໍ່ອາຊະຍາກຳສົງຄາມ ອາຊະຍາກຳຕ້ານມະນຸດຊາດ ແລະການກໍ່ໂທດກຳອື່ນໆຢູ່ໃນປະເທດຢູເຄຣນ ແລະຕໍ່ປະຊາຊົນຊາວຢູເຄຣນນັ້ນ ແມ່ນພື້ນຖານ ໃນການປ້ອງກັນຫຼັກຄຸນຄ່າຂອງສະຫະລັດ ແລະຍັງເປັນການຮັກສາເພື່ອໃຫ້ໂລກຂອງເຮົາມີສັນຕິພາບ ຄວາມຍຸຕິທຳ ແລະຄວາມໝັ້ນຄົງ.”