ບົດບັນນາທິການ ທີ່ສະທ້ອນເຖິງນະໂຍບາຍ ຂອງລັດຖະບານສະຫະລັດ
ເຖິງແມ່ນອົງປະກອບອັນສຳຄັນ ໃນການຢຸດຍິງທີ່ໄກ່ເກ່ຍໂດຍອົງການສະຫະປະຊາຊາດ ລະຫວ່າງລັດຖະບານເຢເມນແລະພວກກະບົດຮູຕີທີ່ໄດ້ຮັບການໜຸນຫຼັງຈາກອີຣ່ານ ຍັງໄດ້ຮັບການເຄົາລົບຢູ່ຕໍ່ມາກໍຕາມ ແຕ່ສະຫະລັດຍັງສືບຕໍ່ມີຄວາມເປັນຫ່ວງກັງວົນຢ່າງເລິກເຊິ່ງ ກ່ຽວກັບວ່າ ພວກກະບົດຮູຕີບໍ່ໄດ້ກຳນົດເສັ້ນທາງຂອງການເຈລະຈາໄປສູ່ການມີສັນຕິພາບແບບຍືນຍົງ ແລະແທນທີ່ໄດ້ມີການເອົາບາດກ້າວ ຊຶ່ງເປັນການບ່ອນທຳລາຍ ຕໍ່ຄວາມພະຍາຍາມເພື່ອສ້າງສັນຕິພາບແລະຂົ່ມຂູ່ທີ່ຈະນຳເອົາຊາວເຢເມນໃຫ້ກ້າວເຂົ້າສູ່ວົງຈອນຂອງຄວາມຮຸນແຮງແບບໄຮ້ຈຸດໝາຍແລະຄວາມທຸກທໍລະມານ.
“ການໂຈມຕີຂອງພວກກໍ່ການຮ້າຍຮູຕີເມື່ອໄວໆມານີ້ ຕໍ່ສາງເກັບນ້ຳມັນອາລ-ດາບາ (al-Dhaba) ແລະ ທ່າກຳປັ່ນການາ (Qana) ແມ່ນເປັນທີ່ຮັບເອົາບໍ່ໄດ້” ນັ້ນຄືຄຳປະກາດຂອງເອກອັກຄະລັດຖະທູດ ຣິເຈີດ ມີລສ໌ ຮອງຜູ້ຕາງໜ້າຂອງສະຫະລັດ ປະຈຳອົງການສະຫະປະຊາຊາດ ໃນລະຫວ່າງກອງປະຊຸມຄັ້ງວັນທີ 22 ພະຈິກຜ່ານມາຂອງສະພາຄວາມໝັ້ນຄົງອົງການສະຫະປະຊາຊາດກ່ຽວກັບເຢເມນ.
“ມັນເປັນການສົບປະໝາດຕໍ່ປະຊາຊົນຊາວເຢເມນ ແລະປະຊາຄົມນາໆຊາດທັງມວນ. ການໂຈມຕີເຫຼົ່ານີ້ຂອງພວກກະບົດຮູຕີຕໍ່ກຳປັ່ນພານິດ ທີ່ຂົນສົ່ງສິນຄ້າອັນຈຳເປັນ ແມ່ນມີຜົນໂດຍກົງເຮັດໃຫ້ຊາວເຢເມນໄດ້ຮັບຄວາມທຸກທໍລະມານເພີ້ມຂຶ້ນ ແລະຂົ່ມຂູ່ທີ່ຈະເຮັດໃຫ້ປະເທດດັ່ງກ່າວກ້າວກັບຄືນສູ່ບັນຫາຂັດແຍ້ງ.”
ຍິ່ງໄປກວ່ານັ້ນ ກອງທັບເຮືອຂອງສະຫະລັດຢຶດໄດ້ວັດສະດຸຮ້າຍແຮງທີ່ເປັນອົງປະກອບສຳລັບໃຊ້ເປັນເຊື້ອໄຟຂອງລູກສອນໄຟແລະດິນລະເບີດ 170 ໂຕນທີ່ເຊື່ອງໄວ້ຢູ່ເທິງສຳເພົາລຳນຶ່ງ ທີ່ມຸ່ງໜ້າຈາກອີຣ່ານໄປສູ່ເຢເມນ ເມື່ອວັນທີ 16 ພະຈິກທີ່ຜ່ານມານີ້. ການຢຶດອົງປະກອບ ຂອງເຊື້ອໄຟດັ່ງກ່າວ ແມ່ນພຽງພໍໃນການໃຊ້ສຳລັບລູກສອນໄຟຂີປະນາວຸດຂະໜາດກາງສິບກວ່າລູກ.
ເອກອັກຄະລັດຖະທູດມິລສ໌ກ່າວວ່າ “ການກະທຳເຫຼົ່ານີ້ມີແຕ່ຈະເຮັດໃຫ້ເສດຖະກິດຂອງເຢເມນ ຊຸດໂຊມລົງຕື່ມ ນຳໄປສູ່ການເສຍຊີວິດຂອງພົນລະເຮືອນຄືນອີກ ແລະເຮັດໃຫ້ວິກິດການດ້ານມະນຸດສະທຳຮ້າຍແຮງຕື່ມຂຶ້ນ.”
“ພວກເຮົາຂໍຮຽກຮ້ອງໃຫ້ກະບົດຮູຕີຈົ່ງເອົາເສັ້ນທາງໃໝ່. ຍາດເອົາໂອກາດອັນນີ້ແລະເລືອກເອົາການສິ້ນສຸດລົງຂອງສົງຄາມທີ່ຮ້າຍແຮງ 8 ປີ. ພວກເຮົາຂໍຮຽກຮ້ອງໃຫ້ກະບົດຮູຕີດຳເນີນການພົວພັນດ້ວຍຄວາມຈິງໃຈ ຕໍ່ການເຈລະຈາທີ່ນຳພາໂດຍອົງການສະຫະປະຊາຊາດແລະນຳເອົາເຢເມນກັບຄືນໄປສູ່ເສັ້ນທາງສັນຕິພາບ ໂດຍຜ່ານການເຈລະຈາ ຮວມທັງການຕົກລົງທາງດ້ານການເມືອງທີ່ນຳພາໂດຍຊາວເຢເມນ. ຊາວເຢເມນຫຼາຍໆລ້ານຄົນພວມຮຽກຮ້ອງໃຫ້ມີສັນຕິພາບ ຄວາມເປັນທຳ ແລະສະຖຽນລະພາບທາງດ້ານເສດຖະກິດ. ບໍ່ມີການແກ້ໄຂທາງທະຫານຕໍ່ບັນຫາຂັດແຍ້ງນີ້.”
ຂໍ້ຕົກລົງກ່ຽວກັບຂັ້ນຕອນສັນຕິພາບ ມີແຕ່ຈະເຮັດໃຫ້ເຢເມນກ້າວໄປສູ່ເສັ້ນທາງໃນການຟື້ນໂຕຄືນໄດ້ຫຼາຍຂຶ້ນແລະໃຫ້ຜົນປະໂຫຍດຕື່ມຂຶ້ນຕໍ່ຊາວເຢເມນ ເຊັ່ນວ່າ ການຈ່າຍເງິນເດືອນໃຫ້ແກ່ພະນັກງານຂອງລັດຖະບານ ການເປີດຫົນທາງ ເປີດຖ້ຽວບິນເພີ້ມຂຶ້ນ ແລະຈັດແຈງຂັ້ນຕອນໃນການນຳເຂົ້າສິນຄ້າ.
ທູດພິເສດຂອງສະຫະລັດ ຮັບຜິດຊອບກ່ຽວກັບເລື້ອງເຢເມນ ທ່ານທິມ ເລັນເດີຄິງ ກ່າວວ່າ “ໃນໂອກາດເວລາທີ່ຫຼໍ່ແຫຼມສຳຄັນນີ້ ພວກເຮົາຂໍເຕືອນກະບົດຮູຕີວ່າ ຊາວເຢເມນກຳລັງຮຽກຮ້ອງໃຫ້ມີສັນຕິພາບ ບໍ່ຄວນກັບຄືນໄປສູ່ສົງຄາມອີກພວກເຮົາຂໍຮຽກຮ້ອງໃຫ້ກະບົດຮູຕີຈົ່ງຍາດເອົາໂອກາດອັນນີ້ເພື່ອໃຫ້ມີສັນຕິພາບ ຮ່ວມມືກັບສະຫະປະຊາຊາດ ແລະຍອມຮັບວ່າ ມີແຕ່ເສັ້ນທາງດຽວໄປໜ້າ ເພື່ອຍຸຕິສົງຄາມ ແຫ່ງການທຳລາຍລ້າງ 8 ປີ ແມ່ນໂດຍຜ່ານການເຈລະຈາ ການຕົກລົງກັນທາງດ້ານການເມືອງ ທີ່ປະກອບດ້ວຍທຸກພັກຝ່າຍຂອງຊາວເຢເມນ.