ບົດບັນນາທິການ ທີ່ສະທ້ອນເຖິງນະໂຍບາຍ ຂອງລັດຖະບານສະຫະລັດ
ສະຫະລັດ ຂໍປະນາມຢ່າງແຮງ ຕໍ່ການຕັດສິນໃຈຕາມລຳພັງແຕ່ພຽງຝ່າຍດຽວໂດຍເຈົ້າໜ້າທີ່ຊູດານ ເພື່ອປ່ອຍໂຕທ້າວອັບແດລ-ຣາອຸບ ອາບູຊາອີດ ທີ່ ຖືກລະບຸໂຕເປັນພິເສດວ່າເປັນຜູ້ກໍ່ການຮ້າຍຂອງໂລກ. ທ້າວອາບູຊາອີດໄດ້ຖືກຕັດສິນໂທດພ້ອມກັບບຸກຄົນອື່ນໆ ຍ້ອນສັງຫານ ນັກການທູດສະຫະລັດ ທ່ານ ຈອນ ແກຣນວິລ ແລະ ທ່ານອັບແດລຣາມານ ອັບບາສ ປະຊາຊົນຊູດານ ຊຶ່ງທັງສອງທ່ານ ຕ່າງກໍເຮັດວຽກ ໃຫ້ແກ່ອົງການຢູເສດ ທີ່ນະຄອນຫຼວງຄາຣ໌ທູມ ໃນປີ 2008.
ທ່ານຈອນ ແກຣນວິລ ມີອາຍຸ 33 ປີ ເວລາທ່ານຖືກຍິງຕາຍ ໃນການໂຈມຕີຂອງພວກກໍ່ການຮ້າຍ. ທ່ານໄດ້ເຮັດວຽກກ່ຽວກັບໂຄງການປະຊາທິປະໄຕແລະການປົກຄອງໃຫ້ແກ່ອົງການຢູເສດເພື່ອສະໜັບສະໜຸນຂໍ້ຕົກລົງສັນຕິພາບຄັ້ງປະຫວັດສາດ ທີ່ເຮັດໃຫ້ສົງຄາມກາງເມືອງເປັນເວລາດົນນານໃນຊູດານສິ້ນສຸດລົງ. ສ່ວນທ່ານອັບແດລຣາມານ ອັບບາສ ທີ່ມີອາຍຸ 39 ປີແມ່ນນຶ່ງໃນສະມາຊິກຕົ້ນຕໍ ຂອງທີມງານຮັບມືກັບໄພພິບັດອົງການຢູເສດໃນເຂດດາຟົວ.
ທ້າວອາບູຊາອີດ ໄດ້ຖືກພົບເຫັນວ່າມີຄວາມຜິດ ແລະຕັດສິນປະຫານຊີວິດຍ້ອນລາວໄດ້ພົວພັນໃນການສັງຫານດັ່ງກ່າວ. ເມື່ອວັນທີ 30 ມັງກອນ 2023 ສານສູງສຸດຂອງຊູດານໄດ້ສັ່ງໃຫ້ປ່ອຍໂຕຜູ້ກ່ຽວ. ໂຄສົກຂອງກະຊວງການຕ່າງປະເທດສະຫະລັດ ທ່ານເນດ ໄພຣສ໌ ກ່າວວ່າ “ຊູດານອ້າງວ່າ ຄອບຄົວຂອງທ່ານແກຣນວິລໄດ້ໃຫ້ອະໄພຍະໂທດນັ້ນ ແມ່ນບໍ່ຖືກຕ້ອງ. ພວກເຮົາຂໍຮຽກຮ້ອງໃຫ້ລັດຖະບານຊູດານ ນຳໃຊ້ທຸກຊ່ອງທາງ ທາງດ້ານກົດໝາຍທີ່ມີຢູ່ ເພື່ອຕ່າວປີ້ນການຕັດສິນນີ້ ແລະຈັບກຸມທ້າວອາບູຊາອີດຄືນອີກ.”
ໃນຖະແຫຼງການທີ່ເປັນລາຍລັກອັກສອນນັ້ນ ຫົວໜ້າອົງການຢູເສດ ທ່ານນາງຊາແມ່ນຕາ ພາວເວີ ກ່າວວ່າ “ການຂາດຄວາມໂປ່ງໃສກ່ຽວກັບຂັ້ນຕອນທາງດ້ານກົດໝາຍ ໄດ້ນຳໄປສູ່ການປ່ອຍໂຕຜູ້ສັງຫານທ່ານຈອນແລະທ່ານອັບແດລຣາມານ ແມ່ນເປັນສິ່ງທີ່ຮັບເອົາບໍ່ໄດ້ ແລະການປະກາດຢືນຢັນວ່າ ການຕົກລົງສອງຝ່າຍໃນການກ່າວອ້າງທາງດ້ານກົດໝາຍລະຫວ່າງສະຫະລັດກັບຊູດານໃນປີ 2020 ເຮັດຂຶ້ນເພື່ອໃຫ້ອະໄພຍະໂທດ ແກ່ທ້າວອາບູຊາອີດນັ້ນ ແມ່ນບໍ່ຖືກຕ້ອງແລະມີການເຂົ້າໃຈຜິດ. …..ພວກເຮົາຈະສືບຕໍ່ ຊຸກຍູ້ໃຫ້ມີການຮັບເອົາຄວາມຮັບຜິດຊອບໂດຍເຕັມ ແລະຂ້າພະເຈົ້າພ້ອມທັງຄອບຄົວຂອງອົງການຢູເສດທັງໝົດ ແມ່ນຂໍສະແດງຄວາມເສົ້າສະຫຼົດໃຈຢ່າງເລິກເຊິ່ງຕໍ່ຄອບຄົວຂອງທ່ານຈອນແລະທ່ານອັບແດລຣາມານ ໃນຂະນະທີ່ພວກເຂົາເຈົ້າຍັງສືບຕໍ່ທົນທຸກຈາກຄວາມຕົກໃຈຢ່າງແຮງໃນການສັງຫານບຸກຄົນທີ່ພວກເຂົາເຈົ້າຮັກ” ນັ້ນຄືຄຳເວົ້າຂອງເອກອັກຄະລັດຖະທູດພາວເວີ. “ໃນຂະນະທີ່ພວກເຮົາພວກເຮັດວຽກ ເພື່ອເປັນກຽດໃຫ້ແກ່ຄວາມຊົງຈຳແກ່ທ່ານຈອນແລະທ່ານອັບແດລຣາມານ ແລະຊອກຫາທາງນຳເອົາມືສັງຫານພວກທ່ານມາລົງໂທດນັ້ນ ພວກເຮົາຍັງສືບຕໍ່ມີຄວາມໝັ້ນໝາຍ ຕໍ່ປະຊາຊົນຊາວຊູດານ ແລະຄວາມປາຖະໜາຢ່າງແຮງກ້າຂອງພວກເຂົາເຈົ້າທີ່ຢາກມີປະເທດຊາດທີ່ມີສັນຕິພາບ ແລະເປັນປະຊາທິປະໄຕ.”
ໂຄສົກກະຊວງການຕ່າງປະເທດ ທ່ານເນດ ໄພຣສ໌ ໃຫ້ຂໍ້ສັງເກດວ່າ ສະຫະລັດຍັງຈະສືບຕໍ່ພົວພັນກັບເຈົ້າໜ້າທີ່ຊູດານໃນລະດັບສູງສຸດ ແລະທວງໃຫ້ເຂົາເຈົ້າເອົາມາດຕະການຕໍ່ບັນຫາທີ່ຫຼໍ່ແຫຼມສຳຄັນນີ້.
“ຄວາມປອດໄພຂອງປະຊາຊົນສະຫະລັດ ແລະເຈົ້າໜ້າທີ່ສະຖານທູດຢູ່ໃນຕ່າງປະເທດ ຍັງແມ່ນບູລິມະສິດອັນສູງສຸດຂອງລັດຖະບານຊຸດນີ້” ທ່ານໄພຣສ໌ ໄດ້ປະກາດ “ພວກເຮົາຈະບໍ່ຍອມຜ່ອນຜັນ.”