ບົດບັນນາທິການ ທີ່ສະທ້ອນເຖິງນະໂຍບາຍ ຂອງລັດຖະບານສະຫະລັດ
ມີປະຊາຊົນຫຼາຍກວ່າ 41,000 ຄົນເສຍຊີວິດ ແລະຫຼາຍສິບພັນຄົນໄດ້ຮັບບາດເຈັບ ຍ້ອນແຜ່ນດິນໄຫວທີ່ມີຄວາມແຮງ 7.8 ເກີດຂຶ້ນໃນປະເທດເທີກີແຢແລະຊີເຣຍ ເມື່ອວັນທີ 6 ກຸມພາ ທີ່ຜ່ານມາ. ແຜ່ນດິນໄຫວເລີ້ມຂຶ້ນໃນຕອນເຊົ້າມືດ ຊຶ່ງຫຼາຍໆຄົນຍັງພາກັນຫຼັບນອນຢູ່ຈຶ່ງເຮັດໃຫ້ພວກເຂົາເຈົ້າຕິດຄ້າງຢູ່ກ້ອງຊາກຫັກພັງຂອງເຮືອນຊານບ້ານຊ່ອງ.
ພວກທີມງານກຳລັງເຮັດວຽກຢ່າງບໍ່ຮູ້ອຶດເມື່ອຍ ເພື່ອຊ່ວຍເອົາພວກທີ່ລອດຊີ
ວິດອອກມາ ແລະອົງການໃຫ້ຄວາມຊ່ວຍເຫຼືອຕ່າງໆເຕືອນວ່າ ຫິມະຕົກແລະອາກາດໜາວ ຕະຫຼອດທັງການຂາດແຄນນ້ຳ ການຕິດຕໍ່ສື່ສານ ແລະໄຟຟ້າອາດຈະເປັນອຸບປະສັກ ຕໍ່ການດຳເນີນຄວາມພະຍາຍາມຂອງເຂົາເຈົ້າ. ມີຫຼາຍກວ່າ 100,000 ຄົນໄດ້ຮັບບາດເຈັບຢູ່ໃນຊີເຣຍ ແລະເທີກີແຢ ອີງຕາມໂຕເລກຂອງລັດຖະບານເທີກີແຢ ໜ່ວຍກູ້ໄພໝວກກັນກະທົບຂາວ ແລະສື່ມວນຊົນ. ໃນການຖະແຫຼງຕໍ່ກອງປະຊຸມສຳພາດຂ່າວທີ່ເມືອງອອສມານີເຢ ປະທານາທິບໍດີ ຣີເຊັບ ຕາຍຢິບ ເອີດວານ ກ່າວວ່າ ມີຕຶກອາຄານ 6,444 ຫຼັງໄດ້ພັງລົງໃນເຫດແຜ່ນດິນໄຫວໃນເທື່ອນີ້. ທີມງານຈາກ 20 ກວ່າປະເທດພວມໃຫ້ຄວາມຊ່ວຍເຫຼືອແກ່ເຈົ້າໜ້າທີ່ຮັບມືກັບເຫດການສຸກເສີນຢູ່ໃນທ້ອງຖິ່ນຂອງເທີກີແຢ ໃນການກູ້ໄພແລະຟື້ນໂຕຄືນ.
ການສົ່ງຄວາມຊ່ວຍເຫຼືອໄປຍັງຊີເຣຍ ແມ່ນເປັນບັນຫາທ້າທາຍ ຍ້ອນວ່າ ອຳນາດການປົກຄອງຊີເຣຍຈຳກັດໃນການເຄື່ອນຍ້າຍຄວາມຊ່ວຍເຫຼືອຢູ່ພາຍໃນປະເທດ. ມີດ່ານຂ້າມຊາຍແດນແຕ່ພຽງແຫ່ງດຽວ ທີ່ອົງການສະຫະປະຊາຊາດ ໄດ້ຮັບອະນຸຍາດໃຫ້ນຳໃຊ້ ເພື່ອຂົນການຊ່ວຍເຫຼືອຈາກເທີກີແຢເຂົ້າໄປໃນພາກຕາເວັນຕົກສຽງເໜືອຂອງຊີເຣຍ ໄດ້ມີການປິດເປັນການຊົ່ວຄາວ ຫຼັງຈາກໄດ້ເກີດແຜ່ນດິນໄຫວ ຈຶ່ງເປັນອຸບປະສັກຕໍ່ການບັນເທົາທຸກ. ເມື່ອວັນທີ 9 ກຸມພາຜ່ານມານີ້ ຂະບວນລົດຂົນສົ່ງສະຫະປະຊາຊາດ ໃນທີ່ສຸດ ກໍສາມາດຂ້າມຊາຍແດນຈາກປະເທດເທີກີແຢ ເຂົ້າໄປໃນພາກຕາເວັນຕົກສຽງເໜືອຂອງຊີເຣຍເປັນເທື່ອທຳອິດນັບແຕ່ໄດ້ເກີດແຜ່ນດິນໄຫວ.
ໃນການຖະແຫຼງຂ່າວ ເມື່ອໄວໆມານີ້ ລັດຖະມົນຕີການຕ່າງປະເທດສະຫະລັດທ່ານແອນໂທນີ ບລິງເກັນ ໄດ້ສະແດງຄວາມເສົ້າເສຍໃຈ ຕໍ່ການເສຍຊີວິດ “ເປັນຈຳນວນຫຼວງຫຼາຍແບບບໍ່ໜ້າເຊື່ອ ແລະຕື່ນຕົກໃຈ” ຢູ່ໃນເທີກີແຢ ແລະປະເທດຊີເຣຍ. ລັດຖະມົນຕີບລິງເກັນ ກ່າວວ່າ:
“ພວກເຮົາ ຂ້າພະເຈົ້າຄິດ ພ້ອມກັບປະຊາຊົນຢູ່ໃນທົ່ວໂລກ ພວມໄວ້ທຸກໃຫ້ແກ່ພວກທີ່ສູນເສຍຊີວິດ ແລະຄວາມຄິດຂອງພວກເຮົາ ແມ່ນຢູ່ກັບ ຜູ້ທີ່ສູນເສຍຄົນທີ່ຮັກຫອມ.”
ລັດຖະມົນຕີບລິງເກັນ ກ່າວສະຫຼຸບສູ່ຟັງວ່າ ສະຫະລັດພວມເຮັດຫຍັງ ເພື່ອໃຫ້ການຊ່ວຍເຫຼືອໃນເວລານີ້ ຊຶ່ງທ່ານກ່າວຕື່ມວ່າ:
“ມາຮອດປັດຈຸບັນ ພວກເຮົາໄດ້ສົ່ງໜ່ວຍຊອກຄົ້ນແລະກູ້ໄພໄປຍັງປະເທດເທີກີແຢຫຼາຍກວ່າ 150 ຄົນ. ພວກເຮົາໄດ້ສົ່ງເຮລີຄອບເຕີ້ ຂອງສະຫະລັດ ໄປຍັງເຂດທີ່ເຂົ້າເຖິງຍາກ. ຢູ່ຊີເຣຍ ພວກເຮົາກໍໄດ້ໃຫ້ອົງການຈັດຕັ້ງ ທີ່ບໍ່ຂຶ້ນກັບລັດຖະບານທີ່ເປັນພາຄີ ເຊັ່ນພວກໝວກກະທົບຂາວ ທີ່ພວກເຮົາໃຫ້ທຶນສະໜັບສະ
ໜຸນເປັນເວລາ 2 ປີ ເພື່ອສະໜອງການຊ່ວຍຊີວິດນັບແຕ່ໄດ້ເກີດແຜ່ນດິນໄຫວ
ເປັນຕົ້ນມາ. ຢູ່ໃນທັງສອງປະເທດ ພວກເຮົາໄດ້ສົ່ງຜູ້ຈັດການ ທີ່ມີປະສົບການ
ຮັບມືກັບເຫດສຸກເສີນ ນັກເຕັກນິກກ່ຽວກັບວັດຖຸທີ່ເປັນອັນຕະລາຍ ນັກວິສະວະກອນ ນັກລໍຈິສຕິກ ບຸກຄະລາກອນການແພດ ພວກວາງແຜນ ແລະອືນໆພ້ອມກັບເຄື່ອງແລະອຸບປະກອນພິເສດໜັກ 170,000 ປອນ.”
ລັດຖະມົນຕີການຕ່າງປະເທດບລິງເກັນກ່າວວ່າ “ພວກເຮົາໄດ້ຕັດສິນໃຈ ທີ່ຈະເຮັດສິ່ງທັງໝົດເຫຼົ່ານັ້ນ ເທົ່າທີ່ພວກເຮົາສາມາດ ເພື່ອໃຫ້ຄວາມຊ່ວຍເຫຼືອແກ່ຜູ້ປະສົບໄພແຜ່ນດິນໄຫວ ຢູ່ໃນຊຸມມື້ ຊຸມອາທິດ ແລະຊຸມເດືອນຕໍ່ໜ້າ.”