ບົດບັນນາທິການ ທີ່ສະທ້ອນເຖິງນະໂຍບາຍ ຂອງລັດຖະບານສະຫະລັດ
ນັບເປັນເວລານຶ່ງປີຜ່ານມາແລ້ວ ທີ່ຍິງສາວອີຣ່ານເຊື້ອສາຍເຄີດ ນາງມາຊາ ອາມີນີ ໄດ້ເສຍຊີວິດ ໃນລະຫວ່າງການຄວບຄຸມຕົວຂອງຕຳຫຼວດສິນທຳທີ່ມີຊື່ສຽງບໍ່ຄ່ອຍດີຂອງອີຣ່ານ. ນາງໄດ້ຖືກຈັບ ຍ້ອນໃສ່ຜ້າຄຸມຫົວທີ່ບໍ່ເໝາະສົມ. ການປະທ້ວງທີ່ຕິດຕາມມາ ຊຶ່ງນຳພາໂດຍພວກແມ່ຍິງ ແລະຍິງສາວ ແລະໄດ້ຮ່ວມສົມທົບ ດ້ວຍພວກອ້າຍນ້ອງ ພໍ່ ແລະ ລູກຊາຍ ແມ່ນການເດີນຂະບວນປະທ້ວງຕໍ່ຕ້ານລັດຖະບານ ທີ່ໄດ້ດຳເນີນໄປຢ່າງຂຸ້ນຂ້ຽວທີ່ສຸດ ແລະ ຢູ່ໃນວົງ ກວ້າງ ນັບຕັ້ງແຕ່ໄດ້ມີການກໍ່ຕັ້ງສາທາລະນະລັດອິສລາມ ໃນປີ 1979.
ອຳນາດການປົກຄອງໄດ້ຕອບໂຕ້ດ້ວຍການປາບປາມທີ່ໂຫດຮ້າຍທາລຸ: ມີຫຼາຍຮ້ອຍຄົນໄດ້ຖືກຂ້າຕາຍ ຫຼາຍສິບພັນຄົນໄດ້ຖືກຈັບ ແລະຢ່າງໜ້ອຍ 7 ຄົນໄດ້ຖືກປະຫານຊີວິດ.
ໃນການຖະແຫຼງ ເນື່ອງໃນໂອກາດວັນຄົບຮອບການເສຍຊີວິດຂອງນາງມາຊາ ອາມີນີນີ້ ປະທານາທິບໍດີໂຈ ໄບເດັນ ກ່າວວ່າ “ທ່າມກາງການກົດຂີ່ ແລະຄວາມຮຸນແຮງທີ່ຍັງດຳເນີນຢູ່ຕໍ່ມາ ປະຊາຊົນອີຮ່ານຍັງສືບຕໍ່ມີຄວາໝັ້ນໝາຍ ຕໍ່ຂະບວນການນີ້ ແລະການຕໍ່ສູ້ຂອງພວກເຂົາເຈົ້າເພື່ອການມີອະນາຄົດທີ່ເສລີ ແລະເປັນປະຊາທິປະໄຕ. ຊາວອີຣ່ານເທົ່ານັ້ນ ຈະເປັນຜູ້ຊີ້ຂາດ ກ່ຽວກັບຊະຕາກຳ ຂອງປະເທດເຂົາເຈົ້າ ແຕ່ສະຫະລັດຍັງມີຄວາມໝັ້ນໝາຍ ທີ່ຈະຢືນຢູ່ຄຽງຂ້າງກັບພວກເຂົາເຈົ້າ.”
ເມື່ອເບິ່ງຢ້ອນຄືນຫຼັງເມື່ອນຶ່ງປີຜ່ານມາ ປະທານາທິບໍດີໄບເດັນໄດ້ຊີ້ໃຫ້ເຫັນເຖິງການປຸກລະດົມພາຍໃຕ້ການນຳພາຂອງສະຫະລັດ ເພື່ອຂັບໄລ່ອີຣ່ານອອກຈາກກຳມາທິການສະຫະປະຊາຊາດ ຮັບຜິດຊອບເລື້ອງສະຖານະພາບແມ່ຍິງ ດ້ວຍການສ້າງຕັ້ງຄະນະກຳມາທິການ ຄົ້ນຫາຄວາມຈິງຂອງສະຫະປະຊາຊາດ ເພື່ອສືບສວນການລະເມີດສິດທິມະນຸດ ຂອງອຳນາດການປົກຄອງ ການຊ່ວຍເຫຼືອຂອງສະຫະລັດ ໃຫ້ແກ່ປະຊາຊົນຊາວອີຣ່ານເພື່ອເຂົ້າເຖິງອິນເຕີແນັດ ແລະຫຼີກລ່ຽງການກວດກາ. ຍິ່ງໄປກວ່ານັ້ນ ສະຫະລັດຍັງໄດ້ລົງໂທດ 70 ກວ່າຄົນແລະອົງການຕ່າງໆທີ່ໃຫ້ການສະໜັບສະໜຸນຕໍ່ການກົດຂີ່ຂອງອຳນາດການປົກຄອງ.
ເມື່ອວັນທີ 15 ກັນຍາຜ່ານມານີ້ ສະຫະລັດ ໄດ້ປະກາດການລົງໂທດເພີ້ມຕື່ມ ທີ່ແນໃສ່ ຊຶ່ງອີງຕາມຄຳເວົ້າ ຂອງປະທານາທິບໍດີໄບເດັນແລ້ວ “ການລະເມີດສິດທິມະນຸດທີ່ເປັນຕາຢ້ານຂອງອີຣ່ານຈຳນວນນຶ່ງ.”
ການລະບຸຊື່ ປະກາດໂດຍກະຊວງການເງິນສະຫະລັດ ໃນການປະສານງານກັບອັງກິດ ການາດາ ອອສເຕຣເລຍ ແລະພາຄີອື່ນໆ ທີ່ແນໃສ່ 29 ສ່ວນບຸກຄົນ ແລະອົງການທີ່ພົວພັນການເສຍຊີວິດ ຂອງນາງມາຊາ ອາມີນີ ແລະການສືບຕໍ່ດຳເນີນຄວາມຍາຍາມຂອງອຳນາດການປົກຄອງເພື່ອປິດປາກປິດສຽງຂອງພວກຄັດຄ້ານລັດຖະບານ. ການລະບຸຊື່ຍັງຮວມທັງພວກຜູ້ນຳກຳລັງຮັກສາຄວາມສະຫງົບຂອງອີຣ່ານ ຫົວໜ້າອົງການຄວບຄຸມຄຸກອີຣ່ານ 2 ບໍລິສັດທີ່ຊ່ວຍອຳນາດການປົກຄອງອີຣ່ານຄວບຄຸມກວດກາອິນເຕີແນັດ ແລະອົງການສື່ມວນຊົນທີ່ລັດຖະບານຄວບຄຸມຫຼາຍໆອົງການ.
ໃນອີກດ້ານນຶ່ງ ລັດຖະມົນຕີກະຊວງການຕ່າງປະເທດສະຫະລັດ ທ່ານແອນໂທນີ ບລິງເກັນ ໄດ້ປະກາດວ່າ ສະຫະລັດຈະເອົາບາດກ້າວເພື່ອທຳການລົງໂທດໃນດ້ານວີຊາຕໍ່ເຈົ້າໜ້າທີ່ແລະສ່ວນບຸກຄົນຊາວອີຣ່ານ 13 ຄົນໃນການພົວພັນຂອງພວກເຂົາ “ທີ່ໄດ້ຄຸມຂັງຫຼືສັງຫານພວກປະທ້ວງແບບສະຫງົບ ຫຼືການຢັບຢັ້ງສິດເສລີພາບໃນການສະແດງຄວາມຄິດຄວາມເຫັນ ຫຼືການໂຮມຊຸມນຸມກັນ.