ບົດບັນນາທິການ ທີ່ສະທ້ອນເຖິງນະໂຍບາຍ ຂອງລັດຖະບານສະຫະລັດ
ສະຫະລັດເສີມຂະຫຍາຍການເປັນພາຄີໃນທົ່ວທະວີບອາຟຣິກາ ຮວມທັງຢູ່ປະເທດການາ. ໃນລະຫວ່າງການຢ້ຽມຢາມຂອງທ່ານນາງ ຢູ່ທີ່ນັ້ນ ຮອງປະທານາທິບໍດີຄາມາລາ ແຮຣິສ ໄດ້ພົບປະກັບປະທານາທິບໍດີນານາ ອາກູໂຟ-ອັດໂດ ໂດຍໃຫ້ຂໍ້ສັງເກດ ເຖິງການຄວາມສຳພັນ ອັນເລິກເຊິ່ງ ທາງດ້ານປະຫວັດສາດ ວັດທະນະທຳ ແລະເສດຖະກິດ ລະຫວ່າງສະຫະລັດ ແລະການາ.
ການາ ໄດ້ກາຍເປັນແສງໄຟແຫ່ງປະຊາທິປະໄຕ ແລະຜູ້ປະກອບສ່ວນໃນການມີສັນຕິພາບແລະຄວາມໝັ້ນຄົງຂອງໂລກ ນັ້ນຄືຄວາມເຫັນຂອງຮອງປະທານາທິບໍດີແຮຣິສ ຊຶ່ງທ່ານນາງກ່າວຕື່ມວ່າ:
“ພວກເຮົາຊາບຊຶ້ງໃນການນຳພາຂອງທ່ານ ເພື່ອຮັບມືກັບການຖອຍຫຼັງຂອງປະຊາທິປະໄຕເມື່ອໄວໆມານີ້ ຢູ່ໃນເຂດອາຟຣິກາຕາເວັນຕົກ ແລະລຸກຂຶ້ນເພື່ອຫຼັກການປະຊາທິປະໄຕຢູ່ໃນທົ່ວໂລກ. ນອກນັ້ນ ພວກເຮົາຍັງຮັບຮູ້ໃນການປະກອບສ່ວນທີ່ສຳຄັນຂອງການາໃນເຂດຊາແຮລ ແລະຂ້າພະເຈົ້າຂໍຂອບອົກຂອບໃຈຕໍ່ການນຳພາຂອງທ່ານຢູ່ທີ່ນັ້ນ.”
ເພື່ອຊ່ວຍຮັບມືກັບໄພຂົ່ມຂູ່ຈາກພວກຫົວຮຸນແຮງຈັດແລະການບໍ່ມີສະຖຽນລະພາບ ຮອງປະທານາທິບໍດີແຮຣິສໄດ້ປະກາດວ່າ ສະຫະລັດຈະສະໜອງເງິນຫຼາຍກວ່າ 100 ລ້ານໂດລາ ເພື່ອສະໜັບສະໜຸນ ການສ້າງຄວາມທຸ່ນທ່ຽງຢູ່ໃນປະເທດການາ ເບນິນ ກົດດີວົວ ກີນີ ແລະໂຕໂກ ນີ້ແມ່ນຮວມທັງຢ່າງໜ້ອຍ 86 ລ້ານໂດລາ ສຳລັບໄລຍະ 3 ປີຕໍ່ໜ້າເພື່ອສະໜັບສະໜຸນແຜນການ 10 ປີ ໃນການຈັດຕັ້ງຍຸດທະສາດຂອງສະຫະລັດ ເພື່ອປ້ອງກັນບໍ່ໃຫ້ເກີດບັນຫາຂັດແຍ້ງແລະຊຸກຍູ້ສະຖຽນລະພາບ ທີ່ປະທານາທິບໍດີໂຈ ໄບເດັນໄດ້ເປີດເຜີຍເມື່ອວັນທີ 24 ມີນາຜ່ານມານີ້.
ຮອງປະທານາທິບໍດີແຮຣິສໄດ້ສະແດງຄວາມຊົມເຊີຍຕໍ່ການໃຫ້ຄວາມໝັ້ນໝາຍຂອງການາ ທີ່ຈະທຳການປະຕິຮູບເສດຖະກິດ ເພື່ອນຳໄປສູ່ການເຕີບໂຕແບບຍືນຍົງ ຊຶ່ງຮອງປະທານາທິບໍດີແຮຣິສກ່າວວ່າ:
“ຂ້າພະເຈົ້າຮັບຮູ້ບັນຫາທ້າທາຍຕ່າງໆທີ່ການາກຳລັງປະເຊີນໜ້າ ໂດຍສະເພາະແລ້ວແມ່ນຫຼັງຈາກເກີດໂຣກລະບາດຢູ່ໃນທົ່ວໂລກ ແລະການລົບກວນທີ່ເກີດຂຶ້ນຍ້ອນການຮຸກຮານຂອງຣັດເຊຍເຂົ້າໄປໃນຢູເຄຣນ…ພວກເຮົາຂໍສະໜັບສະໜຸນ ການພົວພັນຂອງການາກັບອົງການກອງທຶນສາກົນ IMF ແລະຈະສືບຕໍ່ຊຸກຍູ້ຜູ້ໃຫ້ສິນເຊື່ອສອງຝ່າຍ ສະໜອງການຫຼຸດຜ່ອນໜີ້ແບບມີຄວາມໝາຍ ໃຫ້ແກ່ປະເທດຕ່າງໆທີ່ມີຄວາມຕ້ອງການຮວມທັງການາ. ພວກເຮົາຕ້ອງໄດ້ເຮັດວຽກຮ່ວມກັນ ໃນຖານະທີ່ເປັນປະຊາຄົມນາໆຊາດ ເພື່ອຊ່ວຍບັນເທົາຕໍ່ການແບກຫາບໜີ້ສິນທີ່ກຳລັງປະເຊີນໜ້າ ກັບຫຼາຍປະເທດຈົນເກີນໄປ. ມັນມີຄວາມສຳຄັນທີ່ຕ້ອງໄດ້ດຳເນີນການແບບນີ້ ເພື່ອໃຫ້ມີການເຕີບໂຕຂອງເສດຖະກິດແລະຄວາມອຸດົມຮັ່ງມີໃນໄລຍະຍາວ ແລະເພີ້ມການລົງທຶນຂອງສະຫະລັດຕື່ມຂຶ້ນ.”
ຮອງປະທານາທິບໍດີແຮຣິສປະກາດວ່າ “ການເປັນພາຄີຂອງພວກເຮົາກັບການາ ແມ່ນມີຄວາມເຂັ້ມແຂງຢູ່ແລ້ວ ແລະດ້ວຍການຢ້ຽມຢາມ ໃນເທື່ອນີ້ “ທ່ານນາງກ່າວວ່າ “ຂ້າພະເຈົ້າເຊື່ອວ່າ ພວກເຮົາໄດ້ເສີມຄວາມເຂັ້ມແຂງ ໃຫ້ມັນໝັ້ນຄົງຕື່ມຂຶ້ນໄປອີກ.”