តទៅនេះ ជាបទវិចារណកថាដែលឆ្លុះបញ្ចាំងអំពីទស្សនៈរបស់រដ្ឋាភិបាលសហរដ្ឋអាមេរិក
សហរដ្ឋអាមេរិកនៅតែខ្វល់ខ្វាយខ្លាំងអំពីអំពើពុករលួយរាលដាលក្នុងប្រទេសលីបង់ហើយប្រឹងប្រែងយ៉ាងសកម្មដើម្បីប្រយុទ្ធប្រឆាំងនឹងអំពើពុករលួយក្នុងប្រទេសលីបង់និងនៅទូទាំងប្រទេស។
លោក Brian Nelson អនុរដ្ឋមន្ត្រីក្រសួងហិរញ្ញវត្ថុទទួលបន្ទុកខាងភេរវកម្មនិងការស៊ើបអង្កេតហិរញ្ញវត្ថុបានពន្យល់ថា ជាច្រើនឆ្នាំមកហើយ ពួកវរជនលីបង់មិនបានអើពើដល់ការអំពាវនាវរបស់សាធារណជនឱ្យមានតម្លាភាពនិងកំណែទម្រង់ នៅពេលធ្វើធនធានពួកគេកុំឱ្យចុះតម្លៃដោយបានផ្ទេរប្រាក់កាសរបស់ពួកគេផ្ទាល់ចេញពីប្រទេសទៅកាន់ប្រទេសផ្សេងទៀតៗ។
ជាផ្នែកមួយនៃការប្រឹងប្រែងរបស់សហរដ្ឋអាមេរិកដើម្បីប្រយុទ្ធនឹងអំពើពុករលួយក្នុងប្រទេសលីបង់ សហរដ្ឋអាមេរិកបានដាក់កំហិតការដាក់ទណ្ឌកម្មកាលពីថ្ងៃទី៤ ខែមេសាលើឈ្មោះ Raymond និងឈ្មោះ Teddy Rahme ដែលជាបងប្អូនពីរនាក់ដែលបានប្រើប្រាស់ក្រុមហ៊ុនរបស់ពួកគេដើម្បីឱ្យបានទទួលកិច្ចសន្យាខាងថាមពលតាមរយៈដំណើរការគ្មានតម្លៃភាពយ៉ាងខ្លាំងដែលធ្វើឱ្យមានផលប៉ះពាល់មិនល្អដល់ស្ថាប័នប្រជាធិបតេយ្យនិងនីតិរដ្ឋក្នុងប្រទេសលីបង់។
ក្រុមហ៊ុន ZR Energy DMCC របស់ឈ្មោះ Raymond Rahme បានទទួលកិច្ចសន្យារដ្ឋាភិបាលលីបង់កាលពីខែធ្នូឆ្នាំ២០១៩ដើម្បីដឹកជញ្ជូនប្រេងឥន្ធនៈ១៥០.០០០តោនចូលក្នុងប្រទេសសម្រាប់ជួយបញ្ចៀសកុំឱ្យមានវិបត្តិប្រេងក្នុងប្រទេសលីបង់។ ជាជាងដឹកជញ្ជូនចូលក្នុងប្រទេសនូវប្រេងឥន្ធនៈមានគុណភាព ក្រុមហ៊ុននេះបានដឹកជញ្ជូនផលិតផលមានតម្លៃថោកនិងគ្មានគុណភាព នាំឱ្យស្ថានីយ៍អគ្គិសនីខូចខាត។ បងប្អូនពីរនាក់នេះបានចំណេញពីគម្រោងការទុច្ចរិតនេះ ទោះជាប្រជារាស្ត្រលីបង់មានវិបត្តិរឹតតែធ្ងន់ធ្ងរថែមទៀត។
លោកអនុរដ្ឋមន្ត្រី Nelson បាននិយាយថានៅក្នុងប្រទេសភាគច្រើនការផលិតអគ្គិសនីជួយបង្កើនប្រាក់ចំណូលរបស់រដ្ឋ ប៉ុន្តែនៅលីបង់បែរជាផ្ទុយពីនេះ។
លោក Nelson បាននិយាយថា៖ «តែទោះជាបានចំណាយប្រាក់រាប់សិបពាន់លានដុល្លារកាលពីប៉ុន្មានទសវត្សរ៍កន្លងទៅនេះក៏ដោយ ក៏ក្រសួងអគ្គិសនីនិងក្រុមហ៊ុនអគ្គិសនីលីបង់បានធ្វើឱ្យក្រុមជនសាមញ្ញលីបង់ងាយរងគ្រោះដោយសារអ្វីដែលហៅថា «ពួក mafia ម៉ាស៊ីនភ្លើង» ហើយវិស័យអគ្គិសនីមានដំណើរការមិនល្អបានធ្វើឱ្យមូលនិធិរដ្ឋខ្សោះលុយហើយបានបង្កើនទឹកប្រាក់ក្នុងគណនេយ្យធនាគារបរទេសរបស់ក្រុមធុរជនលីបង់»។
លោកអនុរដ្ឋមន្ត្រី Nelson បានថ្លែងថា សហរដ្ឋអាមេរិកផ្តល់អាទិភាពដល់ការទទួលខុសត្រូវខ្ពស់ នីតិរដ្ឋនិងការធ្វើឱ្យមានលទ្ធិប្រជាធិបតេយ្យឡើងវិញនៅប្រទេសលីបង់ ដោយមិនគិតអំពីនិន្នាការនយោបាយឬជំនឿសាសនាទេ។
លោក Nelson បាននិយាយថា៖ «សហរដ្ឋអាមេរិកបានឮការអំពាវនាវរបស់អស់លោកអ្នកឱ្យមានតម្លាភាពនិងការទទួលខុសត្រូវខ្ពស់ អាមេរិកប្រាប់ក្រុមជនដែលជ្រើសរើសរវាងការប្រព្រឹត្តអំពើពុករលួយតទៅទៀតឬធ្វើឱ្យមានការផ្លាស់ប្តូរ ដឹងថាយើងនឹងបន្តដាក់ទណ្ឌកម្មលើក្រុមជនទាំងឡាយណាដែលយកផលប្រយោជន៍ ពីអំពើពុករលួយ ការសម្អាតលុយកខ្វក់និងគំរាមកំហែងប្រជារាស្ត្រលីបង់។ យើងអំពាវនាវដល់ពួកអ្នកនយោបាយលីបង់ឱ្យបញ្ចប់ភាពទាល់ច្រកនយោបាយ បោះឆ្នោតប្រធានាធិបតី បង្កើតរដ្ឋាភិបាលមួយនិងធ្វើការកែទម្រង់ដែលគេត្រូវការដើម្បីបើកផ្លូវឱ្យមានការរើបឡើងវិញនៃប្រទេសលីបង់»។
លោកអនុរដ្ឋមន្ត្រី Nelson បានមានប្រសាសន៍ថា៖ «នេះមិនមែនជាលើកដំបូងទេដែលយើងធ្វើសកម្មភាពប្រឆាំងនឹងពួកជនពុករលួយនៅប្រទេសលីបង់ ហើយប្រសិនបើសកម្មភាពពុករលួយនៅតែមានតទៅទៀត ការដាក់ទណ្ឌកម្មលើកនេះមិនមែនជាទណ្ឌកម្មចុងក្រោយបំផុតទេ»៕