តទៅនេះ គឺជាបទវិចារណកថាដែលឆ្លុះបញ្ចាំងអំពីទស្សនៈរបស់រដ្ឋាភិបាលសហរដ្ឋអាមេរិក
សហរដ្ឋអាមេរិក មានការបារម្ភជាខ្លាំងទៅលើសាលក្រមរបស់តុលាការជាន់ខ្ពស់ប្រជាជននៃរដ្ឋាភិបាលក្រុងហាណូយ ដែលបានតម្កល់សាលក្រមកាត់ទោស៩ឆ្នាំ លើអ្នកនិពន្ធនិងជាអ្នកសារព័ត៌មានដ៏ល្បីឈ្មោះគឺលោកស្រី Pham Doan Trang។ សមដូចអ្នកនាំពាក្យក្រសួងការបរទេសសហរដ្ឋអាមេរិក លោក Ned Price បានលើកឡើងនៅក្នុងសេចក្តីថ្លែងការណ៍មួយ ដោយបានបង្ហាញនូវក្តីបារម្ភរបស់សហរដ្ឋអាមេរិក ជុំវិញសាលក្រមរបស់តុលាជាន់ខ្ពស់វៀតណាមនេះថា លោកស្រី Trang ត្រូវបានទទួលស្គាល់ជាអន្តរជាតិទៅលើការងាររបស់លោកស្រី ក្នុងការលើកកម្ពស់សិទ្ធិមនុស្ស និងអភិបាលកិច្ចល្អនៅក្នុងប្រទេសវៀតណាម និងបានទទួលរង្វាន់ស្ត្រីក្លាហានអន្តរជាតិរបស់រដ្ឋមន្ត្រីការបរទេសអាមេរិក ក្នុងឆ្នាំ២០២២ ថែមទៀតផង។
លោកស្រី Trang ត្រូវបានចាប់ខ្លួនកាលពីខែតុលា ឆ្នាំ២០២០ និងត្រូវបានកាត់ទោសក្នុងខែធ្នូឆ្នាំ២០២១ ឱ្យជាប់ពន្ធនាគារចំនួន៩ឆ្នាំ ក្រោមមាត្រា១១៧នៃក្រមព្រហ្មទណ្ឌវៀតណាម ទាក់ទងនឹង បទចោទព្រហ្មទណ្ឌ ដូចជាការបង្កើត ការរក្សាទុក ការចែកចាយនិងផ្សព្វផ្សាយនូវព័ត៌មាន ឯកសារ និងសារផ្សេងៗទៀត ដែលប្រឆាំងទៅនឹងសាធារណរដ្ឋសង្គមនិយមវៀតណាម»។ អង្គការសិទ្ធិមនុស្សអន្តរជាតិ បានហៅមាត្រា១១៧នៃក្រមព្រហ្មទណ្ឌវៀតណាម ថាជាឧបករណ៍បំបិទសំឡេងបុគ្គលដែលហ៊ានរិះគន់រដ្ឋាភិបាលវៀតណាម បើទោះបីជាពួកគេជាអ្នកសារព័ត៌មាន អ្នកនិពន្ធ ឬជាប្រជាពលរដ្ឋធម្មតាដែលអនុវត្តនូវសិទ្ធិជាមូលដ្ឋាននៃការបញ្ចេញមតិដោយសេរីនោះក្តី។
ក្រុមការងាររបស់អង្គការសហប្រជាជាតិស្តីពីការឃុំខ្លួនតាមអំពើចិត្តបានរកឃើញថា ការឃុំខ្លួនលោកស្រី Trang ជាការឃុំខ្លួនតាមទំនើងចិត្ត និងរំលោភទៅលើកាតព្វកិច្ចនិងការប្តេជា្ញចិត្តស្តីពីសិទ្ធិមនុស្សជាអន្តរជាតិរបស់ប្រទេសវៀតណាម។ រដ្ឋាភិបាលវៀតណាម បានចាប់ឃុំខ្លួនលោកស្រី Trang ដោយគ្មានជម្រះក្តី អស់រយៈពេលមួយឆ្នាំ និងមិនផ្តល់មេធាវីការពារក្តីទៀត។
អ្នកនាំពាក្យក្រសួងការបរទេសអាមេរិកលោក Ned Price បានបន្ថែមទៀតថា សហរដ្ឋអាមេរិកបានជំរុញដល់ប្រទេសវៀតណាមឱ្យធានាផ្តល់សេវាកម្មសុខាភិបាល និងការអនុញ្ញាតឱ្យមានការពិនិត្យស្ថានភាពសុខភាពរបស់លោកស្រី Trang ផងដែរ។
នៅក្នុងរបាយការណ៍សិទ្ធិមនុស្សនាពេលថ្មីៗបំផុតរបស់ខ្លួន ក្រសួងការបរទេសសហរដ្ឋអាមេរិក បានដកស្រង់សម្តីក្រុមអង្គការក្រៅរដ្ឋាភិបាលដែលធ្វើការប៉ាន់ស្មានថា រហូតមកដល់ខែសីហា ឆ្នាំ២០២១ អាជ្ញាធរវៀតណាម បានឃុំខ្លួនមនុស្សប្រមាណពីចំនួន១៣០នាក់ដល់២៨៨នាក់ដោយសាររឿងនយោបាយ។ ក្រសួងការបរទេសសហរដ្ឋអាមេរិក ក៏បានលើកឡើងនៅក្នុងរបាយការណ៍ប្រចាំឆ្នាំរបស់ខ្លួនទៀតថា«ចាប់ពីថ្ងៃទី១ ខែមករា ដល់ថ្ងៃទី៩ខែវិច្ឆិកា ឆ្នាំ២០២១ អាជ្ញាធរវៀតណាម បានឃុំខ្លួនមនុស្សចំនួន២៩នាក់ និងកាត់ទោសមនុស្ស២៧នាក់ ដែលបានអនុវត្តនូវសិទ្ធិទទួលស្គាល់ជាអន្តរជាតិ ដូចជាការបញ្ចេញមតិ ការជួបជុំដោយសន្តិវិធី និងការបង្កើតសមាគមជាដើម»។
លោក Price និយាយថា៖ «ការបន្តឃុំឃំាងលោកស្រី Trang គឺជាឧទាហរណ៍ចុងក្រោយបំផុតមួយ នៅក្នុងការចាប់ខ្លួននិងកាត់ទោសដ៏គួឱ្យព្រួយបារម្ភ ទៅលើក្រុមបុគ្គលនៅក្នុងប្រទេសវៀតណាម ដែលបានសម្តែងមតិយោបល់របស់គេដោយសន្តិវិធីនោះ។ យើងសូមអំពាវនាវដល់រដ្ឋាភិបាលវៀតណាម ឱ្យដោះលែងលោកស្រី Trang និងអនុញ្ញាតឱ្យបុគ្គលទាំងអស់នៅក្នុងប្រទេសវៀតណាម អាចអនុវត្តនូវសិទ្ធិសេរីភាពនៃការបញ្ចេញមតិរបស់គេ ដោយគ្មានការភ័យខ្លាចនឹងការសងសឹកណាមួយ ដើម្បីឱ្យស្របទៅនឹងខ្លឹមសារនៃសិទ្ធិមនុស្សដែលមានចែងក្នុងរដ្ឋធម្មនុញ្ញវៀតណាម ក៏ដូចជាការប្តេជ្ញាចិត្តនិងកាតព្វកិច្ចជាអន្តរជាតិរបស់ប្រទេសវៀតណាមផងដែរ»។
បទវិចារណកថា៖ ការកាត់ទោសដ៏អយុត្តិធម៌ក្នុងប្រទេសវៀតណាម
អ្នកសារព័ត៌មានឯករាជ្យរបស់វៀតណាម គឺលោកស្រី Pham Doan Trang បង្ហាញខ្លួននៅក្នុងសវនាការបណ្តឹងឧទ្ធរណ៍របស់លោកស្រី កាលពីថ្ងៃទី២៥ ខែសីហា ឆ្នាំ ២០២២ នៅទីក្រុងហាណូយ។