តទៅនេះ គឺជាបទវិចារណកថាដែលឆ្លុះបញ្ចាំងពីទស្សនៈរបស់រដ្ឋាភិបាល អាមេរិកាំង
នៅថ្ងៃទី២៨ ខែឧសភា ឆ្នាំនេះ សភាប្រទេសហ្សកហ្ស៊ីដែលត្រូវបានគ្របដណ្តប់ដោយគណបក្សសុបិន្តហ្សកហ្ស៊ីឬ Georgian Dream Party បានអនុម័តច្បាប់មួយដែលមានឈ្មោះថា«តម្លាភាពនៃឥទ្ធិពលបរទេស»។ ច្បាប់នេះតម្រូវឱ្យអង្គការក្រៅរដ្ឋាភិបាលដែលទទួលបានថវិកាយ៉ាងតិចណាស់ក៏២០ភាគរយមកពីបរទេសត្រូវចុះបញ្ជីនិងប្រកាសថា ពួកគេកំពុង«បម្រើផលប្រយោជន៍របស់មហាអំណាចបរទេស»។
ក្នុងដំណើរឆ្ពោះទៅកាន់ការអនុម័តនូវអ្វីដែលពលរដ្ឋហ្សកហ្ស៊ីជាច្រើនហៅថា«ច្បាប់រុស្ស៊ី»បានធ្វើឱ្យមានការតវ៉ាប្រឆាំងដ៏ធំបំផុតនៅក្នុងប្រវត្តិសាស្ត្រក្រោយឯករាជ្យរបស់ហ្សកហ្ស៊ី។ រដ្ឋាភិបាលបានឆ្លើយតបដោយប្រើកម្លាំងហួសនិងហួសហេតុ។
នៅពេលនោះ ក្រសួងការបរទេសសហរដ្ឋអាមេរិកបានឆ្លើយតបដោយការអនុវត្តការរឹតត្បិតទិដ្ឋាការលើបុគ្គលដែលត្រូវបានចាត់ទុកថាបានចូលដៃនៅក្នុងការធ្វើឱ្យអន្តរាយដល់ប្រជាធិបតេយ្យនៅក្នុងប្រទេសហ្សកហ្ស៊ី។
កាលពីថ្ងៃទី១៦ ខែកញ្ញា ក្រសួងការបរទេសនិងក្រសួងហិរញ្ញវត្ថុសហរដ្ឋអាមេរិកបានដាក់ទណ្ឌកម្មលើមន្ត្រី២នាក់បន្ថែមទៀតរបស់រដ្ឋាភិបាលហ្សកហ្ស៊ីចំពោះការទាក់ទិនរបស់ពួកគេក្នុងការរំលោភសិទ្ធិមនុស្សដ៏ធ្ងន់ធ្ងរក្នុងអំឡុងនៃការឆ្លើយតបហិង្សាដល់ការតវ៉ាប្រឆាំងដោយសន្តិវិធីប្រឆាំងនឹងច្បាប់ឥទ្ធិពលបរទេស និងមេដឹកនាំហ្សកហ្ស៊ី២នាក់របស់ក្រុមជ្រុលនិយមហិង្សាចំពោះការរំលោភសិទ្ធិមនុស្សដ៏ធ្ងន់ធ្ងរ។
លោក Zviad “Khareba” Kharazishvili ជាប្រធាននាយកដ្ឋានកិច្ចការពិសេសនៅឯក្រ សួងការងារផ្ទៃក្នុងហ្សកហ្ស៊ី។ ក្នុងអំឡុងនៃការតវ៉ាប្រឆាំង លោកនិងអនុប្រធានរបស់លោកគឺលោក Mileri Lagazauri បានបញ្ជាអង្គភាពដែលបានវាយប្រហារដ៏ខ្លាំងលើពលរដ្ឋ មេដឹកនាំនយោបាយបក្សប្រឆាំង អ្នកកាសែតនិងសកម្មជនក្មេងៗហ្សកហ្ស៊ីដែលបានសម្តែងនូវទស្សនៈរបស់ពួកគេដោយសន្តិវិធី។
លោក Konstantine Morgoshia ជាអ្នកបង្កើតក្រុមហ៊ុនបណ្តាញព័ត៌មានAlt-Infoដែលលោកបានប្រើដើម្បីពង្រីកព័ត៌មានក្លែងក្លាយនិងផ្សព្វផ្សាយសម្តីស្អប់ខ្ពើមនិងការគំរាមកំហែងប្រឆាំងនឹងសហគមន៍ដែលបានគេចាត់ទុកបន្ទាប់បន្សំ។ នៅក្នុងខែកក្កដា ឆ្នាំ ២០២១ និងឆ្នាំ២០២៣ លោកបានអំពាវនាវឱ្យមានការវាយប្រហារហិង្សាប្រឆាំងនឹងមនុស្សដែលត្រូវបានគេចាត់ទុកបន្ទាប់បន្សំដែលបានអនុវត្តដោយសន្តិវិធីនូវសេរីភាពដ៏សំខាន់នៃការបញ្ចេញមតិនិងការជួបប្រជុំ។ លោកបានដឹកនាំអ្នកដើរតាមរបស់ខ្លួនរាប់រយនាក់ទម្លុះចូលក្នុងការិយាល័យរបស់អង្គការក្រៅរដ្ឋាភិបាលនិងវាយប្រហារអ្នកកាសែតនិងមន្ត្រីប៉ូលិសនៅឯកន្លែងនោះ។
លោកZurab Makharadzeជាបុគ្គលិកបណ្តាញព័ត៌មានដែលទាក់ទិនជាមួយក្រុមហ៊ុន Alt-Info។ លោកបានលើកទឹកចិត្តដោយផ្ទាល់ឱ្យមានហិង្សាប្រឆាំងនឹងក្រុមសំឡេងភាគតិច និងអ្នកកាសែតអនឡាញ នៅមុនការវាយប្រហារហិង្សាលើសហគមន៍ដែលត្រូវគេចាត់ទុកបន្ទាប់បន្សំ ហើយបានជួយបញ្ជា រៀបចំនិងរៃអង្កៀសប្រាក់សម្រាប់អំពើហិង្សាប្រឆាំងសិទ្ធិមនុស្សក្នុងឆ្នាំ២០២១ និង២០២៣។
បុរសទាំង៤នាក់នេះបានត្រូវដាក់ទណ្ឌកម្មនៅក្រោមបទបញ្ជានីតិប្រតិបត្តិលេខ ១៣៨១៨ ដែលដៅលើមនុស្សប្រព្រឹត្តបទឧក្រិដ្ឋដែលបានរំលោភសិទ្ធិមនុស្សដ៏ធ្ងន់ធ្ងរនិងអំពើពុករលួយនៅជុំវិញពិភពលោក។
លោក Bradley Smith រដ្ឋលេខាធិការស្តីទីក្រសួងហិរញ្ញវត្ថុទទួលបន្ទុកភេរវកម្មនិងការ ស៊ើបការណ៍សម្ងាត់ហិរញ្ញវត្ថុបាននិយាយថា៖ «សកម្មភាពថ្ងៃនេះសង្កត់នូវការព្រួយកង្វល់របស់យើងអំពីផលវិបាកនានានៃសកម្មភាពប្រឆាំងលទ្ធិប្រជាធិបតេយ្យនៅក្នុងប្រទេសហ្សកហ្ស៊ី និងការខំប្រឹងប្រែងដោយបុគ្គលសំខាន់ៗប្រើប្រាស់ហិង្សានិងការបំភិតបំភ័យដើម្បីធ្វើឱ្យសម្រេចនូវគោលបំណងរបស់ខ្លួន។ សហរដ្ឋអាមេរិកនៅតែតាំងចិត្តធ្វើឱ្យអ្នកទាំងនោះទទួលខុសត្រូវ ចំពោះការដែលពួកគេស្វះស្វែងធ្វើឱ្យអន្តរាយដល់សិទ្ធិរបស់ប្រជាពលរដ្ឋហ្សកហ្ស៊ី»៕
បទវិចារណកថា៖ ការដាក់ទណ្ឌកម្មបុគ្គលដែលធ្វើឱ្យអន្តរាយលទ្ធិប្រជាធិបតេយ្យក្នុងប្រទេសហ្សកហ្ស៊ី
(រូបឯកសារ) បាតុករកាន់បដាតវ៉ានៅរដ្ឋធានីប៊ីលីស៊ី ប្រទេសហ្សកហ្ស៊ី កាលពីថ្ងៃទី២៨ ខែឧសភា ឆ្នាំ២០២៤ ចំពោះច្បាប់«ភ្នាក់ងារបរទេស» ក្រោយពីសភាហ្សកហ្ស៊ីបានជម្នះការសម្រេចវ៉េតូរបស់ប្រធានាធិបតី។
បុរសទាំង៤នាក់នេះបានត្រូវដាក់ទណ្ឌកម្មនៅក្រោមបទបញ្ជានីតិប្រតិបត្តិលេខ ១៣៨១៨ ដែលដៅលើមនុស្សប្រព្រឹត្តបទឧក្រិដ្ឋដែលបានរំលោភសិទ្ធិមនុស្សដ៏ធ្ងន់ធ្ងរនិងអំពើពុករលួយនៅជុំវិញពិភពលោក។