តទៅនេះ គឺជាបទវិចារណកថាដែលឆ្លុះបញ្ចាំងអំពីទស្សនៈរបស់រដ្ឋាភិបាលសហរដ្ឋអាមេរិក
នៅក្នុងកិច្ចប្រឹងប្រែងផ្ដោតលើប្រតិបត្តិការហិរញ្ញវត្ថុ និងមន្ត្រីរដ្ឋាភិបាល ដែលនៅបន្តធ្វើឲ្យអន្តរាយដល់លទ្ធិប្រជាធិបតេយ្យរបស់ប្រទេសនីការ៉ាហ្គា រដ្ឋាភិបាលសហរដ្ឋអាមេរិក បានដាក់ទណ្ឌកម្មលើអ្នកស្រី Ana Julia Guido Ochoa លោក Paul Oquist Kelly និងធនាគារ Caja Rural Nacional ឬ Caruna ស្របតាមបទបញ្ជានីតិប្រតិបត្តិលេខ ១៣៨៥១។ បុគ្គលទាំងនេះ និងអង្គភាពនេះ បានអនុញ្ញាតឲ្យមាន និងទទួលបានប្រយោជន៍ពីសកម្មភាពពុករលួយនិងផ្ដាច់ការនៃរបបដឹកនាំរបស់លោកប្រធានាធិបតី Daniel Ortega នៅក្នុងប្រទេសនីការ៉ាហ្គា។
រដ្ឋមន្ត្រីការបរទេសសហរដ្ឋអាមេរិកលោក Mike Pompeo បានបញ្ជាក់នៅក្នុងសេចក្ដីថ្លែងការណ៍មួយថា៖ «ការដាក់ទណ្ឌកម្មលើអ្នកស្រី Guido និងលោក Oquist បានជំរុញឲ្យមានការទទួលខុសត្រូវលើទង្វើនៃរបបរបស់លោក Ortega និងអ្នកដែលប៉ុនប៉ងបង្កើនសកម្មភាពព្រៃផ្សៃរបស់ខ្លួនបន្ថែមទៀត។ ការដាក់ទណ្ឌកម្មលើធនាគារ Caruna បានបញ្ចប់សកម្មភាពនៃឧបករណ៍ [នយោបាយ] មួយទៀតរបស់របបនេះ»។
អ្នកស្រី Guido គឺជារដ្ឋមន្ត្រីក្រសួងយុត្តិធម៌ ហើយសេចក្ដីរាយការណ៍នានាបានចោទប្រកាន់ថា អ្នកស្រីបានជួយបង្កើតក្រុមរដ្ឋអាជ្ញា ដែលបានធ្វើការជាមួយនឹងប៉ូលិសជាតិនីការ៉ាហ្គាដែលរងការដាក់ទណ្ឌកម្មរបស់សហរដ្ឋអាមេរិក ដើម្បីប្រឌិតរឿងប្រឆាំងនឹងអ្នកទោសនយោបាយ។
បន្ថែមពីលើនេះទៀត បើយោងតាមសេចក្ដីរាយការណ៍ដូចគ្នានេះដែរ អង្គភាពពិសេសដែលបង្កើតឡើងដោយអ្នកស្រី Guido នេះ បានចំណាយពេល ២ ឆ្នាំកន្លងមក ដើម្បីដាក់ការចោទប្រកាន់ប្រឆាំងនឹងអ្នកទោសដែលត្រូវបានជាប់ឃុំដោយសារការតវ៉ាដោយសន្តិវិធី។
លោករដ្ឋមន្ត្រី Pompeo បានបញ្ជាក់ថា លោក Oquist គឺជារដ្ឋមន្ត្រីនៃគណៈរដ្ឋមន្ត្រីរបស់លោកប្រធានាធិបតី Ortega និង «ដើរតួចម្បងនៅក្នុងការលាក់បាំង និងការពារអំពើឧក្រិដ្ឋ និងការរំលោភសិទ្ធិមនុស្សរបស់របបលោក Ortega»។
Caruna គឺជាធនាគារផ្ដល់សេវាសន្សំប្រាក់និងកម្ចី ដែលធ្វើប្រតិបត្តិការក្នុងនាមជាឧបករណ៍ចម្បងរបស់របបលោក Ortega ដើម្បីប្រមូលប្រាក់ចំណេញដែលទទួលបានពីគម្រោងប្រេងសម្បទានជាមួយនឹងប្រទេសវ៉េណេស៊ុយអេឡា នៅក្នុងការប្រើជាធនធានមួយដើម្បីចំណាយលើបណ្ដាញឧបត្ថម្ភរបស់លោក Ortega។
មន្ត្រីរបស់របបនេះ រួមទាំងអ្នកដែលរងការដាក់ទណ្ឌកម្មរបស់ការិយាល័យគ្រប់គ្រងទ្រព្យសម្បត្តិបរទេសនៃក្រសួងហិរញ្ញវត្ថុសហរដ្ឋអាមេរិកផងដែរ កំពុងទទួលបានប្រយោជន៍ពីកង្វះការគ្រប់គ្រងតាមបែបបទរបស់ធនាគារ Caruna ដើម្បីការពារផលចំណេញដែលទទួលបានតាមរយៈអំពើទុច្ចរិតរបស់ពួកគេ។
រដ្ឋមន្ត្រីក្រសួងហិរញ្ញវត្ថុសហរដ្ឋអាមេរិកលោក Steven Mnuchin បាននិយាយថា៖ «របបលោក Ortega នៅបន្តបំពានលើធនធានរបស់រដ្ឋាភិបាលដើម្បីផលចំណេញផ្ទាល់ខ្លួនរបស់សមាជិកខ្លួន និងធ្វើព្រងើយកន្ដើយចំពោះការអំពាវនាវរបស់ប្រជាពលរដ្ឋនីការ៉ាហ្គាឲ្យមានការកែទម្រង់។ រដ្ឋបាលរបស់ «លោកប្រធានាធិបតី Trump» នៅតែតាំងចិត្តដាក់ទណ្ឌកម្មលើរបបលោក Ortega ដោយស្វែងរក និងវែកមុខអ្នកដែលជួយសម្របសម្រួលដល់អំពើពុករលួយឥតលាក់លៀមរបស់របបនេះ»។
សហរដ្ឋអាមេរិក នឹងបន្តចាត់វិធានការចាំបាច់នានាដើម្បីគាំទ្រដល់ប្រជាពលរដ្ឋនីការ៉ាហ្គា និងដើម្បីដាក់សម្ពាធលើរបបលោក Ortega ឲ្យបញ្ឈប់ការគាបសង្កត់ គោរពសិទ្ធិមនុស្ស និងអនុញ្ញាតឲ្យមានស្ថានការណ៍នៃការបោះឆ្នោតដោយសេរីនិងយុត្តិធម៌ ដែលនឹងជួយស្ដារលទ្ធិប្រជាធិបតេយ្យសម្រាប់ប្រទេសនីការ៉ាហ្គា៕