តទៅនេះ គឺជាបទវិចារណកថាដែលឆ្លុះបញ្ចាំងអំពីទស្សនៈរបស់រដ្ឋាភិបាលសហរដ្ឋអាមេរិក
ការឆ្លងរាលដាលយ៉ាងឆាប់រហ័សនៃជំងឺកូវីដ១៩បានបង្ហាញយ៉ាងច្បាស់ថាការគំរាមកំហែងនៃជំងឺឆ្លង ទោះកើតឡើងនៅទីណាក៏ដោយ ជាការគំរាមកំហែងទៅដល់គ្រប់ទីកន្លែងទាំងអស់។ នៅក្នុងពិភពលោកបច្ចុប្បន្នដែលមានទំនាក់ទំនងគ្នាទៅវិញទៅមកនោះវីរុសឆ្លងអាចធ្វើដំណើរនៅជុំវិញពិភពលោកទៅដល់បណ្តាទីក្រុងធំនៅក្នុងរយៈពេលតែប៉ុន្មានម៉ោងតែប៉ុណ្ណោះ។ នេះមានន័យថានៅពេលដែលជំងឺដែលអាចសម្លាប់មនុស្សកើតមានឡើងនោះវាអាចត្រូវបានគេនាំទៅកាន់ទីកន្លែងនានានៅជុំវិញពិភពលោកភ្លាមៗ ដូចជាជំងឺកូវីដ១៩ដែលយើងបានឃើញស្រាប់។
ទីប្រឹក្សាសន្តិសុខជាតិលោក Jake Sullivan បានលើកឡើងថា៖ «ក្នុងរយៈពេល២ឆ្នាំកន្លងទៅនេះពិភពលោកទាំងមូលបានយល់ដឹងពីការលំបាកនិងសោកនាដកម្មថាជំងឺរាតត្បាតនេះមានគ្រោះថ្នាក់ និងធ្វើឲ្យរាំងស្ទះយ៉ាងខ្លាំងដល់សន្តិសុខសុខភាពជាសាកល»។
«ហេតុដូច្នេះហើយ ទើបរដ្ឋបាលលោក Biden និងលោកស្រី Harris បានយកបញ្ហាសន្តិសុខសុខភាពពិភពលោក ទៅដាក់លើរបៀបវារៈលើគេនៃសន្តិសុខជាតិអាមេរិករបស់យើងដើម្បីយកឈ្នះលើជំងឺឆ្លងរាត្បាតនេះនិងដើម្បីវិនិយោគលើការពង្រឹងនូវប្រព័ន្ធសុខភាពពិភពលោក»។
ការការពារការត្រួតពិនិត្យ និងការឆ្លើយតបជាជំហានដំបូងក្នុងការការពារប្រឆាំងនឹងជំងឺឆ្លងនានា។ហេតុដូច្នេះហើយ ទើបនៅឆ្នាំ២០១៤មានក្រុមមួយដែលរួមមានអង្គការនិងប្រទេសចំនួន៤៤ចូលរួមដែលក្នុងនោះក៏មានសហរដ្ឋអាមេរិផងដែរ បានចាប់ផ្តើមដាក់ឲ្យដំណើរការនូវកម្មវិធីនៃរបៀបវារៈសន្តិសុខសុខភាពជាសាកលឬហៅកាត់ថា GHSA ដែលជាកម្មវិធីមួយមានរយៈពេល៥ឆ្នាំនិងចុះអនុវត្តផ្ទាល់នៅទីកន្លែង ដើម្បីលើកកម្ពស់សមត្ថភាពប្រទេសកំពុងអភិវឌ្ឍនានា ក្នុងការប្រយុទ្ធប្រឆាំងនឹងជំងឺឆ្លង។
ក្នុងឆ្នាំសារពើពន្ធ ២០២០រដ្ឋាភិបាលសហរដ្ឋអាមេរិកបានផ្តល់ថវិកាប្រមាណជាង៤៨០លានដុល្លារដើម្បីលើកកម្ពស់សកម្មភាពការងាររបស់ GHSA នៅក្នុងប្រទេសជាដៃគូរបស់ខ្លួននិងបានផ្តល់ប្រាក់បន្ថែមទៀតចំនួនជិត៦១០លានដុល្លារក្នុងឆ្នាំ២០២១នេះ។ យោងតាមរបាយការណ៍ប្រចាំឆ្នាំចុងក្រោយបំផុតរបស់កម្មវិធី GHSA ដែលត្រូវបានចេញផ្សាយកាលពីពាក់កណ្តាលខែតុលាកន្លងទៅប្រភពធនធានទាំងនេះត្រូវបានបង្កើតឡើងដោយផ្អែកទៅលើសន្តិសុខសមត្ថភាពសុខភាពដែលទទួលបានពីប្រទេសជាដៃគូ តាមរយៈការធ្វើវិនិយោគរបស់រដ្ឋាភិបាលអាមេរិកក្នុងពេលកន្លងទៅដែលមានទឹកប្រាក់ជាង២ពាន់លានដុល្លារចាប់តាំងពីឆ្នាំ២០១៥មក។ ថវិកានេះត្រូវបានប្រើប្រាស់ក្នុងការបង្កើនសកម្មភាពប្រឹងប្រែងសម្រាប់ប្រទេសជាដៃគូ ដើម្បីតាមដានត្រួតពិនិត្យនិងឆ្លើយតបឲ្យបានទាន់ពេលវេលាចំពោះការផ្ទុះឆ្លងរាតត្បាតនៃជំងឺឆ្លង ដែលក្នុងនោះរួមមានជំងឺកូវីដ១៩ និងជំងឺអេបូឡាជាដើមដើម្បីទប់ស្កាត់បង្ការជាមុនមិនឲ្យមានការផ្ទុះឡើងដែលអាចជៀសវាងបាន។
លោក Jake Sullivan បានថ្លែងថា៖ «រដ្ឋបាលអាមេរិកនៅពេលនេះតាំងចិត្តចំពោះការគាំទ្រនិងពង្រឹងនូវសកម្មភាពការងាររបស់ GHSA នៅក្នុងរយៈជាច្រើនឆ្នាំខាងមុខទៀត ហើយយើងនឹងបន្តប្រើប្រាស់វិនិយោគរបស់ប្រទេសជាដៃគូរបស់យើង ព្រមទាំងជំនាញបច្ចេកទេសរបស់យើង ដើម្បីជួយសម្រេចគោលដៅរបស់ GHSA។
«ការលើកកម្ពស់នូវសមត្ថភាពប្រទេសនិមួយៗនិងការចែករំលែកនូវសមត្ថភាពរបស់យើងដើម្បីប្រយុទ្ធប្រឆាំងនឹងការគំរាមកំហែងនៃជំងឺឆ្លងនោះពិតជាមានសារៈសំខាន់ខ្លាំងជាងពេលមុនៗទាំងអស់។ យើងអាចធ្វើវិនិយោគដើម្បីជួយសង្គ្រោះជីវិតមនុស្សនៅពេលនេះនិងបង្កើតនូវអនាគតមួយដែលប្រកបដោយសុខភាពនិងសន្តិសុខប្រសើរជាងមុន។ កម្មវិធីរបស់ GHSA ជាផ្នែកមួយដ៏សំខាន់នៃការងារទាំងនេះ៕