តទៅនេះ គឺជាបទវិចារណកថាដែលឆ្លុះបញ្ចាំងពីទស្សនៈរបស់រដ្ឋាភិបាលសហរដ្ឋអាមេរិក
ក្រសួងការបរទេសសហរដ្ឋអាមេរិកបានចាត់វិធានការដាក់កំហិតការរឹតត្បិតទិដ្ឋាការលើសមាជិក១០០នាក់នៃរដ្ឋសភានីការ៉ាហ្គានិងប្រព័ន្ធតុលាការនៃប្រទេសនេះដោយមានរួមបញ្ចូលពួករដ្ឋអាជ្ញានិងពួកចៅក្រមព្រមទាំងសមាជិកគ្រួសារពួកគេផងដែរ។ ក្រសួងនេះបានលុបចោលទិដ្ឋាការសហរដ្ឋអាមេរិកដែលពួកបុគ្គលទាំងនេះកាន់។
គោលនយោបាយរឹតត្បិតទិដ្ឋាការរបស់ក្រសួងការបរទេសសហរដ្ឋអាមេរិកអនុវត្តលើបណ្តាបុគ្គលដែលត្រូវជឿថាទទួលខុសត្រូវឬរួមគំនិតក្នុងការបំផ្លាញលទ្ធិប្រជាធិបតេយ្យដោយមានរួមបញ្ចូលទាំងការរំលោភលើសិទ្ធិមនុស្សផងដែរ។ គោលនយោបាយនេះក៏ត្រូវអនុវត្តលើពួកសមាជិកគ្រួសារផ្ទាល់របស់អ្នកទាំងនេះដែរ។សកម្មភាពកាលពីពេលថ្មីៗនេះដើម្បីដាក់កំហិតការរឹតត្បិតទិដ្ឋាការលើពួកជនជាតិនីការ៉ាហ្គាជាលទ្ធផលនៃការវាយប្រហាររបស់របបគ្រប់គ្រង Ortega-Murillo លើលទ្ធិប្រជាធិបតេយ្យនិងសិទ្ធិមនុស្ស។
ការវាយប្រហារទាំងនេះមានរួមបញ្ចូលការចាប់ខ្លួនអ្នកប្រឆាំងខាងនយោបាយ២៦នាក់និងអ្នកគាំទ្រលទ្ធិប្រជាធិបតេយ្យមានរួមបញ្ចូលបេក្ខជនប្រធានាធិបតី៦នាក់ក្រុមសកម្មជននិស្សិត ពួកមេដឹកនាំវិស័យឯកជននិងអ្នកដទៃ និងការអនុម័តច្បាប់សង្កត់សង្កិនសម្រាប់រឹតត្បិតនិងដាក់ទោសព្រហ្មទណ្ឌលើការនិយាយស្តីបញ្ចេញមតិដែលមិនបានបញ្ជាក់ច្បាស់លាស់ខ្លះ ការប្រឆាំងនិងការចូលរួមខាងនយោបាយ។
ការរឹតត្បិតទិដ្ឋាការក៏មានគោលដៅតម្រង់លើពួកជនទាំងឡាយណាដែលយាយីនិងបំបិទមាត់សង្គមស៊ីវិល បណ្តាញព័ត៌មានឯករាជ្យនិងក្រុមជនដែលបំផ្លាញស្ថាប័នប្រជាធិបតេយ្យនិងដំណើរការប្រជាធិបតេយ្យនៅក្នុងប្រទេសនៅការ៉ាហ្គា។ ដោយសារមាន«យុទ្ធនាការបំភិតបំភ័យ»នេះការបោះឆ្នោតក្នុងខែវិច្ឆិកាខាងមុខនេះមិនទំនងជាមានភាពសេរីនិងយុត្តិធម៌ទេ» នេះបើតាមសម្តីរបស់លោក Ned Price អ្នកនាំពាក្យក្រសួងការបរទេសសហរដ្ឋអាមេរិក។
លោករដ្ឋមន្ត្រីការបរទេសសហរដ្ឋអាមេរិក Antony Blinken បានមានប្រសាសន៍ថា៖ «ការលុបចោលទិដ្ឋាការទាំងនេះបង្ហាញថាសហរដ្ឋអាមេរិកនឹងឧបត្ថម្ភផ្ចុងផ្តើមឱ្យមានការទទួលខុសត្រូវខ្ពស់ មិនមែនសម្រាប់តែពួកមេដឹកនាំរបបគ្រប់គ្រងនេះប៉ុណ្ណោះទេ តែក៏សម្រាប់ពួកមន្ត្រីដែលជួយធ្វើឱ្យមានការវាយប្រហាររបស់របបគ្រប់់គ្រងនេះលើលទ្ធិប្រជាធិបតេយ្យនិងសិទ្ធិមនុស្សផងដែរ។ សហរដ្ឋអាមេរិកនឹងបន្តប្រើមធ្យោបាយការទូតនិងសេដ្ឋកិច្ចដែលយើងមានដើម្បីជំរុញឱ្យមានការដោះលែងក្រុមអ្នកទោសនយោបាយនិងដើម្បីគាំទ្រការអំពាវនាវរបស់ប្រជារាស្ត្រនីការ៉ាហ្គាឱ្យមានសេរីភាពច្រើនជាងមុន ការទទួលខុសត្រូវខ្ពស់និងការបោះឆ្នោតដោយសេរីនិងដោយយិត្តិធម៌ផងដែរ។»៕