តទៅនេះ គឺជាបទវិចារណកថាដែលឆ្លុះបញ្ចាំងអំពីទស្សនៈរបស់រដ្ឋាភិបាលសហរដ្ឋអាមេរិក
មួយថ្ងៃបន្ទាប់ពីរបបអ៊ីរ៉ង់បានវាយប្រហារអ៊ីស្រាអែលជាលើកទី២នៅក្នុងរយៈពេល៦ខែ ដោយប្រើកាំជ្រួចមីស៊ីលបាល្លីស្ទិក អ្នកតំណាងសហរដ្ឋអាមេរិកប្រចាំនៅអង្គការសហប្រជាជាតិអ្នកស្រី Linda Thomas-Greenfield បានអំពាវនាវដល់ក្រុមប្រឹក្សាសន្តិសុខឱ្យអ៊ីរ៉ង់ទទួលខុសត្រូវ។
អ្នកស្រីបានថ្លែងថា៖ «នេះជាពេលវេលាសម្រាប់ក្រុមប្រឹក្សានេះ និយាយដោយសំឡេងតែមួយនិងថ្កោលទោសអ៊ីរ៉ង់ចំពោះការវាយប្រហារដែលបង្កដោយខ្លួនឯង ប្រឆាំងនឹងរដ្ឋជាសមាជិកផ្សេងទៀត។ ហើយ រឿងសំខាន់ដូចគ្នានេះដែរ គឺត្រូវដាក់ទណ្ឌកម្មដ៏ធ្ងន់ធ្ងរលើឆ្មាំការពារបដិវត្តន៍អ៊ិស្លាមចំពោះសកម្មភាពរបស់ខ្លួន»។
អ្នកស្រីឯកអគ្គរដ្ឋទូត Thomas-Greenfield មានប្រសាសន៍ទៀតថា ការសម្រេចចិត្តរបស់អ៊ីរ៉ង់ដើម្បីវាយប្រហារអ៊ីស្រាអែល«មិនមែនជាវិធីការពារនោះទេ»។
អ្នកស្រីបានបន្តទៀតថា៖ «ផ្ទុយទៅវិញ ឆ្មាំការពារបដិវត្តន៍អ៊ិស្លាម បានធ្វើសកម្មភាពនៅក្នុងការសាមគ្គីភាពជាមួយក្រុមHezbollah បន្ទាប់ពីការសម្លាប់លោក Hassan Nasrallahដែលបានដឹកនាំក្រុមភេរវកម្មនោះដែលមានជាប់ឈាមជនជាតិអាមេរិកាំង លីបង់ និងអ៊ីស្រាអែល រាប់ពាន់នាក់នៅក្នុងដៃរបស់ខ្លួន។ ខ្ញុំអាចគិតដល់ឧទាហរណ៍ណាមួយដែលបង្ហាញយ៉ាងច្បាស់ពីភេរវកម្មគាំទ្រដោយរដ្ឋ ជាងការបាញ់កាំជ្រួចមីស៊ីលបាល្លីស្ទិកដើម្បីសងសឹកដល់ការស្លាប់របស់មេដឹកនាំភេរវកម្មម្នាក់នោះទេ»។
អ្នកស្រីឯកអគ្គរដ្ឋទូត Thomas-Greenfield បានសួរថា៖ «ប្រសិនបើក្រុមប្រឹក្សាមិនចាត់វិធានការ តើសារអ្វីដែលពួកគេនឹងបញ្ជូនទៅនោះ?»។
លោកស្រីឯកអគ្គរដ្ឋទូតបានបន្តទៀតថា៖ «ខ្ញុំភ័យខ្លាចថា ការស្ងៀមស្ងាត់និងការគ្មានសកម្មភាព នឹងធ្វើឱ្យឆ្មាំការពារបដិវត្តន៍អ៊ិស្លាមវាយប្រហារម្តងហើយម្តងទៀត ដូចអ្វីដែលយើងបានឃើញកាលពីម្សិលមិញ និងថ្ងៃទី១៣ ខែមេសា នៃឆ្នាំនេះ ម្តងហើយម្តងទៀត»។
អ្នកស្រីឯកអគ្គរដ្ឋទូតThomas-Greenfield បានកត់សម្គាល់ថា អ៊ីរ៉ង់ក៏បានចូលដៃនៅក្នុងការវាយប្រហារដ៏ព្រៃផ្សៃនៅថ្ងៃទី៧ ខែតុលា ឆ្នាំ២០២៣ លើអ៊ីស្រាអែលផងដែរ តាមរយៈការជួយផ្គត់ផ្គង់ថវិការបស់ខ្លួនដល់ក្រុមហាម៉ាស់។
អ្នកស្រីឯកអគ្គរដ្ឋទូតThomas Greenfieldថ្លែងទៀតថា បន្ទាប់ពីការវាយប្រហារក្រុមហាម៉ាស់ ថ្វីបើសហរដ្ឋអាមេរិកព្រមានអ៊ីរ៉ង់មិនឱ្យឆ្លៀតកេងប្រយោជន៍ពីស្ថានការណ៍និងហានិភ័យដែលជំរុញតំបន់នេះឱ្យធ្លាក់ចូលក្នុងសង្គ្រាមកាន់តែធំឡើង អ៊ីរ៉ង់មិនអើពើ«ម្តងហើយម្តងទៀត»ចំពោះការព្រមាននេះ។ ការគាំទ្ររបស់អ៊ីរ៉ង់ចំពោះក្រុមរណបរបស់ខ្លួននៅក្នុងតំបន់ រួមមានក្រុមហ៊ូធី ក្រុមសកម្មប្រយុទ្ធក្នុងប្រទេសស៊ីរីនិងអ៊ីរ៉ាក់ និងក្រុម Hezbollah «បានរួមចំណែកដោយផ្ទាល់ធ្វើឱ្យមានវិបត្តិនៅក្នុងតំបន់ហ្កាហ្សានិងប្រទេសលីបង់»។
អ្នកស្រីឯកអគ្គរដ្ឋទូត Thomas-Greenfieldបានប្រកាសថា៖ «ហានិភ័យដ៏ធំនៅពេលនេះជាតេស្តសាកល្បងសម្រាប់ក្រុមប្រឹក្សានេះ។ វាជាការចាំបាច់ដែលយើងថ្កោលទោសយ៉ាងខ្លាំងដល់ការវាយប្រហាររបស់អ៊ីរ៉ង់និងទាមទារឱ្យអ៊ីរ៉ង់បញ្ឈប់ការគាំទ្ររបស់ខ្លួនដល់អំពើភេរវកម្មនៅក្នុងតំបន់។ ប្រជាពលរដ្ឋនៅក្នុងប្រទេសអ៊ីស្រាអែល ក្នុងតំបន់ហ្កាហ្សានិង West Bank ក្នុងប្រទេសលីបង់និងទូទាំងតំបន់សក្ដិសមទទួលបានសន្តិភាពដ៏ឋិតថេរមួយ។ ហើយ វាជាការយឺតពេលសម្រាប់ក្រុមប្រឹក្សានេះទៅហើយ ដើម្បីធ្វើឱ្យអ៊ីរ៉ង់ទទួលខុសត្រូវចំពោះការផ្លុំធ្វើឱ្យមានអណ្តាតភ្លើងសង្គ្រាមនេះ៕