តទៅនេះ ជាបទវិចារណកថាដែលឆ្លុះបញ្ចាំងពីទស្សនៈរបស់រដ្ឋាភិបាលសហរដ្ឋអាមេរិក
រដ្ឋមន្ត្រីការបរទេសសហរដ្ឋអាមេរិកលោក Antony Blinken កាលពីពេលថ្មីៗនេះបានផ្តល់កិត្តិយសដល់មេដឹកនាំសង្គមស៊ីវិលដ៏អស្ចារ្យ៦រូបដែលបានបង្ហាញនូវសេចក្តីអង់អាចដ៏អស្ចារ្យនៅក្នុងការប្រឈមចំពោះបញ្ហាបន្ទាន់ៗបំផុតរបស់ពិភពលោក។
ជ័យលាភីទី១នៃរង្វាន់ជើងឯកប្រឆាំងការប្រកាន់ពូជសាសន៍សាកលលោកនៅឆ្នាំនេះគឺលោក Elvis Shakjiriជាជើងឯកសម្រាប់សហគមន៍រ៉ូម៉ានៃប្រទេសម៉ាសេដ្វានខាងជើង (North Macedonia)។
លោករដ្ឋមន្ត្រីការបរទេស Blinken បានពន្យល់ថា៖ «លោកElvisនិងក្រុមសហការីរបស់លោកបានចាប់ផ្តើមអង្គការ Romalitico ដើម្បីបញ្ចប់ភាពគ្មានរដ្ឋរបស់ជនជាតិរ៉ូម៉ា។ ចាប់តាំងពីពេលនោះមក ពួកគេបានចុះឈ្មោះជនជាតិរ៉ូម៉ាដែលគ្មានក្រដាសស្នាមរាប់រយនាក់ ផ្តល់ឱ្យពួកគេនូវសិទ្ធិប្រើប្រាស់សេវារបស់រដ្ឋាភិបាល ការអប់រំនិងការងារ»។
អ្នកស្រី Tomasa Yarhui Jacomé បានចាប់ផ្តើមសកម្មភាពនយោបាយជាអ្នកចាត់ចែងអង្គភាពមួយក្នុងប្រទេសបូលីវី។ អ្នកស្រីបានបន្តក្លាយជាស្ត្រីជនជាតិដើមលើកទី១ជាមេដឹកនាំក្រសួងមួយរបស់បូលីវី និងជាបេក្ខជនស្ត្រីជនជាតិដើមលើកទី១សម្រាប់តំណែងអនុប្រធានាធិបតីបូលីវី។
នៅពេលដែលលោក John Leerdam ទៅសិក្សាល្ខោននៅក្នុងប្រទេសហូឡង់ ព្រឹទ្ធបុរសសាកលវិទ្យាល័យបានប្រាប់លោកថា មិនមានក្រុមហ៊ុនល្ខោនណានឹងជួលលោកទេ ពីព្រោះលោកជាជនជាតិស្បែកខ្មៅ។
បទពិសោធន៍ដូចនេះបានលើកទឹកចិត្តលោក Johnឱ្យបង្កើនការយល់ដឹងអំពីប្រវត្តិសាស្ត្រនិងទាសភាពក្នុងសម័យអាណានិគមហូឡង់។ លោកបានដឹកនាំផលិតកម្មជាង៧០នៅលើឆាកនិងអេក្រង់។
លោករដ្ឋមន្ត្រីការបរទេសBlinkenបាននិយាយថា ក្នុងឋានៈជានាយកប្រតិបត្តិនៃអង្គការជួយសង្គ្រោះហ្កាណា (SAVE-Ghana) លោក Dintie Sule Tayiru បានរៀបចំបង្កើតការបញ្ចូលពលរដ្ឋFulbe ដែលជាក្រុមជនជាតិភាគតិចដែលត្រូវបានគេចាត់ទុកបន្ទាប់បន្សំមួយនៅក្នុងប្រទេសហ្កាណា។
លោក Blinkenថ្លែងថា៖ «ពីព្រោះតែការងារដ៏អស្ចារ្សនេះ ជនជាតិ Fulbeជាច្រើនឥឡូវនេះមានសិទ្ធិប្រើប្រាស់សេវាសំខាន់នានាដូចជាទឹកស្អាត ពួកគេអាចចុះឈ្មោះបោះឆ្នោតជាលើកដំបូង។ ដោយមានតំណាងកាន់តែធំឡើង ពួកគេតស៊ូមតិបានកាន់តែមានប្រសិទ្ធភាពឡើង ដើម្បីប្រើប្រាស់សេវាសាធារណៈកាន់តែច្រើនឡើង»។
អ្នកស្រី Urmila Chaudhary បានធ្វើឱ្យជឿនលឿនសិទ្ធិមនុស្សនិងយុត្តិធម៌សេដ្ឋកិច្ចសម្រាប់ស្ត្រីជនជាតិដើមនៅក្នុងប្រទេសនេប៉ាល់អស់រយៈពេលជិត២ទសវត្សរ៍។
លោករដ្ឋមន្ត្រីការបរទេស Blinken បានថ្លែងទៀតថា៖ «អ្នកស្រី Urmilaបានត្រូវគេលក់ដូរក្នុងទាសភាពសម័យទំនើបនៅអាយុ៦ឆ្នាំ មុនពេលត្រូវបានជួយសង្គ្រោះនៅអាយុ១៧ឆ្នាំ។ បន្ទាប់មកទើបអ្នកស្រីអាចរៀនអាននិងសរសេរ។ អ្នកស្រី Urmilaបានចាប់ផ្តើមអង្គការមិនរកកម្រៃមួយដែលមិនយកប្រាក់និងផ្តល់អំណាចដល់ស្ត្រីនិងក្មេងស្រីដែលស្ថិតក្នុងស្ថានភាពដូចជាអ្នកស្រី»។
អ្នកទទួលបានរង្វាន់កិត្តិយសចុងក្រោយគឺអ្នកស្រី Tanya Duarte ជាអ្នកចិត្តវិទ្យានិងជាសាស្ត្រាចារ្យ។ អ្នកស្រីបានចាប់ផ្តើមបង្កើតគម្រោង Afro-Descendants ដើម្បីអាចឱ្យបុគ្គលដែលជាកូនចៅរបស់អតីតទាសករពីអាហ្វ្រិកនានាផ្សព្វផ្សាយសិទ្ធិមនុស្សរបស់ពួកគេ ការទទួលស្គាល់និងសមភាពនៅក្នុងប្រទេសម៉ិកស៊ិកនិងជុំវិញពិភពលោក។
លោករដ្ឋមន្ត្រីការបរទេស Blinken បានថ្លែងថា៖ «ភាពអង់អាចក្លាហាននៃជនកិត្តិយសទាំងអស់នេះ ជាថ្នាំបន្សាបដ៏ខ្លាំងបំផុតដល់ការស្អប់ខ្ពើម ដល់ការអស់សង្ឃឹម ដល់សកម្មភាពស្អប់ខ្ពើម និងបេះដូងដែលគ្មានមនោសញ្ចេតនា។ ហើយ ដោយហេតុនេះហើយបានជាយើងត្រូវបន្តធ្វើការដើម្បីលើកដំកើងសិទ្ធិមនុស្ស»៕