តទៅនេះ គឺជាបទវិចារណកថាដែលឆ្លុះបញ្ចាំងអំពីទស្សនៈរបស់រដ្ឋាភិបាលសហរដ្ឋអាមេរិក
ការពន្យារពេលដំណើរការបោះឆ្នោតនៅក្នុងប្រទេសសូម៉ាលី បានបង្កឲ្យមានវិបត្តិនយោបាយនៅក្នុងប្រទេសនេះ។
រដ្ឋមន្ត្រីការបរទេសសហរដ្ឋអាមេរិកលោក Antony Blinken បានបញ្ជាក់នៅក្នុងសេចក្ដីថ្លែងការណ៍ជាលាយលក្ខណ៍អក្សរមួយថា៖ «សហរដ្ឋអាមេរិកមានការខ្វាយខ្វល់ជាខ្លាំងអំពីភាពជាប់គាំងនៃការបោះឆ្នោតនៅក្នុងប្រទេសសូម៉ាលី ដែលបានបង្កើតឲ្យមានភាពមិនច្បាស់លាស់ផ្នែកនយោបាយ ដែលគំរាមកំហែងដល់សន្តិសុខ ស្ថិរភាព និងការអភិវឌ្ឍនៅក្នុងប្រទេស»។
បើយោងតាមរដ្ឋធម្មនុញ្ញបណ្ដោះអាសន្នរបស់ប្រទេសសូម៉ាលី ការបោះឆ្នោតរដ្ឋសភានិងការបោះឆ្នោតប្រធានាធិបតី ត្រូវតែធ្វើឡើងក្នុងរង្វង់អាណត្តិ ៤ ឆ្នាំ របស់រដ្ឋាភិបាល។
កាលពីខែកញ្ញា ឆ្នាំ២០២០ ប្រធានាធិបតីសូម៉ាលីលោក Mohamed Abdullahi Mohamed ដែលគេស្គាល់ថា ឈ្មោះ Farmaajo និងមេដឹកនាំ ៥ នាក់នៃរដ្ឋជាសមាជិកសហព័ន្ធរបស់ប្រទេសសូម៉ាលី បានឯកភាពគ្នាលើគោលការណ៍រៀបចំការបោះឆ្នោត។ ប៉ុន្តែការអនុវត្តបានបរាជ័យ នៅពេលដែលភាគីនីមួយៗ បានចោទប្រកាន់គ្នាទៅវិញទៅមកថា បានប្រើដំណើរការនេះដើម្បីផលប្រយោជន៍ផ្ទាល់ខ្លួន។
ការចរចាជាច្រើនលើកច្រើនសារដើម្បីដោះស្រាយភាពទាល់ច្រកនៃការបោះឆ្នោតនេះ បានបរាជ័យ ដោយបណ្ដាលឲ្យមានភាពជាប់គាំងផ្នែកនយោបាយ។
អាណត្តិរបស់លោកប្រធានាធិបតី Farmaajo បានផុតកំណត់កាលពីថ្ងៃទី៨ ខែកុម្ភៈកន្លងទៅនេះ ប៉ុន្តែលោកនៅតែកាន់តំណែងដដែល ដោយលោកបានលើកឡើងអំពីការសម្រេចរបស់រដ្ឋសភានៅពេលដែលរដ្ឋសភាគាំទ្រកិច្ចព្រមព្រៀងគោលការណ៍បោះឆ្នោតខែកញ្ញា ឆ្នាំ២០២០ ដើម្បីបន្តអាណត្តិរបស់លោក និងរបស់រដ្ឋសភារហូតទាល់តែដល់ពេលដែលការបោះឆ្នោត ត្រូវបានធ្វើឡើងនិងបញ្ចប់រួចរាល់។
កន្លងមក លោកប្រធានាធិបតី Farmaajo បានច្រានចោលការទាមទាររបស់ក្រុមគណបក្សប្រឆាំងដែលចង់ឲ្យលោក លះបង់ការគ្រប់គ្រងលើដំណើរការបោះឆ្នោតនិងលើស្ថាប័នសន្តិសុខ ដែលការអនុវត្តទាំងនេះ ធ្លាប់បានធ្វើឡើងក្នុងអំឡុងពេលនៃការពន្យារពេលនៃដំណើរការអន្តរកាលនយោបាយនៅក្នុងឆ្នាំ២០១២ និងឆ្នាំ២០១៦។
ករណីនេះ បានបង្កើននូវភាពតានតឹងនិងលទ្ធភាពដែលអាចកើតឡើងនូវអំពើហិង្សា ហើយការប៉ះទង្គិចគ្នារវាងកងកម្លាំងសន្តិសុខរដ្ឋាភិបាលសហព័ន្ធ និងកងជីវពលដែលពាក់ព័ន្ធនឹងគណបក្សប្រឆាំង បានកើតឡើងនៅក្នុងរដ្ឋធានីម៉ូហ្កាឌីស្យូកាលពីថ្ងៃទី១៩ ខែកុម្ភៈ នៅមុននិងក្នុងអំឡុងពេលការតវ៉ាដែលដឹកនាំដោយគណបក្សប្រឆាំង ដើម្បីប្រឆាំងនឹងរដ្ឋាភិបាល។ នេះ គឺជាស្ថានការណ៍គ្រោះថ្នាក់ និងត្រូវតែដោះស្រាយជាបន្ទាន់។
លោករដ្ឋមន្ត្រី Blinken បាននិយាយថា៖ «យើងអំពាវនាវដល់ថ្នាក់ដឹកនាំរដ្ឋាភិបាលសហព័ន្ធនិងថ្នាក់ដឹកនាំរដ្ឋជាសមាជិកនៃប្រទេសសូម៉ាលីឲ្យទុកគោលបំណងចង្អៀតចង្អល់ផ្នែកនយោបាយមួយឡែក គោរពតាមការទទួលខុសត្រូវរបស់ពួកគេចំពោះប្រជាពលរដ្ឋនៃប្រទេសសូម៉ាលី និងយល់ព្រមរៀបចំការបោះឆ្នោតជាបន្ទាន់ប្រកបដោយតម្លាភាព និងមានការចូលរួមពីគ្រប់ភាគីទាំងអស់»។
លោក Blinken បានបន្តថា៖ «ភាពជាប់គាំងបច្ចុប្បន្នប៉ះពាល់ដល់ដំណើរវិវឌ្ឍន៍ដែលសម្រេចបានមកទល់នឹងពេលបច្ចុប្បន្ន ពន្យារពេលដល់ការកែទម្រង់ដែលត្រូវការបន្ទាន់សម្រាប់ប្រទេសសូម៉ាលីនៅក្នុងការបន្តដំណើរលើមាគ៌ាឈ្ពោះទៅកាន់ការសម្រាលបំណុលទាំងស្រុង និងរារាំងដល់ការប្រយុទ្ធប្រឆាំងនឹងភេរវកម្ម»។
លោកបានបន្ថែមថា៖ «សហរដ្ឋអាមេរិកគាំទ្រសិទ្ធិរបស់ប្រជាពលរដ្ឋសូម៉ាលីនៅក្នុងការតវ៉ាដោយសន្តិវិធី និងប្រឆាំងដាច់ខាតចំពោះការប្រើអំពើហិង្សារបស់ភាគីណាមួយ។ យើងជំរុញឲ្យថ្នាក់ដឹកនាំប្រទេសសូម៉ាលីការពារអនាគតរបស់ប្រទេស និងស្វែងរកការឯកភាពគ្នាដើម្បីរៀបចំការបោះឆ្នោតរដ្ឋសភានិងការបោះឆ្នោតប្រធានាធិបតីជាបន្ទាន់»៕