តទៅនេះ ជាបទវិចារណកថាដែលឆ្លុះបញ្ចាំងអំពីទស្សនៈរបស់រដ្ឋាភិបាលសហរដ្ឋអាមេរិក
ចិនជាមហាអំណាចសាកលលោកមួយ មានសេដ្ឋកិច្ចធំទី២នៅក្នុងពិភពលោក ដោយមានយោធាកំពុងរីកលូតលាស់ដ៏ឆាប់រហ័ស។ នេះបើតាមលោករដ្ឋមន្ត្រីការបរទេស Marco Rubioដែលបាននិយាយនៅក្នុងកិច្ចសម្ភាសន៍ជាមួយអ្នកស្រី Catherine Herridgeកាលពីពេលថ្មីៗនេះ។ លោកបាននិយាយទៀតថា៖ «យើងត្រូវតែមានទំនាក់ទំនងជាមួយចិន។ មិនថា តើយើងព្រមព្រៀងជាមួយអ្វីៗដែលពួកគេធ្វើ យើងយល់ថា ក្នុងករណីខ្លះយើងជាគូប្រកួតប្រជែងគ្នា ក្នុងករណីផ្សេងទៀត យើងជាគូសត្រូវដោយផ្ទាល់។ ក៏ប៉ុន្តែ ត្រូវតែមានការទាក់ទង ពីព្រោះខ្វះការទាក់ទងអាចនាំឱ្យមានជម្លោះ»។
លោករដ្ឋមន្ត្រីការបរទេស Rubioបានថ្លែងទៀតថា៖ «ទោះជាយ៉ាងនោះក្តី យើងនឹងមិនរស់នៅក្នុងពិភពលោកមួយដែលយើងពឹងផ្អែកលើប្រទេសចិន ចំពោះរ៉ែកម្រដ៏សំខាន់ ចំពោះសមាសភាគសំខាន់ៗនៅក្នុងសង្វាក់ផ្គត់ផ្គង់របស់យើង។ យើងនឹងមិនមែនរស់នៅក្នុងពិភពលោកមួយដែលចិនត្រូវគ្របសង្កត់លើតំបន់ឥណ្ឌូប៉ាស៊ីហ្វិក ហើយ យើងនឹងមិនត្រូវគេអនុញ្ញាតឱ្យមានចំណងទាក់ទងពាណិជ្ជកម្មនៅក្នុងតំបន់ពីព្រោះតែ ពួកគេនឹងចាប់ប្រទេសនានាធ្វើជាចំណាប់ខ្មាំង ហើយប្រទេសនានាទាំងអស់ក្លាយជារដ្ឋចំណុះឱ្យសួយអាករនោះទេ»។
លោករដ្ឋមន្ត្រីការបរទេស Rubioបានថ្លែងអះអាងទៀតថា៖ «ជប៉ុនមិនចាប់អារម្មណ៍ក្លាយជារដ្ឋចំណុះគេទេ ហើយពួកគេជាសម្ពន្ធមិត្តដ៏ជិតស្និទ្ធមួយរបស់យើង។ កូរ៉េខាងត្បូង ហ្វីលីពីន អូស្ត្រាលី និងវៀតណាម ចំពោះបញ្ហានេះ មិនចាប់អារម្មណ៍នៅក្នុងការក្លាយជារដ្ឋចំណុះគេនៅក្នុងតំបន់នៃឥទ្ធិពលរបស់ចិនទេ»។
លោករដ្ឋមន្ត្រីការបរទេស Rubio បានប្រកាសថា៖ «យើងជាប្រទេសមួយនៅតំបន់មហាសមុទ្រប៉ាស៊ីហ្វិក។ យើងមានគោលបំណងស្ថិតនៅទីនោះដដែលហើយនឹងរក្សាទំនាក់ទំនងរបស់យើងនៅទីនោះ។ នេះជាខ្សែបន្ទាត់ក្រហមសម្រាប់យើង»។
លោករដ្ឋមន្ត្រីការបរទេស Rubio បានសង្កត់ធ្ងន់ថា សហរដ្ឋអាមេរិកក៏នឹងដោះស្រាយ បញ្ហាការធ្វើពាណិជ្ជកម្មមិនយុត្តិធម៌ដែរ។ លោកបានថ្លែងទៀតថា៖ «យើងបានអនុញ្ញាតឱ្យពួកគេធ្វើអ្វីៗដែលពួកគេចង់ធ្វើនៅក្នុងប្រទេសអាមេរិក។ ក៏ប៉ុន្តែ ក្រុមហ៊ុនអាមេរិកមិនអាចធ្វើអ្វីទាំងអស់នៅខាងក្នុងប្រទេសចិន ហើយប្រសិនបើពួកគេអនុញ្ញាតឱ្យធ្វើនោះគឺព្រោះតែពួកគេចង់លួចកម្មសិទ្ធបញ្ញារបស់យើង ហើយបន្ទាប់មកបង្ខំយើងឱ្យឈប់ធ្វើពាណិជ្ជកម្មនិងជំនួសយើងដោយក្រុមហ៊ុនចិន»។
ត្រូវតែមានការធ្វើដូចគ្នាទៅវិញទៅមក ដូចដែលលោកប្រធានាធិបតី Donald Trump បានសង្កត់ធ្ងន់ហើយម្តងទៀត។
លោករដ្ឋមន្ត្រីការបរទេសRubioបានថ្លែងទៀតថា៖ «អ្វីៗដែលយើងត្រូវគេអនុញ្ញាតឱ្យធ្វើនៅទីនោះ គឺជាអ្វីដែលយើងត្រូវអនុញ្ញាតឱ្យគេធ្វើនៅទីនេះ។ អ្វីៗដែលពួកគេយកពន្ធគយពីយើងគឺជាអ្វីដែលយើងត្រូវតែយកពន្ធគយលើពួកគេវិញ»។
ចំពោះកោះតៃវ៉ាន់វិញ លោករដ្ឋមន្ត្រីការបរទេសRubioបាននិយាយថា៖ «យើងមិនចង់ឃើញជម្លោះទេ។ ក៏ប៉ុន្តែ យើងបានធ្វើការបញ្ជាក់យ៉ាងច្បាស់ជាច្រើនឆ្នាំមកហើយអំពីគោលនយោបាយរបស់យើងគឺការធានាចំនួន៦ ឬ Six Assurances និងច្បាប់ទំនាក់ទំនងតៃវ៉ាន់ ឬ Taiwan Relations Act ថាយើងប្រឆាំងការផ្លាស់ប្តូរក្នុងទម្រង់ណាមួយនូវស្ថានភាពបច្ចុប្បន្ន ដោយកម្លាំង ឬដោយការគំរាមកំហែងឬ ដោយការបង្ខំ ហើយការណ៍នេះនៅតែជាគោលនយោបាយរបស់យើង»។
គោលនយោបាយសហរដ្ឋអាមេរិកចំពោះប្រទេសចិននិងផ្នែកផ្សេងទៀតរបស់ពិភពលោកត្រូវតែផ្តល់ផលប្រយោជន៍សហរដ្ឋអាមេរិកជាមុន៕