តទៅនេះ គឺជាបទវិចារណកថាដែលឆ្លុះបញ្ចាំងអំពីទស្សនៈរបស់រដ្ឋាភិបាលសហរដ្ឋអាមេរិក
ក្នុងរយៈពេលជាង៤ឆ្នាំកន្លងមកនេះ សហរដ្ឋអាមេរិកនិងសមាគមប្រជាជាតិអាស៊ីអាគ្នេយ៍ឬអាស៊ានបានធ្វើឱ្យភាពជាដៃគូរបស់ខ្លួនកាន់តែរឹងមាំឡើង ហើយនឹងកាន់តែធំឡើងជាងកាលពីពេលមុន។ នេះបើតាមរដ្ឋមន្ត្រីការបរទេសសហរដ្ឋអាមេរិកលោក Antony Blinken ក្នុងអំឡុងនៃដំណើរទស្សនកិច្ចរបស់លោកទៅកាន់ប្រទេសឡាវ។ ជាការពិត លោកប្រធានាធិបតី Joe Bidenកាលពីឆ្នាំទៅបានដំឡើងទំនាក់ទំនងរវាងសហរដ្ឋអាមេរិកនិងអាស៊ានទៅដល់ភាពជាដៃគូយុទ្ធសាស្ត្រគ្រប់ជ្រុងជ្រោយ។
លោករដ្ឋមន្ត្រី Blinkenបានប្រកាសថា កិច្ចសហប្រតិបត្តិការដែលបានបង្កើនឡើងនេះកំពុងជួយធ្វើឱ្យប្រសើរឡើងនូវជីវិតរស់នៅរបស់ប្រជាពលរដ្ឋរបស់យើងជាង១ពាន់លាននាក់ បង្កើតឱកាសសេដ្ឋកិច្ច ជំរុញនវានុវត្តន៍នៃបច្ចេកវិទ្យា និងធ្វើឱ្យជឿនលឿននូវវិបុលភាពនិងការពារតំបន់ឥណ្ឌូប៉ាស៊ីហ្វិកជាមួយអាស៊ានដែលជាចំណុចស្នូលរបស់ខ្លួន។
លោករដ្ឋមន្ត្រីការបរទេសBlinkenថ្លែងថា៖ «យើងកំពុងពង្រឹងចំណងទាក់ទងសេដ្ឋកិច្ចដែលប្រទេសរបស់យើងបានធ្វើជាមួយគ្នាជាយូរមកហើយ។ សហរដ្ឋអាមេរិកនៅតែជាប្រភពទី១នៃការវិនិយោគទុនបរទេសដោយផ្ទាល់នៅក្នុងបណ្តាប្រទេសនៅអាស៊ាន។ នេះជាវិធានការដ៏មានប្រយោជន៍នៃការទុកចិត្តនិងទំនុកចិត្តនៅថ្ងៃអនាគត។ វាក៏ជាប្រភពដ៏ខ្លាំងមួយនៃការបង្កើតការងារនិងឱកាស»។
លោករដ្ឋមន្ត្រី Blinkenបានបន្ថែមទៀតថា៖ «ជាមួយគ្នានេះ យើងកំពុងធ្វើឱ្យប្រសើរឡើងនូវការឃ្លាំមើលការផ្ទុះឡើងនូវជំងឺឆ្លង យើងកំពុងធ្វើឱ្យទំនើបនូវខ្សែចរន្តអគ្គិសនីនៅក្នុងតំបន់ យើងកំពុងប្រយុទ្ធឧក្រិដ្ឋកម្មកំព្យូទ័រនិងការឆបោកតាមអនឡាញ យើងកំពុងធ្វើឱ្យប្រសើរឡើងនូវសុវត្ថិភាព សន្តិសុខនិងបញ្ញាសិប្បនិមិត្តដែលអាចទុកចិត្តបាន»។
លោករដ្ឋមន្ត្រីការបរទេស Blinken មានប្រសាសន៍ទៀតថា៖ «ការធ្វើឱ្យជឿនលឿននូវទស្សនៈរួមរបស់យើងក៏មានន័យដែរថា ជាការរួបរួមគ្នាដើម្បីដោះស្រាយបញ្ហាប្រឈមរួមដល់ចក្ខុវិស័យនេះ»។
លោករដ្ឋមន្ត្រី Blinken ថ្លែងទៀតថា៖ «ចាប់តាំងពីវិបត្តិដ៏ជ្រាលជ្រៅនៅក្នុងប្រទេសមីយ៉ាន់ម៉ាដល់ឥរិយាបទមិននឹងនររបស់សាធារណរដ្ឋប្រជាធិបតេយ្យកូរ៉េឬDPRK ដល់ការឈ្លានពានរបស់រុស្ស៊ីនៅក្នុងប្រទេសអ៊ុយក្រែន ដែលបន្តរំលោភគោលការណ៍ធម្មនុញ្ញដ៏សំខាន់របស់អង្គការសហប្រជាជាតិនិងសន្ធិសញ្ញាមិត្តភាពនិងកិច្ចសហប្រតិបត្តិការដ៏សំខាន់របស់អាស៊ាន»។
លោករដ្ឋមន្ត្រី Blinken បន្ថែមទៀតថា៖ «យើងនៅតែព្រួយបារម្ភអំពីសកម្មភាពប្រកបដោយគ្រោះថ្នាក់និងខុសច្បាប់នៅក្នុងសមុទ្រចិនខាងត្បូង ដែលបានធ្វើឱ្យមនុស្សរងរបួសនិងគ្រោះថ្នាក់ដល់នាវាមកពីប្រទេសអាស៊ាន និងផ្ទុយពីការតាំងចិត្តដល់សេចក្តីសម្រេចនៃជម្លោះនោះដោយសន្តិវិធី»។
លោក Blinken បន្តទៀតថា៖ «សហរដ្ឋអាមេរិក នឹងបន្តគាំទ្រសេរីភាពនៃការធ្វើនាវាចរណ៍និងសេរីភាពនៃការហោះហើរនៅក្នុងតំបន់ឥណ្ឌូប៉ាស៊ីហ្វិក។ យើងក៏ជឿដែរថា វាជាការសំខាន់ដើម្បីរក្សាការតាំងចិត្តរួមរបស់យើងដើម្បីការពារស្ថិរភាពនៅទូទាំងច្រកសមុទ្រតៃវ៉ាន់»។
លោករដ្ឋមន្ត្រី Blinken បន្តទៀតថា៖ «មិនថា ជាការឆ្លើយតបដល់បញ្ហាប្រឈមជាបន្ទាន់ឬធ្វើឱ្យជឿនលឿនដល់ក្តីសង្ឃឹមរួមរបស់ប្រជាពលរដ្ឋយើងក៏ដោយ ទំនាក់ទំនងរវាងសហរដ្ឋអាមេរិកនិងអាស៊ាន នឹងបន្តមានសារៈសំខាន់។ យើងរំពឹងថាភាពជាដៃគូនេះនឹងរីកលូតលាស់កាន់តែខ្លាំងឡើងក្នុងប៉ុន្មានឆ្នាំខាងមុខនេះ»៕