តទៅនេះ គឺជាបទវិចារណកថាដែលឆ្លុះបញ្ចាំងពីទស្សនៈរបស់រដ្ឋាភិបាលសហរដ្ឋអាមេរិក
នៅក្នុងកិច្ចខិតខំប្រឹងប្រែងមួយដើម្បីដាក់សម្ពាធលើរបបគ្រប់ក្រងកូរ៉េខាងជើងឱ្យបោះបង់ចោលកម្មវិធីនុយក្លេអ៊ែរនិងមីស៊ីលរបស់ខ្លួន ក្រុមប្រឹក្សាសន្តិសុខ អង្គការសហប្រជាជាតិ បានអនុម័តសេចក្តីសម្រេចមួយចំនួនមានគោលដៅរារាំងកូរ៉េខាងជើង កុំឱ្យលក់ធនធានធម្មជាតិរបស់ខ្លួនដើម្បីយកប្រាក់ទៅផលិតអាវុធមហាប្រល័យរបស់ផងខ្លួន។ រដ្ឋជាសមាជិកភាគច្រើននៃអង្គការសហប្រជាជាតិដោយមានរួមបញ្ចូលទាំងសហរដ្ឋអាមេរិកផងដែរ បានគាំទ្រនិងអនុវត្តសេចក្តីសម្រេចចិត្តទាំងនេះ ហើយដាក់កំហិតការដាក់ទណ្ឌកម្មរបស់ពួកគេផ្ទាល់លើអង្គភាពនិងពួកបុគ្គលដែលបានចៀសវាងពីសេចក្តីសម្រេចចិត្តទាំងនេះរបស់អង្គការសហប្រជាជាតិ។
កាលពីពាក់កណ្តាលខែធ្នូ ឆ្នាំ២០២០ ការិយាល័យត្រួតត្រាធនធានបរទេសនៃក្រសួងហិរញញវត្ថុសហរដ្ឋអាមេរិកហៅកាត់ថា OFAC បានដាក់ទណ្ឌកម្មប្រឆាំងនឹងក្រុម ហ៊ុន៦ និងនាវាបួនគ្រឿងទាក់ទិននឹងការដឹកជញ្ជូនធ្យូងថ្មកូរ៉េខាងជើង។
សេចក្តីសម្រេចលេខ២៣៧១ នៃក្រុមប្រឹក្សាសន្តិសុខអង្គការសហប្រជាជាតិហាម ប្រាមការដឹកជញ្ជូនធ្យូងថ្ម ដែក សំណ និងអាហារសមុទ្ររបស់កូរ៉េខាងជើង។
ការិយាល័យ OFAC បានចាត់ទុកនាវាឈ្មោះ Asian Bridge និងប្រតិបត្តិកររបស់កប៉ាល់នេះ គឺក្រុមហ៊ុនចិន Weihai Huijiang Trade Ltd និងក្រុមហ៊ុនចុះឈ្មោះក្នុងចក្រភពអង់គ្លេស Always Smooth Ltd និង Good Siblings Ltd ហើយបានសម្គាល់នាវាពីរគ្រឿងឈ្មោះ Lucky Star និង Asia Bridge ថាជានាវាកម្មសិទ្ធិត្រូវរាំងខ្ទប់ដោយមានទាក់ទិននឹងក្រុមហ៊ុនទាំងនេះ។ កប៉ាល់ទាំងពីរគ្រឿងនេះ បានជញ្ជូនធ្យូងថ្មពីកំពង់ផែកូរ៉េខាងជើងហើយដឹកវានៅទូទាំងតំបន់នោះ។
ការិយាល័យ OFAC ក៏បានចាត់ទុកក្រុមហ៊ុននាវាចរណ៍ Silver Bridge មានមូលដ្ឋាននៅក្រុងហុងកុង និងក្រុមហ៊ុន Thinh Cuaong នៅប្រទេសវៀតណាម ថាជាអ្នកល្មើសលើសេចក្តីសម្រេចចិត្តរបស់អង្គការសហប្រជាជាតិហើយចាត់ទុលនាវាឈ្មោះ Calm Bridge និងឈ្មោះ Star 18 ថាជាកប៉ាល់កម្មសិទ្ធិត្រូវរាំងខ្ទប់។ នាវាទាំងពីរគ្រឿងនេះបានផ្ទុកធ្យូងថ្មនៅឯកំពង់ផែកូរ៉េខាងជើងហើយដឹកវានៅទូទាំងតំបន់នោះ។
ការិយាល័យ OFAC ក៏បានចាត់ទុកក្រុមហ៊ុនពាណិជ្ជកម្ម Korean Daizin ដែលធ្វើប្រតិបត្តិការក្នុងប្រទេសកូរ៉េខាងជើង និងប្រទេសវៀតណាម។ កាលពីបួនឆ្នាំមុននេះ ឬយូរជាងនេះផង ក្រុមហ៊ុន Daizin Trading បានដឹកជញ្ជូនធ្យូងថ្មទៅក្រៅប្រទេសដោយចំនួនច្រើន។
ការចាត់ទុកទាំងនេះ ហាមប្រាមក្រុមហ៊ុនសហរដ្ឋអាមេរិកមិនឱ្យរកស៊ីជាមួយក្រុមហ៊ុននិងនាវាដែលរងការដាក់ទណ្ឌកម្មទាំងនេះ។ ក្រុមហ៊ុនបរទេសនិងស្ថាប័នហិរញ្ញវត្ថុដែលប្រកបអាជីវកម្មជាមួយអង្គភាពត្រូវចាត់ទុកទាំងនេះ អាចរងការដាក់ទណ្ឌកម្មដែរ។
លោក Steve Mnuchin រដ្ឋមន្ត្រីហិរញ្ញវត្ថុសហរដ្ឋអាមេរិកបានបញ្ជាក់ថា «សាធារណ រដ្ឋប្រជាធិបតេយ្យប្រជាមានិតកូរ៉េនៅតែគេចពីការហាមប្រាមរបស់អង្គការសហប្រជាជាតិស្តីពីការដឹកជញ្ជូនធ្យូងថ្មទៅលក់ឯប្រទេសក្រៅដែលផ្តល់ប្រាក់ចំណូលសម្រាប់ប្រើប្រាស់ក្នុងកម្មវិធីផលិតអាវុធមហាប្រល័យរបស់ផងខ្លួន។ ជាញឹកញយរបបគ្រប់គ្រងកូរ៉េខាងជើង បានប្រើក្រុមពលករបង្ខំពីពន្ធនាគារក្នុងឧស្សាហកម្មរ៉ែរបស់ខ្លួនដោយមានរួមបញ្ជូលធ្យូងថ្មផងដែរដោយទាញយកអត្ថប្រយោជន៍ពីប្រជាជនខ្លួនផ្ទាល់ដើម្បីជំរុញកម្មវិធីខុសច្បាប់របស់ខ្លួន»៕