តទៅនេះ គឺជាបទវិចារណកថាដែលឆ្លុះបញ្ចាំងអំពីទស្សនៈរបស់រដ្ឋាភិបាលសហរដ្ឋអាមេរិក
បច្ចេកវិទ្យាដែលមានសមត្ថភាព អាចឈ្លបមើលបានកើនឡើងយ៉ាងខ្លាំង ហើយកំណើននេះ ក៏នាំមកនូវលទ្ធភាពកាន់ច្រើននៃការប្រើខុសបច្ចេកវិទ្យាទាំងនេះសម្រាប់ការរំលោភលើសិទ្ធិមនុស្ស។ ហេតុនេះហើយទើបក្រសួងការបរទេសសហរដ្ឋអាមេរិក ចេញគោលការណ៍ណែនាំដល់ក្រុមហ៊ុនអាមេរិកនានា អំពីរបៀបបង្ការមិនឲ្យផលិតផលនិងសេវាកម្មរបស់ពួកគេ ត្រូវរដ្ឋាភិបាលបរទេសយកទៅប្រើ ដើម្បីរំលោភសិទ្ធិមនុស្ស។ នេះ បើតាមប្រសាសន៍របស់លោក Scott Busby ឧបការីរងរដ្ឋមន្ត្រីស្តីទីក្រសួងការបរទេសសហរដ្ឋអាមេរិកទទួលបន្ទុកលទ្ធិប្រជាធិបតេយ្យ សិទ្ធិមនុស្ស និងពលកម្ម។
ផលិតផល និងសេវាកម្មដែលអាចផ្តល់លទ្ធភាពក្នុងការមើលដោយផ្ទាល់ ឬដោយប្រយោល អាចរួមចំណែកដោយវិជ្ជមានដល់សុខុមាលភាពសេដ្ឋកិច្ច សង្គម និងសន្តិសុខរបស់ប្រទេសមួយ។ ជាឧទាហរណ៍ ផលិតផល ឬសេវាកម្មទាំងនេះ អាចត្រូវគេប្រើដើម្បីការពារប្រព័ន្ធបោះឆ្នោតពីការជ្រៀតជ្រែក។
ប៉ុន្តែជាញឹកញាប់ណាស់ បច្ចេកវិទ្យានិងផលិតផលដែលអាចឈ្លបមើល ត្រូវប្រើខុសដោយរដ្ឋាភិបាលបរទេសដើម្បីបង្ក្រាបអ្នកប្រឆាំង យាយីអ្នកការពារសិទ្ធិមនុស្ស គំរាមកំហែងសហគមន៍ជនជាតិភាគតិច រារាំងដល់អ្នកទម្លាយរឿងអាស្រូវសម្ងាត់ បំភ័យមិនឲ្យមានការបញ្ចេញមតិដោយសេរី ដាក់ជាគោលដៅនូវអ្នកនយោបាយប្រឆាំង អ្នកសារព័ត៌មាន និងអ្នកច្បាប់ ក៏ដូចជាជ្រៀតជ្រែកតាមតែអំពើចិត្ត ឬដោយខុសច្បាប់ទៅលើឯកជនភាព។
ក្នុងករណីខ្លះ រដ្ឋាភិបាលបរទេស បានប្រើខុសនូវផលិផលនិងសេវាកម្មទាំងនេះ ដើម្បីដាក់សហគមន៍ជនជាតិទាំងមូលឲ្យនៅក្រោមការឈ្លបមើលតាមតែអំពើចិត្តនិងដោយខុសច្បាប់។ លោក Scott Busby ឧបការីរងរដ្ឋមន្ត្រីស្តីទីក្រសួងការបរទេសសហរដ្ឋអាមេរិក បានថ្លែងបន្តថា៖ «ប្រទេសចិនជាប្រទេសមួយដែលមាននទស្សនៈរឹតត្បិតចំពោះការគ្រប់គ្រងប្រព័ន្ធអ៊ីនធឺណិត ហើយកំពុងប្រើបច្ចេកវិទ្យាឈ្លបមើលយ៉ាងទូលំទូលាយ ដោយរំលោភលើបទដ្ឋានសិទ្ធិមនុស្សអន្តរជាតិ»។
ករណីទាំងនេះ រួមមានការប្រើប្រាស់បច្ចេកវិទ្យាឈ្លបមើលដ៏ទំនើបនិងមាននៅគ្រប់ទីកន្លែងក្នុងតំបន់ស៊ីនជាង ដែលនៅទៅនោះសាធារណរដ្ឋប្រជាមានិតចិន បានអនុវត្តនូវយុទ្ធនាការគាបសង្កត់ជនជាតិវីហ្គើ ជនជាតិកាហ្សាក់ និងសមាជិកនៃក្រុមជនជាតិភាគតិចមូស្លីមផ្សេងទៀត។ រដ្ឋាភិបាលដទៃទៀតនៅជុំវិញពិភពលោក ក៏កំពុងប្រើប្រាស់នូវបច្ចេកវិទ្យាដូចគ្នានេះចំពោះពលរដ្ឋរបស់ពួកគេ។ ប្រទេសទាំងនោះ រួមមាន អ៊ីរ៉ង់ វ៉េណេស៊ុយអេឡា ហើយបើតាមការស៊ើបអង្កេតមួយនៅឆ្នាំ២០១៩ របស់សារព័ត៌មាន Wall Street Journal ក៏រួមបញ្ចូលប្រទេសអាល់ហ្សេរី អ៊ូហ្គាន់ដា និងសំប៊ី ផងដែរ។
មិនធ្លាប់មានពេលណាពីមុនមក ដែលក្រុមហ៊ុនរបស់សហរដ្ឋអាមេរិក ចាំបាច់ត្រូវអនុវត្តគោលនយោបាយ ដែលការពារការប្រើប្រាស់ខុសនូវផលិតផលរបស់ពួកគេ ដូចពេលនេះទេ។ លោក Scott Busby ឧបការីរងរដ្ឋមន្ត្រីស្តីទីក្រសួងការបរទេសសហរដ្ឋអាមេរិកបានថ្លែងថា៖ «យើងត្រូវបន្តជំរុញនូវការច្នៃប្រឌិតទាំងឡាយណាដែលជួយលើកតម្កើងទស្សនៈឲ្យតម្លៃដល់សិទ្ធិមនុស្សរបស់យើង»។
លោក Busby បន្តថា៖ «ក្នុងនោះរួមមានសិទ្ធិសេរីភាពរួចផុតពីការជ្រៀតជ្រែកតាមអំពើចិត្តនិងដោយខុសច្បាប់ ទៅលើឯកជនភាពនិងសេរីភាពនៃការបញ្ចេញមតិ ក៏ដូចជាការគោរពនីតិរដ្ឋ។ យើងស្វាគមន៍នឹងធ្វើការជាមួយសហគមន៍ធុរកិច្ចសហរដ្ឋអាមេរិក និងអនុវត្តគោលការណ៍ណែនាំទាំងនេះ ដើម្បីធានាថា ក្រុមហ៊ុនអាមេរិកនានា បន្តតំណាងឲ្យគុណតម្លៃដ៏ល្អបផុតរបស់អាមេរិក»៕