តទៅនេះ គឺជាបទវិចារណកថាដែលឆ្លុះបញ្ចាំងពីទស្សនៈរបស់រដ្ឋាភិបាលសហរដ្ឋអាមេរិក
កាលពីចុងខែមីនា លោករដ្ឋមន្ត្រីការបរទេសស.រ.អ. Antony Blinken បានប្រកាសថា ស.រ.អ. បានចាត់ថវិការហូតដល់៣០លានដុល្លារជាជំនួយគាំទ្រដល់ការឆ្លើយតបឆាប់រហ័សនៃការរាតត្បាតនៃជំងឺអេបូឡាក្នុងសាធារណរដ្ឋប្រជាធិបតេយ្យកុងហ្គោ និងសាធារណរដ្ឋហ្គីណេ។ ប្រាក់ជំនួយនេះ ក៏នឹងជួយពង្រឹងការប្រុងប្រៀបទប់ទល់នឹងជំងឺអេបូឡានៅក្នុងចំណោមប្រទេសមានហានិភ័យខ្ពស់ជាប់ព្រំដែនគ្នា គឺប្រទេសកូដឌឺវ័រ លីបែរីយ៉ា ម៉ាលី រវ៉ាន់ដា សេណេហ្គាល់ សេរ៉ាឡេអូន និងប្រទេសអ៊ូហ្គាន់ដាផងដែរ។
អេបូឡា ជាជំងឺគ្រុនក្តៅធ្លាក់ឈាម ហើយត្រូវបានរកឃើញដំបូងកាលពីឆ្នាំ១៩៧៦។ ទីតាំងដែលជំងឺអេបូឡាត្រូវបានរកឃើញនៅពេលនេះ ជាសាធារណរដ្ឋប្រជាធិបតេយ្យកុងហ្គោនៅតាមដងទន្លេអេបូឡា។
បើតាមអង្គការសុខភាពពិភពលោកថា នៅចន្លោះឆ្នាំ១៩៧៦ និងឆ្នាំ២០១២ មានការរាតត្បាតជំងឺអេបូឡាចំនួន២៤លើកនៅតំបន់ភាគខាងត្បូងវាលខ្សាច់សាហារ៉ា ដែលនាំឱ្យមានការឆ្លងចំនួន២ពាន់ ៤រយករណី ដោយក្នុងនោះមានមនុស្សស្លាប់ចំនួន១ពាន់ ៥រយ ៩០នាក់។ បន្ទាប់មក ក៏មានការរាតត្បាតខ្លាំងបំផុតដែលបានកើតក្នុងតំបន់ភាគខាងលិចនៃទ្វីបអាហ្វ្រិក នៅចន្លោះពីខែធ្នូ ឆ្នាំ២០១៣ ដល់ខែមករា ឆ្នាំ២០១៦ បណ្តាលឱ្យមនុស្ស២ម៉ឺន ៨ពាន់ ៦រយ ៤៦នាក់ ឆ្លងជំងឺនេះ ហើយមនុស្សចំនួន១ម៉ឺន ១ពាន់ ៣រយ ២៣នាក់ បានស្លាប់។ ការឆ្លងរាលដាលតូចៗក៏មានបន្តបន្ទាប់ក្នុងឆ្នាំ២០១៧ និងឆ្នាំ២០១៨។ ការរាតត្បាតធំទីពីរ បានកើតឡើងនៅប៉ែកខាងកើតនៃសាធារណរដ្ឋប្រជាធិបតេយ្យកុងហ្គោ ពីឆ្នាំ២០១៨ ដល់ឆ្នាំ២០២០។ នេះជាការរាតត្បាតធំទីពីរនៃជំងឺអេបូឡានៅក្នុងប្រវត្តិសាស្ត្រពិភពលោក និងជាការរាតត្បាតទីមួយក្នុងតំបន់មានសង្គ្រាម។
ជំងឺអេបូឡាឆ្លងតាមវត្ថុរាវនៃរាងកាយសត្វ ឬមនុស្សដែលមានផ្ទុកជំងឺនេះ។ ការឆ្លងអាចកើតមានតាមរយៈការប៉ះពាល់សពមនុស្សស្លាប់ដោយសារជំងឺអេបូឡា នៅពេលរៀបចំបញ្ចុះសព ដែលមានរួមបញ្ចូលការប៉ះពាល់ ឬលាងសម្អាតសាកសពជាដើម។
អង្គការសុខភាពពិភពលោក ហៅកាត់ថា WHO រាយការណ៍ថា ការជួយថែទាំនៅពេលដំបូង និងការចូលរួមពីសហគមន៍ជាកត្តាសំខាន់ ក្នុងការជួយស្រោចស្រង់ជីវិតមនុស្ស និងគ្រប់គ្រងការរាលដាលនៃជំងឺនេះបាន។ ដើម្បីបង្ការមិនឱ្យមានការរាតត្បាតខ្លាំងនៃជំងឺអេបូឡា តម្រូវឱ្យមានការឃ្លាំមើលជំងឺនេះដោយប្រុងប្រយ័ត្ន និងចាត់វិធានការឆ្លើយតបឲ្យបានឆាប់រហ័ស និងមានប្រសិទ្ធភាពទៅលើករណីឆ្លងថ្មីៗនៅក្នុង និងជុំវិញតំបន់ដែលមានជំងឺ។
ថវិកាជំនួយរហូតដល់៣០លានដុល្លារពីរដ្ឋាភិបាលស.រ.អ. នឹងគាំទ្រដល់ការតាមដាននិងការធ្វើតេស្តក្នុងមន្ទីរពិសោធន៍និងខាងការធ្វើរោគវិនិច្ឆ័យ។ ជំនួយនេះ នឹងត្រូវប្រើប្រាស់សម្រាប់បង្កើតមជ្ឈមណ្ឌលព្យាបាលជំងឺអេបូឡា និងសម្រាប់ពង្រឹងការបង្ការការឆ្លង និងការគ្រប់គ្រងនៅតាមមន្ទីរសុខភាពធំៗផងដែរ។
ជំងឺឆ្លងដូចជាជំងឺអេបូឡានេះ មិនគោរពព្រំដែនប្រទេសជាតិទេ ហើយអាចឆ្លងរាតត្បាតលឿនបំផុត ដោយបំផ្លាញសុខភាព សន្តិសុខ និងភាពសំបូររុងរឿងនៃប្រទេសទាំងអស់ថែមទៀតផង។ រដ្ឋាភិបាលស.រ.អ. មានមោទភាពក្នុងការធ្វើវិភាគទានដល់កិច្ចខិតខំប្រឹងប្រែងឆ្លើយតបប្រឆាំងនឹងជំងឺដ៏សែនអាក្រក់នេះ និងដល់សន្តិសុខសុខភាពសាកលទាំងមូល៕