តទៅនេះ គឺជាបទវិចារណកថាដែលឆ្លុះបញ្ចាំងអំពីទស្សនៈរបស់រដ្ឋាភិបាលសហរដ្ឋអាមេរិក
លោក Hans Grundberg ប្រេសិតពិសេសរបស់អ.ស.ប.ទទួលបន្ទុកកិច្ចការប្រទេសយេម៉ែនបាននិយាយថា កិច្ចព្រមព្រៀងកាលពីពេលថ្មីៗដើម្បីបន្តការឈប់បាញ់គ្នារវាងភាគីច្បាំងគ្នាក្នុងប្រទេសយេម៉ែនរហូតដល់ថ្ងៃទី២សីហា «ជាការប្រែប្រួលសំខាន់មួយក្នុងសង្គ្រាមនេះ»។
សង្គ្រាមក្នុងប្រទេសយេម៉ែនបានចាប់ផ្តើមក្នុងឆ្នាំ២០១៤ នៅពេលដែលពួកឧទ្ទាម
Houthi គាំទ្រដោយប្រទេសអ៊ីរ៉ង់បានវាយយកបានផ្នែកធំៗរបស់ប្រទេស ហើយបានបង្ខំឱ្យប្រធានាធិបតីប្រទេសយេម៉ែនដែលត្រូវបានទទួលស្គាល់ជាអន្តរជាតិនិរទេសខ្លួនទៅក្រៅប្រទេស និងបង្អាក់ដំណើរការផ្ទេរអំណាចដោយសន្តិវិធីរបស់ប្រទេសនេះ។ តាមសំណើសុំរបស់រដ្ឋាភិបាលយេម៉ែន ប្រទេសអារ៉ាប៊ីសាអូឌីតបានដឹកនាំក្រុមចម្រុះមួយប្រឆាំងនឹងពួក Houthi ចាប់ផ្តើមពីខែមីនា ឆ្នាំ២០១៥។ មនុស្សប្រមាណ៣៧៧.០០០នាក់ បានស្លាប់ក្នុងសង្គ្រាមនេះ ហើយប្រទេសនេះបានធ្លាក់ក្នុងភាពក្រីក្រ និងការស្រេកឃ្លាន។
នៅពេលចាប់ផ្តើមខែពិសិដ្ឋ Ramadan នៅថ្ងៃទី២ ខែមេសា អ.ស.ប.បានសម្របសម្រួលឱ្យមានការឈប់បាញ់គ្នាពីរខែ ដែលជាការនាំឱ្យមានការចុះថយយ៉ាងច្រើននៃចំនួនជនស៊ីវិលដែលស្លាប់និងរបួស បានធ្វើឱ្យការធ្វើដំណើរល្អប្រសើរជាងមុននិងបានបង្កើនលទ្ធភាពមានប្រេងឥន្ធនៈនិងទំនិញជាមូលដ្ឋានច្រើនជាងមុនផងដែរ។ ភាគីក្នុងសង្គ្រាមនេះបានយល់ស្របគ្នាបន្តកិច្ចឈប់បាញ់គ្នាចំនួន៦០ថ្ងៃថែមទៀតនៅថ្ងៃទី២ ខែមិថុនា។ លោក Grundberg ប្រសិតពិសេសអ.ស.ប.បានថ្លែងថា «ដោយយល់ស្របគ្នាអនុវត្ត និងនៅពេលនេះធ្វើឱ្យមានការឈប់បាញ់គ្នាថ្មីទៀត ភាគីទាំងអស់បានផ្តល់ឱ្យមានសេចក្តីសង្ឃឹមមួយដល់ប្រជារាស្ត្រយេម៉ែនថានឹងបញ្ចប់សង្គ្រាមនេះ»។
លោកប្រធានាធិបតី Biden បានស្វាគមន៍ការឈប់បាញ់គ្នានេះនិងបានកត់សម្គាល់ថា«ពេលពីរខែមុននេះនៅក្នុងប្រទេសយេម៉ែន ដោយសារមានកិច្ចឈប់បាញ់គ្នាត្រូវសម្របសម្រួលកាលពីខែមេសា ជាពេលវេលាមួយក្នុងបណ្តារយៈពេលមានសន្តិភាពបំផុតតាំងពីសង្គ្រាមនេះបានចាប់ផ្តើម៧ឆ្នាំមុននេះ។ ជីវិតមនុស្សរាប់ពាន់នាក់ត្រូវបានជួយសង្គ្រោះពីព្រោះការប្រយុទ្ធគ្នាបានថមថយ»។
លោកប្រធានាធិបតី Biden បានសរសើរ «ការងារដោយមិនខ្លាចនឿយហត់»របស់លោក Grundberg ប្រេសិតពិសេសអ.ស.ប. និងលោក Tim Lenderking ប្រេសិតពិសេសស.រ.អ.ទទួលបន្ទុកកិច្ចការប្រទេសយេម៉ែនដែលបានជួយធ្វើឱ្យមានការបន្តការឈប់បាញ់គ្នានេះ។ លោកក៏បានសរសើរដល់«កិច្ចការទូតសហការគ្នា»នៅទូទាំងតំបន់ ដោយលោកបានមានប្រសាសន៍ថា «ប្រទេសអារ៉ាប់ប៊ីសាអូឌីតបានបង្ហាញភាពដឹកនាំដ៏ក្លាហានដោយបានផ្តើមគំនិតគាំទ្រ និងអនុវត្តការឈប់បាញ់គ្នាដឹកនាំដោយអ.ស.ប.។ ប្រទេសអូម៉ង់បានបំពេញមុខនាទីសំខាន់មួយក្នុងការទទួលរៀបចំ និងសម្រួលការសន្ទនាគ្នា។ ប្រទេសអេហ្សីបនិងប្រទេសហ្សកដានីបានបើកអាកាសយានដ្ឋានពួកគេសម្រាប់ជើងហោះហើរពីប្រទេសយេម៉ែនកាលពីខែមុនដែលអាចធ្វើឱ្យមានផ្នែកសំខាន់មួយនៃដំណើរការនេះផងដែរ»។
ការបញ្ឈប់សង្គ្រាមក្នុងប្រទេសយេម៉ែនជាអាទិភាពខ្ពស់មួយនៃគោលនយោបាយការបរទេសស.រ.អ.។ រដ្ឋមន្ត្រីការបរទេសស.រ.អ.លោក Antony Blinken បានមានប្រសាសន៍ជាថ្មីអំពីការប្តេជ្ញារបស់ស.រ.អ.ក្នុងការធ្វើឱ្យមាន«ដំណោះស្រាយមួយមានការចូលរួមពីភាគីទាំងអស់ និងជាប់លាប់ដល់សង្គ្រាមនេះដែលសម្រាលទុក្ខវេទនារបស់ប្រជារាស្ត្រយេម៉េន ដែលផ្តល់អំណាចឱ្យពួកគេសម្រេចអំពីអនាគតប្រទេសពួកគេដោយគ្មានការជ្រៀតជ្រែកពីបរទេស និងដែលដោះស្រាយការអំពាវនាវឱ្យមានយុត្តិធម៌ និងការទទួលខុសត្រុវខ្ពស់...យើងសុំដល់ភាគីទាងអស់ឱ្យឆក់យកពេលវេលាសំខាន់នេះសម្រាប់ចាប់ផ្តើមដំណើរការសន្តិភាពទូលំទូលាយមួយ»៕
