តទៅនេះ គឺជាបទវិចារណកថាដែលឆ្លុះបញ្ចាំងអំពីទស្សនៈរបស់រដ្ឋាភិបាលសហរដ្ឋអាមេរិក
បទដ្ឋានបច្ចេកវិទ្យាជំនាន់ទី៥សម្រាប់បណ្តាញអ៊ីនធឺណិតទូរស័ព្ទ ឬហៅថា បណ្តាញ 5G ដែលបានចាប់ផ្តើមដាក់ឲ្យប្រើប្រាស់នៅទូទាំងសាកលលោកកាលពីឆ្នាំ២០១៩មានល្បឿនលឿនជាងបណ្តាញ 4G មុននោះឆ្ងាយណាស់។ នេះមានន័យថា បណ្តាញ5G អាចទ្រទ្រង់ការប្រើប្រាស់អ៊ីនធឺណិតលើទូរស័ព្ទ និងកម្មវិធីអ៊ីនធឺណិតដែលមិនទាន់អាចដំណើរការបាន ដោយអាចផ្តល់នូវកម្មវិធីថ្មីនានានៅក្នុងប្រព័ន្ធអ៊ីនធឺណិតដែលអាចបញ្ជូនទិន្នន័យរវាងសម្ភារៈទូទៅដែលភ្ជាប់ទៅអ៊ីនធឺណិត ឬហៅថា Internet of Things និងអាចឲ្យម៉ាស៊ីននានាប្រាស្រ័យទាក់ទងគ្នាបាន។
ទោះជាយ៉ាងនេះក្តី ការកើនឡើងនៃលំហូរទិន្នន័យដោយប្រព័ន្ធ 5G ក៏មានន័យថា កាន់តែងាយរងការវាយប្រហារផងដែរ។ អនុរដ្ឋមន្ត្រីក្រសួងការបរទេសទទួលបន្ទុកកំណើនសេដ្ឋកិច្ច ថាមពល និងបរិស្ថានលោក Keith Krach បានថ្លែងនៅវេទិកាពាណិជ្ជកម្មឥណ្ឌូបាស៊ីហ្វិកថា៖
«ខណៈដែលបច្ចេកវិទ្យាដូចជា 5G កំពុងបង្កើតឱកាសរីកលូតលាស់យ៉ាងច្រើនសន្ធឹកសន្ធាប់ បច្ចេកវិទ្យានេះ ក៏បង្កើនហានិភ័យបង្កឡើងដោយក្រុមប្រទេស និងក្រុមហ៊ុនដែលមិនអាចជឿទុកចិត្តបានផងដែរ ពិសេសបណ្តាប្រទេស ឬក្រុមហ៊ុនដែលស្ថិតក្រោមការគ្រប់គ្រងរបស់រដ្ឋាភិបាលផ្តាច់ការដូចជាគណបក្សកុម្មុយនីស្តចិនជាដើម»។
លោកអនុរដ្ឋមន្ត្រីថ្លែងបន្តថា សំណួរគឺថា តើអ្នកណាដែលយើងអាចទុកចិត្តបានជាមួយនឹងព័ត៌មានឯកជនដ៏មានតម្លៃរបស់យើង ទិន្នន័យសម្ងាត់ឯកជនរបស់អតិថិជនរបស់យើង និងកម្មសិទ្ធិបញ្ញាដ៏មានតម្លៃបំផុតរបស់យើង?
លោកថ្លែងថា៖ «ប្រាកដជាមិនមែនក្រុមហ៊ុន Huawei ទេ ដែលជាខ្នងបង្អែករបស់គណបក្សកុម្មុយនីស្តចិនក្នុងការស៊ើបការណ៍នានាឲ្យរដ្ឋចិន។ ហើយប្រាកដជាមិនមែនប្រទេសដែលមានច្បាប់ស៊ើបការណ៍សម្ងាត់ជាតិ ឬ National Intelligence Act ដែលលើកឡើងថា មិនថាក្រុមហ៊ុនចិនណាក៏ដោយ មិនថាក្រុមហ៊ុនរដ្ឋ ឬក្រុមហ៊ុនដទៃ ឬជាពលរដ្ឋចិនណាក៏ដោយ តម្រូវឲ្យផ្តល់ព័ត៌មាន បច្ចេកវិទ្យាមានកម្មសិទ្ធិ កម្មសិទ្ធិបញ្ញា ឬទិន្នន័យណាក៏ដោយ ទៅតាមសំណើរបស់គណបក្សកុម្មុយនីស្តចិន»។
មូលហេតុនេះហើយបានជាកាលពីខែសីហា រដ្ឋមន្ត្រីការបរទេសអាមេរិកលោក Mike Pompeo បានសម្ពោធកម្មវិធី The Clean Network ឬមានន័យថាបណ្តាញស្អាតស្អំ ដែលជាកិច្ចខិតខំប្រឹងប្រែងរបស់ក្រសួងការបរទេសអាមេរិកដើម្បីការពារឯកជនភាព កម្មសិទ្ធិបញ្ញា និងសន្តិសុខជាតិពីការវាយលុកដ៏សាហាវដោយតួអង្គអាក្រក់ដូចជាគណបក្សកុម្មុយនីស្តចិនជាដើម។
លោកអនុរដ្ឋមន្ត្រី Krach ថ្លែងទៀតថា៖ «កម្មវិធី The Clean Network គឺជាវិធីដ៏ទូលំទូលាយដើម្បីដោះស្រាយការគំរាមកំហែងរយៈពេលយូរទៅលើឯកជនភាពទិន្នន័យ សន្តិសុខ សិទ្ធិមនុស្ស និងការសហការប្រកបដោយការជឿទុកចិត្តបាន។ វាកើតចេញពីបទដ្ឋានឌីជីថលដ៏ទុកចិត្តបាន ដែលត្រូវបានទទួលស្គាល់ជាអន្តរជាតិ ហើយវាតំណាងឲ្យការប្រតិបត្តិជាច្រើនឆ្នាំ យុទ្ធសាស្ត្រយូរអង្វែងដែលបង្កើតឡើងផ្អែកទៅលើក្រុមចម្រុះដែលបន្តមានសមាជិកកើនឡើង ហើយដែលបច្ចុប្បន្នមានប្រទេសស្អាតស្អំជាង៤៩ប្រទេស ក្រុមហ៊ុនទូរគមនាគមន៍ស្អាតស្អំចំនួន១៧០ និងក្រុមហ៊ុននាំមុខនានានៅជុំវិញពិភពលោក»។
លោកបន្តថា៖ «យើងទាំងអស់គ្នា រួមមានរដ្ឋាភិបាល វិស័យឯកជន សង្គមស៊ីវិល ហើយខ្ញុំគិតថា ពិសេសសារព័ត៌មាន អាចបន្តប្រឆាំងនឹងរដ្ឋាភិបាលផ្តាច់ការដើម្បីគាំទ្រសេរីភាពនិងសន្តិសុខ។ មិនមានវិបុលភាពប្រកបដោយចីរភាពណា ដោយគ្មានសេរីភាពនោះទេ»៕