តទៅនេះ គឺជាបទវិចារណកថាដែលឆ្លុះបញ្ចាំងអំពីទស្សនៈរបស់រដ្ឋាភិបាលសហរដ្ឋអាមេរិក
អស់រយៈពេលជាងមួយទសវត្សរ៍មកហើយ លោកនាយករដ្ឋមន្ត្រី Viktor Orban នៃប្រទេសហុងគ្រី និងគណបក្ស Fidesz ដែលជាគណបក្សគ្រប់គ្រងប្រទេសរបស់លោកបានប្រឹងប្រែងជាបន្តបន្ទាប់ក្នុងការបន្តឹងការត្រួតត្រាលើបណ្តាញផ្សាយព័ត៌មាននិងសារព័ត៌មានឯករាជ្យ។
តាមរយៈការប្រើប្រាស់ប្រាក់នៃការឃោសនាពាណិជ្ជកម្មដោយរដ្ឋ ការបិទនិងការទិញបណ្តាញផ្សាយព័ត៌មានដោយក្រុមអ្នកស្និទ្ធនឹងរដ្ឋាភិបាលលហុងគ្រី បានបំបាត់ព័ត៌មាននិងអត្ថាធិប្បាយមិនអនុគ្រោះដល់ខ្លួនដែលបានរិះគន់រដ្ឋាភិបាល។ កាលពីឆ្នាំ២០១៨ បណ្តាញព័ត៌មានជិត៥០០ត្រូវបានបញ្ចូលទៅក្នុងមូលនិធិសារព័ត៌មាននិងបណ្តាញផ្សព្វផ្សាយអឺរ៉ុបកណ្តាលហៅកាត់ថា KESMA ដែលជាក្រុមមួយដឹកនាំដោយក្រុមជនជិតស្និទ្ធនឹងគណបក្ស Fidesz។
កាលពីខែមីនាឆ្នាំមុន សម្ព័ន្ធមិត្តម្នាក់របស់គណបក្ស Fidesz បានទិញ៥០ភាគរយនៃក្រុមហ៊ុនដែលចាត់ចែងការផ្សាយពាណិជ្ជកម្មរបស់សារព័ត៌មាន Index ដែលនៅពេលនោះជាបណ្តាញព័ត៌មានតាមអនឡាញនាំមុខនៅប្រទសហុងគ្រី។ កាលពីខែកក្កដា និពន្ធនាយករបស់ Index ត្រូវបានដកចេញពីតំណែង ហើយការណ៍នេះ នាំឱ្យបុគ្គលិកច្រើននាក់នៃសារព័ត៌មាននេះ លាលែងចេញពីតំណែង។ បន្ទប់មកនៅខែកញ្ញា ទីភ្នាក់ងាររបស់រដ្ឋាភិបាលទទួលបន្ទុកការត្រួតពិនិត្យបណ្តាញផ្សាយព័ត៌មាន បានប្រកែកមិនព្រមបន្តអាជ្ញាប័ណ្ណឱ្យស្ថានីយវិទ្យុពាណិជ្ជកម្មឯករាជ្យសំខាន់ចុងក្រោយគេឈ្មោះ Klubradio ដែលជាស្ថានីយព័ត៌មាននិងមានកម្មវិធីសំណួរ និងចម្លើយ។ ទាំង Index និង Klubradio បានរិះគន់រដ្ឋាភិបាល។ Klubradio បានប្តឹងឡើងឧទ្ធរណ៍អំពីសេចក្តីសម្រេចរបស់តុលាការ ប៉ុន្តែកាលពីថ្ងៃទី៩ ខែកុម្ភៈ ចៅក្រមម្នាក់បានសម្រេចប្រឆាំងនឹងការតវ៉ានេះ។ ស្ថានីយវិទ្យុ Klubradio បានឈប់ផ្សាយតាមរលកអាកាសកាលពីថ្ងៃទី១៤ ខែកុម្ភៈ ទោះជាខ្លួននៅអាចផ្សាយតាមអ៊ីនធឺណិតក៏ដោយ។
លោក Scott Griffen ជានាយកនៃវិទ្យាស្ថានសារព័ត៌មានអន្តរជាតិ។ លោកបាននិយាយថា៖ «ក្នុងរយៈពេលពីរ បីឆ្នាំចុងក្រោយនេះ ក្រុមប្រឹក្សាបណ្តាញផ្សាយព័ត៌មានគ្រប់គ្រងដោយគណបក្ស Fidesz និងរដ្ឋាភិបាល បានបានរាំងខ្ទប់មធ្យោបាយទាំងអស់សម្រាប់ឱ្យស្ថានីយវិទ្យុ Klubradio អាចផ្សាយតាមរលកអាកាស នៅពេលការសុំបន្តការផ្សាយរបស់ខ្លួនត្រូវបានបដិសេធដោយចេតនានយោបាយ។ លទ្ធផលគឺថា នៅពេលដល់ពេលស្ថានីយវិទ្យុ Klubradio ត្រូវសុំបន្តអាជ្ញាប័ណ្ណ ជោគវាសនានៃស្ថានីយវិទ្យុនេះ ត្រូវបានគេសម្រេចរួចហើយ»។
លោក Ned Price អ្នកនាំពាក្យនៃក្រសួងការបរទេសសហរដ្ឋអាមេរិក បាននិយាយនៅក្នុងសេចក្តីថ្លែងការណ៍មួយជាលាយលក្ខណ៍អក្សរថា សហរដ្ឋអាមេរិក «ខ្វល់ខ្វាយខ្លាំងអំពីការចុះថមថយនៃពហុភាពបណ្តាញផ្សាយព័ត៌មានក្នុងប្រទេសហុងគ្រី។ សហរដ្ឋអាមេរិក មានកង្វល់ដូចគ្នានឹងអ្នកគាំទ្រសេរីភាពសារព័ត៌មានអន្តរជាតិនិងប្រជាពលរដ្ឋហុងគ្រីច្រើននាក់ អំពីការចុះថមថយនៃពហុភាពបណ្តាញផ្សាយព័ត៌មានក្នុងប្រទេសហុងគ្រី»។
លោក Ned Price បានថ្លែងទៀតថា៖ «សហរដ្ឋអាមេរិកមានជំនឿថា ពហុភាពនៃសំឡេងឯករាជ្យនិងមតិ មានសារៈសំខាន់ដល់លទ្ធិប្រជាធិបតេយ្យ ហើយយើងសុំដល់រដ្ឋាភិបាលនៃប្រទេសហុងគ្រីឱ្យលើកតម្កើងបរិយាកាសបណ្តាញផ្សាយព័ត៌មានបើកចំហមួយ។ សហរដ្ឋអាមេរិកប្តេជ្ញាពង្រឹងភាពដៃគូរបស់យើងជាមួយប្រទេសហុងគ្រី ដែលជាសមាជិកមួយនៃអង្គការអូតង់ និងជំរុញការប្តេជ្ញារបស់រដ្ឋបាលលោកប្រធានាធិបតី Biden ក្នុងការគាំទ្រស្ថាប័នប្រជាធិបតេយ្យ សិទ្ធិមនុស្ស និងនីតិរដ្ឋ»៕