តទៅនេះ គឺជាបទវិចារណកថាដែលឆ្លុះបញ្ចាំងអំពីទស្សនៈរបស់រដ្ឋាភិបាលសហរដ្ឋអាមេរិក
កាលពីខែកញ្ញា សាធារណរដ្ឋប្រជាមានិតប្រជាធិបតេយ្យកូរ៉េ (ប្រទេសកូរ៉េខាងជើង) បានសាកល្បងមីស៊ីលមួយចំនួន ដែលក្នុងនោះក៏មានការបាញ់គ្រាប់ផ្លោងមីស៊ីលចេញពីមាត់សមុទ្រខាងកើតរបស់ខ្លួនផងដែរ ដែលនេះគឺជាការសាកល្បងគ្រាប់ផ្លោងមីស៊ីលលើកដំបូងបង្អស់ដែលរដ្ឋាភិបាលក្រុងព្យុងយ៉ាងបានធ្វើឡើងនៅក្នុងរយៈពេល ៦ ខែចុងក្រោយនេះ។
សហរដ្ឋអាមេរិកបានថ្កោលទោសការសាកល្បងមីស៊ីលនេះ។ នៅឯសន្និសីទកាសែតមួយ អ្នកនាំពាក្យក្រសួងការបរទេសសហរដ្ឋអាមេរិកលោក Ned Price បាននិយាយថា៖ «ការសាកល្បងមីស៊ីលទាំងនេះគឺជាការរំលោភលើសេចក្ដីសម្រេចជាច្រើនរបស់ក្រុមប្រឹក្សាសន្តិសុខអង្គការសហប្រជាជាតិ ហើយយើងដឹងថា ការសាកល្បងទាំងនេះបង្កជាការគំរាមកំហែងដល់ប្រទេសជិតខាងរបស់សាធារណរដ្ឋប្រជាមានិតប្រជាធិបតេយ្យកូរ៉េ និងប្រទេសដទៃទៀតដែលជាសមាជិករបស់សហគមន៍អន្តរជាតិ»។
អ្នកនាំពាក្យក្រសួងការពារជាតិសហរដ្ឋអាមេរិកលោក John Kirby បានប្រកាសថា៖ «សកម្មភាពទាំងនេះបង្ហាញឲ្យឃើញនូវផលប៉ះពាល់ដែលនាំឲ្យមានអស្ថិរភាពនៃកម្មវិធីអាវុធខុសច្បាប់របស់សាធារណរដ្ឋប្រជាមានិតប្រជាធិបតេយ្យកូរ៉េ»។
លោក Kirby បានបញ្ជាក់ជាថ្មីអំពី «ការតាំងចិត្តដ៏មុតមាំ» របស់សហរដ្ឋអាមេរិកចំពោះការការពារសាធារណរដ្ឋកូរ៉េ (ប្រទេសកូរ៉េខាងត្បូង) និងប្រទេសជប៉ុន។
ការចរចានុយក្លេអ៊ែររវាងសហរដ្ឋអាមេរិកនិងសាធារណរដ្ឋប្រជាមានិតប្រជាធិបតេយ្យកូរ៉េបានជាប់គាំងតាំងពីឆ្នាំ ២០១៩ មក ប៉ុន្តែរដ្ឋបាលរបស់ប្រធានាធិបតីសហរដ្ឋអាមេរិកលោក Joe Biden បានបញ្ជាក់យ៉ាងច្បាស់អំពីគោលបំណងរបស់ខ្លួននៅក្នុងការស្ដារការចរចានេះឡើងវិញ។
លោក Price បាននិយាយថា៖ «យើងប្ដេជ្ញាចិត្តចំពោះគោលការណ៍ដែលថា ការសន្ទនានឹងអនុញ្ញាតឲ្យយើងបន្តសម្រេចបាននូវគោលបំណងចុងក្រោយរបស់យើង ដែលនោះគឺការលុបបំបាត់អាវុធនុយក្លេអ៊ែរពីឧបទ្វីបកូរ៉េ»។
លោកបានប្រកាសថា៖ «អ្វីដែលយើងស្វះស្វែងចង់ធ្វើគឺការកាត់បន្ថយការគំរាមកំហែងចំពោះសហរដ្ឋអាមេរិក និងចំពោះសម្ព័ន្ធមិត្តរបស់យើងនៅក្នុងតំបន់ដែលមានដូចជាសាធារណរដ្ឋកូរ៉េនិងជប៉ុនជាដើម ហើយយើងគិតថាយើងអាចធ្វើដូច្នេះបានតាមរយៈមធ្យោបាយការទូត»។
គេឃើញមានសន្ទុះសកម្មភាពការទូតកាលពីពេលថ្មីៗនេះក្នុងចំណោមសហរដ្ឋអាមេរិកនិងបណ្ដាប្រទេសនានានៅក្នុងតំបន់ដោយផ្ដោតលើប្រទេសកូរ៉េខាងជើង។
កាលពីពាក់កណ្ដាលខែកញ្ញា លោកឯកអគ្គរដ្ឋទូត Sung Kim ដែលជាអ្នកតំណាងពិសេសសហរដ្ឋអាមេរិកទទួលបន្ទុកកិច្ចការកូរ៉េខាងជើង បានធ្វើដំណើរទៅកាន់ទីក្រុងកូត្យូ ប្រទេសជប៉ុន និងបានជួបជាមួយនឹងមន្ត្រីជាន់ខ្ពស់នានាមកពីប្រទេសជប៉ុននិងកូរ៉េខាងត្បូង ដើម្បីពិភាក្សាអំពីសកម្មភាពរបស់កូរ៉េខាងជើងក្នុងចំណោមបញ្ហាដទៃផ្សេងទៀត។
រដ្ឋមន្ត្រីការបរទេសនៃប្រទេសចិននិងរដ្ឋមន្ត្រីការបរទេសនៃប្រទេសកូរ៉េខាងត្បូងក៏បានជួបពិភាក្សាគ្នាផងដែរនៅក្នុងទីក្រុងសេអ៊ូល ប្រទេសកូរ៉េខាងត្បូង ក្នុងពេលប៉ុន្មានថ្ងៃក្រោយមកបន្ទាប់ពីកូរ៉េខាងជើងបានសាកល្បងមីស៊ីលស្វ័យនាំផ្លូវរយៈចម្ងាយឆ្ងាយរបស់ខ្លួន។
លោក Price បានលើកឡើងថា កិច្ចប្រជុំទាំងនេះគឺជាផ្នែកដ៏សំខាន់នៃការចូលរួមនិងការទូតដែលសហរដ្ឋអាមេរិកជឿថានឹងឈានឆ្ពោះទៅរកគោលបំណងរួមរបស់សហរដ្ឋអាមេរិកនិងបណ្ដាប្រទេសនានានៅក្នុងតំបន់ ដែលនោះគឺ «វឌ្ឍនភាពដ៏មានន័យលើមាគ៌ាឆ្ពោះទៅរកការលុបបំបាត់អាវុធនុយក្លេអ៊ែរនៅលើឧបទ្ទីបកូរ៉េ»៕