តទៅនេះ គឺជាបទវិចារណកថាដែលឆ្លុះបញ្ចាំងពីទស្សនៈរបស់រដ្ឋាភិបាលសហរដ្ឋអាមេរិក
សហរដ្ឋអាមេរិក កំពុងសើរើពិនិត្យឡើងវិញអំពីអនាគតនៃគោលនយោបាយសហរដ្ឋអាមេរិកចំពោះប្រទេសកូរ៉េខាងជើងនៅពេលលោក Joe Biden កាន់តំណែងប្រធានាធិបតី។ លោក Ned Price អ្នកនាំពាក្យក្រសួងការបរទេសអាមេរិក បានបញ្ជាក់ថា គោលនយោបាយក្នុងពេលអនាគតទាំងអស់ នឹងផ្តល់អាទិភាពដល់សុវត្ថិភាពរបស់ពលរដ្ឋអាមេរិកាំង និងសម្ព័ន្ធមិត្ត ប្រឆាំងនឹងការគំរាមកំហែងដាក់ឱ្យមានដោយកម្មវិធីនុយក្លេអ៊ែរ និងកម្មវិធីមីស៊ីលផ្លោងរបស់កូរ៉េខាងជើង។ លោក Price ក៏បាននិយាយពីសារៈសំខាន់នៃការកែលម្អជីវិតរបស់ប្រជាពលរដ្ឋកូរ៉េខាងត្បូង និងកូរ៉េខាងជើងដែរ។
លោក Price បានថ្លែងបន្ថែមថា កិច្ចសហប្រតិបត្តិការដ៏ជិតស្និទ្ធជាមួយពួកសម្ព័ន្ធមិត្តសំខាន់ៗរបស់សហរដ្ឋអាមេរិកក្នុងតំបន់អាស៊ីខាងកើតជាការចាំបាច់ដើម្បីធ្វើឱ្យកូរ៉េខាងជើងឆ្ពោះទៅកាន់ការធ្វើមិនឱ្យមានអាវុធនុយក្លេអ៊ែរ។ លោកបាននិយាយថា៖
«យើងកំពុងធ្វើការណ៍នេះដោយធ្វើការពិគ្រោះជិតស្និទ្ធជាមួយពួកសម្ព័ន្ធមិត្តកូរ៉េខាងត្បូងរបស់យើង ជាមួយពួកសម្ព័ន្ធមិត្តជប៉ុនរបស់យើងនិងជាមួយពួកសម្ព័ន្ធមិត្តនិងដៃគូឯទៀតៗក្នុងតំបន់ឥណ្ឌូ-ប៉ាស៊ីហ្វិក ហើយក្នុងភាពទូលំទូលាយជាងនេះទៀត ដូចដែលយើងបាននិយាយក្នុងករណីនៃប្រទេសអ៊ីរ៉ង់ យើងត្រូវការមានពួកគេជាមួយយើងប្រសិនបើយើងនឹងប្រើរបៀបដោះស្រាយមួយមានប្រសិទ្ធភាព និងប្រកបដោយជោគជ័យប្រឆាំងនឹងឧបសគ្គនៃកម្មវិធីនុយក្លេអ៊ែរ និងកម្មវិធីមីស៊ីលរបស់កូរ៉េខាងជើងនិងផ្នែកឯទៀតៗនាំឱ្យមានកង្វល់របស់ប្រទេសនេះ»។
លោកស្រី Linda Thomas-Greenfield ឯកអគ្គរដ្ឋទូតសហរដ្ឋអាមេរិកប្រចាំនៅអង្គការសហប្រជាជាតិដែលត្រូវបានតែងតាំងកាលពីពេលថ្មីៗនេះ បាននិយាយនៅក្នុងសន្និសីទកាសែតមួយកាលពីថ្ងៃទី២ ខែមីនា។ លោកស្រី Thomas-Greenfield បានគូសបញ្ជាក់ពីសារៈសំខាន់នៃការទាក់ទងជាមួយពួកសម្ព័ន្ធមិត្តរបស់សហរដ្ឋអាមេរិកក្នុងតំបន់នោះ។ លោកស្រីបានថ្លែងនៅសន្និសិទកាសែតនោះថា៖ «យើងមានជំនឿថា កូរ៉េខាងជើងជាការគំតរាមកំហែងមួយដល់សន្តិភាពនិងសន្តិសុខរបស់យើងនិងពិភពលោក។ ដូច្នេះ យើងមានប្រយោជន៍ចាំបាច់មួយក្នុងការធ្វើឱ្យកូរ៉េខាងជើងរារែកក្នុងគោលដៅនោះ ហើយក៏ក្នុងការការពារប្រឆាំងនឹងការបង្ករឿង ឬការប្រើកម្លាំងដោយប្រទេសនេះផងដែរ»។
សហរដ្ឋអាមេរិក បានប្តេជ្ញាសម្របសម្រួលជិតស្និទ្ធជាមួយកូរ៉េខាងត្បូងនិងជប៉ុនអំពីគោលនយោបាយស្តីពីប្រទេសកូរ៉េខាងជើងដើម្បីការពារសន្តិភាពនិងស្ថិរភាពលើឧបទ្វីបកូរ៉េ៕