តទៅនេះ គឺជាបទវិចារណកថាដែលឆ្លុះបញ្ចាំងពីទស្សនៈរបស់រដ្ឋាភិបាលសហរដ្ឋអាមេរិក
ស.រ.អ. គាំទ្រប្រជាជនលីបង់ចំពោះការអំពាវនាវរបស់ពួកគេឱ្យមានការទទួលខុសត្រូវខ្ពស់ និងឲ្យមានកំណែទម្រង់ក្នុងប្រទេសលីបង់។
កាលពីថ្ងៃទី៤ ខែកុម្ភៈ លោក Lokman Slim សកម្មជនដែលគាំទ្រយ៉ាងក្លាហានដល់សេរីភាពខាងការបញ្ចេញមតិ និងការចូលរួមដោយពលរដ្ឋ ត្រូវបានរកឃើញស្លាប់ក្នុងរថយន្ដលោកនៅប៉ែកខាងត្បូងនៃប្រទេសលីបង់។ លោកត្រូវបានគេបាញ់ចំចំនួន៥គ្រាប់។
ស.រ.អ. ថ្កោលទោសឃាតកម្មដ៏ឃោរឃៅចំពោះលោក Lokman Slim នេះ។
ក្នុងនាមជាអ្នកបោះពុម្ពផ្សាយ និងជាអ្នកផលិតខ្សែភាពយន្ដឯកសារមួយរូប លោក Slim គឺជាអ្នកកាន់សាសនាឥស្លាមនិកាយ Shiite ដែលបាននិយាយខ្លាំងក្លាប្រឆាំងនឹងយុទ្ធវិធីដ៏ឃោរឃៅរបស់ពួក Hezbollah ដែលគាំទ្រដោយអ៊ីរ៉ង់ក្នុងប្រទេសលីបង់។
ឯកអគ្គរដ្ឋទូតស.រ.អ.ប្រចាំប្រទេសលីបង់អ្នកស្រី Dorothy Shea បានកត់សម្គាល់អំពីគ្រោះថ្នាក់ដែលលោកបានប្រឈមថា៖ «លោក Lokman Slim បានទទួលស្គាល់ជាសាធារណៈ និងជាឯកជនថា មានការគំរាមកំហែងចំពោះអាយុជីវិតរបស់លោក តែលោកនៅតែជំរុញដោយក្លាហានឱ្យមានយុត្តិធម៌ ការទទួលខុសត្រូវខ្ពស់ និងនីតិរដ្ឋក្នុងប្រទេសលីបង់»។
រដ្ឋមន្ត្រីការបរទេសស.រ.អ.លោក Anthony Blinken បាននិយាយសំដៅដល់ការធ្វើឃាតលោក Slim ថាជា«ឃាតកម្មដ៏សាហាវយង់ឃ្នងមួយ»។ នៅក្នុងសេចក្តីថ្លែងការណ៍មួយលោកបានមានប្រសាសន៍ថា៖ «វាជាការកំសាក និងជាការមិនអាចទទួលបានទេដែលយកអំពើហិង្សា ការគំរាមកំហែង និងការបំភិតបំភ័យជាមធ្យោបាយសម្រាប់ធ្វើវិទ្ធង្សនាប្រឆាំងនឹងនីតិរដ្ឋ ឬបង្ក្រាបសេរីភាពខាងការបញ្ចេញមតិ និងភាពសកម្មរបស់ពលរដ្ឋ។ យើងសុំឱ្យពួកមន្ត្រីលីបង់ដោយមានរួមបញ្ចូលទាំងពួកមេដឹកនាំខាងតុលាការ និងខាងនយោបាយ ធ្វើឱ្យពួកជនដែលបានធ្វើសកម្មភាពព្រៃផ្សៃបែបនេះ មានការទទួលខុសត្រូវខ្ពស់ដោយគ្មានការពន្យារពេល ឬការលើកលែងអ្វីឡើយ»។
សពលោក Lokman Slim ត្រូវបានរកឃើញរយៈពេល៦ខែ ក្រោយការផ្ទុះកាលពីថ្ងៃទី៤ ខែសីហា ឆ្នាំ២០២០ក្នុងរដ្ឋធានីបេរូត ដែលបានបណ្តាលឱ្យមនុស្សរាប់រយនាក់ស្លាប់ និងមានមនុស្សរាប់ពាន់នាក់ទៀតរងរបួស។ ការស៊ើបអង្កេតអំពីការផ្ទុះនេះ នឹងចាប់ផ្ដើមធ្វើជាថ្មីនៅក្នុងខែនេះ។ វាជាការមានសារៈសំខាន់ណាស់ ដែលស្ថាប័នតុលាការលីបង់បង្ហាញថា ខ្លួនអាចចាត់វិធានការដើម្បីធ្វើឱ្យប្រាកដថា មានការគោរពដល់នីតិរដ្ឋ។
នៅក្នុងសេចក្តីថ្លែងការណ៍រួមគ្នាមួយ លោករដ្ឋមន្ត្រីការបរទេសស.រ.អ. Anthony Blinken និងលោក Jean-Yves Le Drian រដ្ឋមន្ត្រីការបរទេសនៃប្រទេសបារាំង បានបញ្ជាក់ជាថ្មីអំពី«ការគាំទ្រទាំងស្រុងដល់ប្រជាជននៃប្រទេសលីបង់»ដោយមានរួមបញ្ចូលទាំងការផ្តល់ជំនួយលើវិស័យសុខាភិបាល ការអប់រំ ផ្ទះសម្បែង និងជំនួយឯទៀតៗផងដែរ។
ទោះជាយ៉ាងណាក៏ដោយ មន្ត្រីទាំងពីរនាក់នេះបាននិយាយបន្ថែមទៀតថា «ប្រទេសបារាំង និងស.រ.អ.ក៏រំពឹងថា នឹងមានលទ្ធផលឆាប់រហ័សទៅលើការស៊ើបអង្កេតអំពីបុព្វហេតុនៃការផ្ទុះនេះផងដែរ»។
លោករដ្ឋមន្ត្រី Blinken និងលោករដ្ឋមន្ត្រីការបរទេស Le Drian បានសរសេរថា៖ «ខួប៦ខែនៃព្រឹត្តិការណ៍ដ៏សោកនាដកម្មនេះ គូសបញ្ជាក់សេចក្តីត្រូវការជាបន្ទាន់ និងចាំបាច់ឱ្យភាគីពាក់ព័ន្ធទាំងអស់ក្នុងប្រទេសលីបង់ចាត់វិធានការតាមការសន្យារបស់ផងខ្លួនដែលបានធ្វើ ដើម្បីបង្កើតរដ្ឋាភិបាលមួយដែលមានការជឿទុកចិត្ត និងមានប្រសិទ្ធភាព ហើយបើកផ្លូវឱ្យមានការអនុវត្តកំណែទម្រង់ចាំបាច់តាមការប៉ងប្រាថ្នារបស់ប្រជាជនលីបង់។
រដ្ឋមន្ត្រីនៃប្រទេសទាំងពីរបានថ្លែងទៀតថា៖ «សកម្មភាពជាក់ស្តែងបែបនេះ នៅតែមានសារៈសំខាន់ដល់ការទាក់ទងរបស់ប្រទេសបារាំង ស.រ.អ. និងបណ្ដាដៃគូក្នុងតំបន់ និងដៃគូអន្តរជាតិរបស់ប្រទេសទាំងពីរ ដើម្បីផ្តល់ការគាំទ្របន្ថែមទៀត និងសម្រាប់រយៈពេលយូរដល់ប្រទេសលីបង់»៕