តទៅនេះ គឺជាបទវិចារណកថាដែលឆ្លុះបញ្ចាំងពីទស្សនៈរបស់រដ្ឋាភិបាលសហរដ្ឋអាមេរិក
សហរដ្ឋអាមេរិក កំពុងឃ្លាំមើលយ៉ាងដិតដល់ទៅលើស្ថានការណ៍នៅក្នុងប្រទេស ស៊ីមបាវ៉េក្រោយពីអ្វីដែលលោក Ned Price អ្នកនាំពាក្យក្រសូងការបរទេសអាមេរិកហៅថា ជា«ចំណាត់ការនាំឱ្យអំពល់ទុក្ខ»។
កាលពីថ្ងៃទី១៧ ខែមីនា លោក Tendai Biti អនុប្រធាននៃចលនាសម្ព័ន្ធភាពការផ្លាស់ប្តូរបែបប្រជាធិបតេយ្យហៅកាត់ថាសម្ព័ន្ធភាព MDC និងសមាជិកឯទៀតៗនៃសម្ព័ន្ធភាព MDC បានត្រូវដកអាសនៈជាប់ឆ្នោតរបស់ពួកគេនៅក្នុងសភានៃប្រទេសស៊ីមបាវ៉េ។
ការណ៍នេះមានន័យថា ចាប់តាំងពីខែមីនា ឆ្នាំ២០២០មក កលល្បិចសភាគាំទ្រដោយរដ្ឋាភិបាលនៃប្រទេសស៊ីមបាវ៉េ បានបណ្តាលឱ្យមានការដកតំណែងរបស់សមាជិកសភា៣៩នាក់នៃសម្ព័ន្ធភាព MDC និងពួកមន្ត្រីជាប់ឆ្នោតក្នុងមូលដ្ឋាន៨១នាក់។ លោក Price ដែលជាអ្នកនាំពាក្យក្រសួងការបរទេសអាមេរិកបាននិយាយនៅក្នុងសេចក្តីថ្លែងការណ៍មួយថា «សកម្មភាពទាំងនេះធ្វើវិទ្ធង្សនាប្រឆាំងនឹងឆន្ទៈក្រុមអ្នកបោះឆ្នោត ធ្វើឱ្យអន្តរាយថែមទៀតដល់លទ្ធិប្រជាធិបតេយ្យនិងបដិសេធក្រុមអ្នកតំណាងដែលប្រជារាស្ត្រស៊ីមបាវ៉េរាប់លាននាក់បានជ្រើសរើស»។
កាលពីថ្ងៃទី៣ ខែមីនា លោកប្រធានាធិបតី Joe Biden បានដាក់ទណ្ឌកម្មជាថ្មី មួយឆ្នាំទៀតលើសមាជិកខ្លះនៃរដ្ឋាភិបាលស៊ីមបាវ៉េ និងពួកជនឯទៀតៗដែល «ធ្វើឱ្យអន្តរាយដល់ដំណើរការប្រជាធិបតេយ្យ ឬស្ថាប័នប្រជាធិបតេយ្យ»។ នៅក្នុងសេចក្តីប្រកាសមួយជូនសភាអាមេរិក ដើម្បីដាក់ទណ្ឌកម្មជាថ្មីដែលមានធ្វើដំបូងកាលពីឆ្នាំ២០០៣ ដោយបទបញ្ជាអង្គនីតិប្រតិបត្តិលេខ១៣២៨៨ លោកប្រធានាធិបតី Biden បានសរសេរថា សកម្មភាពនិងគោលនយោបាយរបស់ពួកជនដែលត្រូវបានដាក់ទណ្ឌកម្មទាំងនេះ «បានរួមចំណែកដល់ការធ្វើឱ្យបែកបាក់នីតិរដ្ឋក្នុងប្រទេសស៊ីមបាវ៉េ ធ្វើឱ្យមានអំពើហិង្សាខាងនយោបាយ និងនាំឱ្យមានការបំភិតបំភ័យនៅក្នុងប្រទេសនោះព្រមទាំងបណ្តាលឱ្យមានអស្ថិរភាពខាងនយោបាយ និងខាងសេដ្ឋកិច្ចក្នុងផ្នែកខាងត្បូងនៃទ្វីបអាហ្វ្រិក ថែមទៀតផង»។
នៅពេលការបណ្តេញពួកសមាជិកនៃសម្ព័ន្ធភាព MDC មានធ្វើតទៅទៀត លោក Price បានប្រកាសថា សហរដ្ឋអាមេរិកក៏កំពុងឃ្លាំមើល«កិច្ចខិតខំប្រឹងប្រែងរបស់រដ្ឋាភិបាលស៊ីមបាវ៉េ ក្នុងការរំលាយសម្ព័ន្ធភាព MDC តាមរយៈការចាប់ខ្លួន និងការឃុំឃាំងពួកមេដឹកនាំនៃសម្ព័ន្ធភាពនេះ និងការបង្វែរទ្រព្យធនរបស់សម្ព័ន្ធភាពនេះផងដែរ»។ លោកបានសរសេរថា បន្ថែមលើនេះទៀតអាមេរិកកត់សម្គាល់ថា «ការពង្រឹងបទបញ្ញត្តិជ្រើសរើសដោយរដ្ឋាភិបាលប្រឆាំងនឹងជំងឺកូវីដ១៩ដោយពន្យាពេលការបោះឆ្នោតរហូត និងហាមប្រាមមិនឱ្យមានការប្រមូលផ្តុំដោយសម្ព័ន្ធភាព MDC នៅពេលអនុញ្ញាតឱ្យមានការបោះឆ្នោតផ្ទៃក្នុងនិងការប្រមូលផ្តុំដោយសហភាពជាតិអាហ្វ្រិក ស៊ីមបាវ៉េរណសិរ្សស្នេហាជាតិ គឺគណបក្ស ZANU-PF ដែលជាគណបក្សគ្រប់គ្រងប្រទេសនិងសម្ព័ន្ធមិត្តរបស់ពួកគេ»។
លោក Price បានថ្លែងទៀតថា «គណបក្ស ZANU-PF បានប្រើប្រាស់ឥទ្ធិពលរដ្ឋាភិបាលដើម្បីបំបិទមាត់ពួកអ្នករិះគន់ បំផ្លាញក្រុមប្រឆាំងនិងពង្រឹងអំណាចលើពលរដ្ឋស៊ីមបាវ៉េ។ យើងអំពាវនាវដល់រដ្ឋាភិបាលស៊ីមបាវ៉េឱ្យធ្វើតាមកាតព្វកិច្ចរបស់ខ្លួនក្នុងការគោរពសេរីភាពនៃការបញ្ចេញមតិនិងការរួមប្រជុំដូចដែលមានចែងក្នុងរដ្ឋធម្មនុញ្ញនៃប្រទេសស៊ីមបាវ៉េនិងដល់ការប្តេជ្ញាអន្តរជាតិរបស់ខ្លួនផងដែរ»៕