តទៅនេះ គឺជាបទវិចារណកថាដែលឆ្លុះបញ្ចាំងពីទស្សនៈរបស់រដ្ឋាភិបាលសហរដ្ឋអាមេរិក
ក្នុងចំណោមចំណាត់ការដំបូងៗរបស់លោកនៅពេលលោកចូលកាន់តំណែង លោកប្រធានាធិបតី Joe Biden បានស្នើឲ្យបន្តសន្ធិសញ្ញា START ថ្មី ប្រាំឆ្នាំទៀត។ សន្ធិសញ្ញានេះ ជាកិច្ចព្រមព្រៀងត្រួតត្រាអាវុធនុយក្លេអ៊ែរដែលនៅសេសសល់រវាងសហរដ្ឋអាមេរិក និងប្រទេសរុស្ស៊ី។ សន្ធិសញ្ញានេះ មានកំណត់ផុតអាយុកាលនៅថ្ងៃទី៥ ខែកុម្ភៈ។
នៅក្នុងការនិយាយគ្នាតាមទូរស័ព្ទលើកទីមួយរបស់អស់លោក លោកប្រធានាធិបតី Biden និងលោកប្រធានាធិបតីរុស្ស៊ី Vladimir Putin បានពិភាក្សាគ្នាអំពីចំណង់របស់ប្រទេសទាំងពីរក្នុងការបន្តអាយុកាលសន្ធិសញ្ញា START ថ្មី។ សេតវិមានបាននិយាយនៅក្នុងឯកសារផ្លូវការសង្ខេបចំណុចសំខាន់ៗកាលពីថ្ងៃទី២៦ ខែមករានៃការសន្ទនាគ្នានោះថា លោក Biden និងលោក Putin បានយល់ស្របគ្នាឱ្យក្រុមរបស់អស់លោក«ធ្វើការជាបន្ទាន់ដើម្បីបន្តអាយុកាលកិច្ចព្រមព្រៀងនេះឱ្យបានមុនថ្ងៃទី៥កុម្ភៈ»។
នៅថ្ងៃបន្ទាប់ពីប្រធានាធិបតីទាំងពីរនាក់នេះនិយាយគ្នា សភាទាំងពីរនៃប្រទេសរុស្ស៊ី បានបោះឆ្នោតជាឯកច្ឆន្ទដើម្បីបន្តអាយុកាលសន្ធិសញ្ញានេះ ប្រាំឆ្នាំតទៅទៀត។
សន្ធិសញ្ញា START ថ្មីនេះ ត្រូវបានចុះហត្ថលេខាកាលពីឆ្នាំ២០១០ ដោយលោកប្រធានាធិបតី Barack Obama និងលោកប្រធានាធិបតីរុស្ស៊ី Dmitry Medvedev។ សន្ធិសញ្ញានេះ កម្រិតឱ្យប្រទេសនីមួយៗដាក់ពង្រាយក្បាលកាំជ្រួចមីសស៊ីលផ្ទុកអាវុធនុយក្លេអ៊ែរចំនួន១៥៥០គ្រឿង មីសស៊ីលនិងយន្តហោះទម្លាក់គ្រាប់បែក៧០០គ្រឿងនិងប្រដាប់បាញ់បង្ហោះ ICBM និង SLBM ទាំងអស់៨០០គ្រឿង។ សន្ធិសញ្ញានេះ ក៏អនុញ្ញាតឱ្យមានអធិការកិច្ចទូលំទូលាយនៅនឹងកន្លែងដើម្បីផ្ទៀងផ្ទាត់ការគោរពតាម។
អ្នកស្រី Jens Psaki អ្នកនាំពាក្យសេតវិមាន បានកត់សម្គាល់នៅក្នុងសន្និសីទកាសែតមួយទៅកាន់ពួកអ្នកសារព័ត៌មានថា «សន្ធិសញ្ញា START ថ្មី ជាសន្ធិសញ្ញានៅសល់តែមួយគត់ដើម្បីកម្រិតកម្លាំងនុយក្លេអ៊ែររុស្ស៊ី ហើយជាទីពឹងមួយនៃស្ថិរភាពយុទ្ធសាស្ត្ររវាងប្រទេសយើងទាំងពីរ»។
លោក John Kerby អ្នកនាំពាក្យក្រសួងការពារប្រទេសសហរដ្ឋអាមេរិក បាននិយាយថា ការគោរពសន្ធិសញ្ញា START ថ្មី ដោយប្រទេសរុស្ស៊ី«បានបម្រើផលប្រយោជន៍សន្តិសុខជាតិរបស់យើង ហើយប្រជាពលរដ្ឋអាមេរិកាំង មានសុវត្ថិភាពជាងមុនជាមួយសន្ធិសញ្ញា START ថ្មី ដែលនៅដូចដើមដដែល និងមានការបន្តអាយុកាលថែមទៀតផង»។
លោក John Kerby បានថ្លែងបន្ថែមថា «ការបន្តអាយុកាលការកម្រិតរបស់សន្ធិសញ្ញានេះលើកន្លែងស្តុកទុកអាវុធនុយក្លេអ៊ែរយុទ្ធសាស្ត្ររហូតដល់ឆ្នាំ២០២៦ អនុញ្ញាតឱ្យប្រទេសយើងទាំងពីរ ស្វែងរករបៀបថ្មីៗសម្រាប់ផ្ទៀងផ្ទាត់ការត្រួតត្រាអាវុធដែលអាចកាត់បន្ថយហានិភ័យដល់ប្រជារាស្ត្រអាមេរិកាំង»។
ក៏ប៉ុន្តែ សហរដ្ឋអាមេរិកនៅតែយល់យ៉ាងច្បាស់ចំពោះការប្រឈមជាមួយប្រទេសរុស្ស៊ី និងអំពីលទ្ធភាពនៃការមានការត្រួតត្រាអាវុធនៅក្នុងឃ្លាំងអាវុធនុយក្លេអ៊ែរចិនដែលកើនឡើងយ៉ាងឆាប់រហ័ស។ នៅក្នុងការនិយាយគ្នាតាមទូរស័ព្ទជាមួយលោកប្រធានាធិបតី Putin ក្រៅពីពិភាក្សាគ្នាអំពីការបន្តអាយុកាលសន្ធិសញ្ញា START ថ្មី លោកប្រធានាធិបតី Biden ក៏បានលើកឡើងដែរអំពីសកម្មភាពរបស់រុស្ស៊ីដែលនាំឱ្យមានអស្ថិរភាពដោយមានរួមបញ្ចូលការគំរាមកំហែងរបស់រុស្ស៊ីដល់អធិបតេយ្យភាពនៃប្រទេសអ៊ុយក្រែន ការវាយប្រហារតាមអនឡាញលើ software របស់ក្រុមហ៊ុន SolarWinds ដែលនាំឱ្យខូចខាតដល់ក្រុមហ៊ុន និងទីភា្នក់ងារសហរដ្ឋអាមេរិក ការជ្រៀតជ្រែកក្នុងការបោះឆ្នោតនៅសហរដ្ឋអាមេរិកកាលពីឆ្នាំ២០២០ របាយការណ៍អំពីរុស្ស៊ីផ្តល់រង្វាន់ដល់ការសម្លាប់ទាហានអាមេរិក ក្នុងប្រទេស Afghanistan និងការបំពុលអ្នកប្រឆាំងរុស្ស៊ី គឺលោក Aleksey Navalny។
លោកប្រធានាធិបតី Biden បានមានប្រសាសន៍ប្រាប់ពួកអ្នកកាសែតថា «ខ្ញុំយល់ថា យើងទាំងពីរ អាចធ្វើការជាមួយគ្នាដើម្បីបំរើអត្ថប្រយោជន៍របស់ប្រទេសយើងទៅវិញទៅមកជាមួយកិច្ចព្រមព្រៀង START ថ្មី ហើយខ្ញុំបាននិយាយយ៉ាងច្បាស់លាស់ប្រាប់រុស្ស៊ីថា យើងខ្វល់ខ្វាយខ្លាំងណាស់អំពីអាកប្បកិរិយារបស់ពួកគេ»៕